TOFAUTI KATI YA TAJIRI NA MASKINI KATIKA KIPIMO CHA MALIPO

 MATAJIRI huwa wanachagua kulipwa kwa matokeo ambayo wanazalisha na hilo linawapelekea kulipwa zaidi kadiri wanavyozalisha zaidi.
MASKINI huwa wanachagua kulipwa kwa muda wanaofanya kazi, na hilo linawapa ukomo kwenye kulipwa kwao kwa sababu muda una ukomo.
Acha sasa kutaka kulipwa kwa muda na anza kuchagua kulipwa kwa matokeo unayozalisha. Muda una ukomo, lakini matokeo hayana ukomo.
Ajira ni moja ya maeneo ambao unalipwa kwa muda, ndiyo maana unapaswa kuwa na biashara ya pembeni.

MIPANGO YA MAISHA INAPASWA KUJA KABLA YA MIPANGO YA BIASHARA.

Ni rahisi sana kuweka malengo na mipango mikubwa ya kibiashara, lakini unapokaa na kujiuliza kwa nini unataka kufikia malengo hayo makubwa unakosa jibu la uhakika.

Watu wengi wamekuwa wanapotea kwenye biashara kwa sababu wanaweka malengo ya biashara kabla hawajaweka malengo ya maisha. Wanataka kuwa mabilionea kupitia biashara zao, na hilo linawataka kuweka maisha yao yote kwenye biashara na kusahau vitu vingine vyote. Wanaweza kufikia lengo hilo, lakini maeneo mengine ya maisha yao kama afya na mahusiano yanakuwa yameathirika sana.

Kabla hujaweka lengo kubwa la biashara, anza kwanza na lengo kuu la maisha yako. Jua unataka kuwa na maisha ya aina gani, jua maisha ya mafanikio kwa upande wako yana maana gani.

Ukishajua kwamba unataka nini kwenye maisha yako, hapo sasa unaweza kuitumia biashara yako kuwa na maisha unayoyataka wewe. Lakini ukianza kufikiria unachotaka kwenye biashara pekee, utaishia kuwa na maisha mabovu sana.

UNAPOJIAJRI , UNAPASWA KUFIKIRI TOFAUTI NA WALE WALIOAJIRIWA.

Unapojiajiri, unapaswa kufikiri tofauti kabisa na wale walioajiriwa. Kwa sababu kuna vitu ambavyo watu walioajiriwa hawajisumbui navyo sana, kwa sababu wameahidiwa vinafanyiwa kazi, mfano bima ya afya, mafao ya uzeeni na mengineyo. Unapoachana na ajira na kuamua kujiajiri moja kwa moja, mambo hayo utapaswa kuyahangaikia mwenyewe, lazima utafute bima yako na familia yako na pia lazima uwekeze ili kujiandaa kwa siku zijazo. Kwa sababu hakuna anayekuandalia mafao, unapaswa kutengeneza uwekezaji wako mwenyewe, ambao miaka mingi ijayo utaweza kukuingizia wewe kipato hata kama hufanyi kazi moja kwa moja.

ELIMU YA DARASANI INAPOKWAMA.

“In the new world of sales, being able to ask the right questions is more valuable than producing the right answers. Unfortunately, our schools often have the opposite emphasis. They teach us how to answer, but not how to ask.” ― Daniel H. Pink

Kwenye ulimwengu mpya wa mauzo, kuuliza maswali sahihi ni bora kuliko kuwa na majibu sahihi. Kwa sababu tayari mteja anajua mengi zaidi, jukumu lako kama muuzaji ni kuuliza maswali yatakayokupa wewe fursa ya kumjua mteja zaidi.

Lakini kwa bahati mbaya sana, elimu ya darasani iko kinyume na hili. Miaka yote ambayo tumekaa shuleni tumekuwa tunafundishwa jinsi ya kujibu maswali ili kufaulu mtihani. Hivyo unakuwa vizuri sana kwenye kujibu maswali, lakini unapofika mtaani unakuta tayari kila mtu ana majibu. Hivyo elimu ya darasani inakwama hapo.

Ili kupiga hatua kwenye kitu chochote unachofanya kwenye maisha yako, jifunze jinsi ya kuuliza maswali sahihi, maswali ambayo yatakupa nafasi ya kumjua mtu zaidi na mahitaji yake, ili uweze kumhudumia zaidi.

Kadiri unavyoweza kuuliza maswali sahihi na kusikiliza kwa makini majibu yanayotolewa, ndivyo unavyoweza kujifunza na kujua hatua sahihi za kuchukua.

JINSI YA KUTENGENEZA KIPATO KUPITIA UANDISHI.

( 1 ). kuandika kuhusu kazi au biashara yako. Hapa unaandika nakala za mauzo, zinazowavutia watu kwenye kazi au biashara unayofanya na kuwashawishi kuja kununua kile unachotoa. Kadiri unavyoweza kandika vizuri, ndivyo unavyoweza kuwavutia wengi na kuuza zaidi.

( 2 ). kuwaandikia wengine. Popote pale ulipo, kuna watu wana bidhaa au huduma nzuri sana, zinazoweza kuwasaidia wengine kupiga hatua zaidi kwenye maisha yao, lakini hawajaweza kuwafikia watu wengi. Hapo kuna fursa ya wewe kuijua vizuri bidhaa au huduma hiyo, kisha kuandika nakala za mauzo na kila anayenunua bidhaa au huduma kupitia nakala zako, basi mtu huyo anakupa wewe kamisheni. Angalia ni bidhaa au huduma zipi unaweza kuzifanyia hivyo, ingia makubaliano na wahusika na anza kuandika nakala za mauzo.

( 3 ). kuwa mwandishi na kuuza kazi zako za uandishi. Unaweza kuwa mwandishi kwenye eneo lolote unalochagua, na kwa kujifunza njia bora za uandishi wenye ushawishi, ukaweza kuwavutia watu kusoma kazi zako na hata kuzinunua pia. Hapa unaweza kuwa na vitabu, kozi au huduma nyingine kama za ushauri ambapo utawavutia watu kuzipata kupitia uandishi wenye ushawishi.

Rafiki, hapo ulipo sasa, unaweza kutumia uandishi wa nakala za mauzo kama sehemu ya kuingiza kipato cha pembeni. Jifunze na kuwa mwandishi bora, andika sana na kuwa na mpango bora wa kutengeneza kipato kupitia uandishi wako.

UJUZI ULIOZALISHA MAMILIONEA WENGI DUNIANI.

“There is virtually no other skill that can make you as much money as copywriting. Nearly all internet millionaires know this secret: more than their product, more than their traffic generation techniques, more than their email campaigns, more than who their joint-venture partners might be, it’s their copywriting that has made them rich.” – Ray Edwards.

Upo ujuzi mmoja ambao umezalisha mamilionea wengi dunia kuliko ujuzi mwingine wowote ule. Ujuzi huo ni uandishi wa nakala za mauzo (copywriting). Kama umewahi kuona tangazo la bidhaa kwenye tv, redio au gazeti na likaingia kwenye fikra zako kiasi cha kuwa unafikiria tangazo hilo muda mwingi basi jua kuna watu walikaa chini na kuandika tangazo hilo, ili kukulenga wewe.

Kama umewahi kusoma maelezo ya kitu fulani na ukatoka ukiwa na hamasa na kuchukua hatua mara moja, basi jua hapo kuna watu wamekaa chini kaundika kitu kinachokulenga wewe, wakiwa wana hatua ambayo wanataka wewe uchukue.

Uandishi wa nakala za mauzo, ni moja ya ujuzi ambao unalipa zaidi duniani, hasa pale mtu anapoweza kufanya kwa ubora wa hali ya juu. Jifunze uandishi wenye ushawishi kama tulivyojifunza kwenye kitabu cha juma hili na utaweza kuongeza kipato chako maradufu.

HATUA 06 ZA KUANDIKA NAKALA YA MAUZO YENYE MVUTO KWA WATU KUSOMA NA KUWASHAWISHI KUNUNUA UNACHOUZA-------- Fursa Afrika Mashariki Blog

JINSI YA KUONGEA MBELE YA KUNDI KUBWA LA WATU

VITU VIWILI UNAVYOHITAJI ILI WATU WAKUSIKILIZE.

“There is only one excuse for a speaker's asking the attention of his audience: he must have either truth or entertainment for them.” ― Dale Carnegie

Kama unataka watu wakusikilize unapoongea, unapaswa kuwa na moja au vyote kati ya vitu hivi viwili; ukweli au burudani.

Watu wanapenda kusikiliza ukweli, ukweli ambao unawawezesha kufanya maamuzi sahihi na kupiga hatua kwenye maisha yao, ukweli unaowafanya waone wapi walikuwa wanakosea na hatua sahihi za kuchukua ni zipi. Unapokuwa na ukweli, watu wanakusikiliza, hasa pale unapokuwa na ushahidi wa ukweli huo. Japokuwa wakati mwingine ukweli huwa unaumiza na watu wengi kuukataa, lakini unapousimamia unapata watu wa kukusikiliza. Hii ndiyo inayosababisha tunawasikiliza waalimu, washauri, au viongozi mbalimbali, ambao tunajua wana ukweli ambao tunauhitaji.

Watu wanapenda burudani, watu wanapenda kusahau changamoto zao za maisha kwa muda na kucheka kidogo. Na hapa ndipo wasanii na wachekeshaji wanapopata nafasi ya kuwafikia wengine kupitia sanaa zao. Watu watamsikiliza mtu kama wanaburudika kwa kumsikiliza.

Hivyo rafiki, kama unataka kuwa mnenaji mzuri, kazana kuweka vitu hivi viwili kwenye unenaji wako, ukweli na burudani. Kila unapopata nafasi ya kuongea mbele ya wengine, jua ni ukweli gani ambao unataka watu hao wajue, labda kuhusu wewe, kuhusu mada unayozungumzia au kuhusu bidhaa au huduma unayotaka kuwauzia. Ukweli huu uwafanye waondoke na kitu ambacho hawakuwa wanakijua awali na wawe na hatua za kuchukua ambazo hawakuwa wanachukua awali. Pia waburudishe watu kupitia unenaji wako, kuwa na hadithi, mifano au visa ambavyo vinaufukisha ukweli huo kwa njia ambayo inawaburudisha watu. Unahitaji kuwa na maandalizi ya mifano au hadithi utakazotumia kwenye unenaji wako, ambavyo vitafikisha ukweli na kuwaburudisha watu pia.

Zingatia vitu hivyo viwili katika unenaji, ukweli na burudani na watu watapenda kukusikiliza kila wakati bila ya kuchoka.

TUMIA MTANDAO WA INTANETI VIZURI.

Mtandao wa intaneti una nguvu kubwa ya kuweza kuwafikia wateja wengi zaidi. Watu wengi wamekuwa wanachukulia mtandao wa intaneti kama sehemu ya kutoa maarifa na taarifa pekee, lakini pia unaweza kutumika kupata wateja zaidi wa biashara yako.

Katika kutumia mtandao wa intaneti kupata wateja zaidi unapaswa kuwa na vitu viwili;

Moja unapaswa kuwa na tovuti ya biashara yako, hii inaeleza kila kitu kuhusu biashara yako. Hapa ndipo nyumbani kwa biashara yako mtandaoni. Watu wanaweza kuingia na kupata taarifa muda wowote ule, masaa 24 kila siku. Unaweza pia kuuza bidhaa zako moja kwa moja kwenye tovuti ya biashara yako.

Mbili unapaswa kuwa na blogu ya biashara yako. Blogu hii unaitumia kutoa taarifa na maarifa yanayohusiana na biashara yako. Unaweza kuitumia blogu kutoa elimu kwa wateja wako kuhusu biashara yako, hivyo watu wanapokuwa na shida na kutafuta suluhisho, wanaletwa kwenye blogu ya biashara yako. Kwa kupata ushauri wako mzuri, wanakuamini na kuwa tayari kununua kile unachouza.

Tumia vitu hivyo viwili ili biashara yako iweze kunufaika na mtandao wa intaneti.

TUMIA SIMU KUUZA.

Simu yako ni nguvu kubwa sana ya kukuwezesha kuwafikia wateja wengi na kuwauzia pia. Itumie simu yako kama kifaa cha masoko na mauzo kwa kuwasiliana na wateja wako kabla na baada ya kununua.

Kila mteja anayefika kwenye biashara yako au anayejibu kutokana na matangazo yanayotolewa na biashara, taarifa zake zinapaswa kuhifadhiwa. Hifadhi namba zao za simu na tengeneza mpango wa kuwa unawapigia simu wateja wako.

Kwa wale ambao hawajanunua wapigie kuwaeleza manufaa ya kile unachouza na kuwashawishi kuja kununua. Kwa ambao wameshanunua wapigie kujua wanaendeleaje na kile walichonunua kimewafaaje.

Kwa kutumia simu yako vizuri utaweza kuwafikia wateja wengi na kuuza zaidi.

Njia bora ya kuandaa mpango huu wa simu ni kurusha matangazo ambayo yanawataka wateja wako kupiga simu, kutuma ujumbe au kuja kwenye biashara yako. Na mteja akishakutafuta, basi tunza mawasiliano yake, hasa simu na hapo utaendelea kuyatumia kwa masoko na mauzo zaidi.

PIMA KILA KITU.

Kila hatua unayochukua kwenye biashara yako, unapaswa kuipima, la sivyo hutaweza kujua kama inaleta matokeo sahihi au la. Usiendeshe biashara yako kwa kubahatisha, badala yake iendeshe kwa kupima kila unachofanya na kisha kufanya maamuzi sahihi kutokana na matokeo unayoyapata baada ya kupima.

Kwenye biashara, mara nyingi unachotaka wewe siyo ambacho soko linataka, unachopenda wewe siyo ambacho soko linapenda. Hivyo acha kujifikiria wewe na angalia soko linapenda nini kisha lipe.

Kama unaendesha matangazo, pima matangazo hayo kwa kutumia njia mbalimbali kama kutumia vichwa vya habari tofauti, kutumia vyombo vya habari tofauti, kutoa ofa tofauti, kutumia bei tofauti na hata kutoa ofa tofauti. Kisha pima matokeo unayopata kwa kila njia unayotumia na ile inayoleta matokeo mazuri ndiyo inakuwa njia kuu.

Kila unachofanya kwenye biashara yako, unapaswa kukipima na kujua matokeo yake. Na hata baada ya kupata matokeo bora kabisa na kuchagua njia kuu, bado unapaswa kuendelea kupima kadiri unavyokwenda ili uweze kujua matokeo unayopata na kama kuna njia bora zaidi basi itumike hiyo.

Unapokuwa unapima, unapaswa kuanza kwa hatua ndogo na ukishapata matokeo basi unakwenda kwenye hatua kubwa. Kwa mfano kama unajaribu tangazo, anza kwa kuwafikia watu wachache kisha ukishaona njia bora ndiyo unapeleka tangazo hilo kwa watu wengi zaidi.

PATA HASARA MWANZONI KUPATA FAIDA MBELENI.

Kikwazo kikubwa cha ukuaji wa biashara imekuwa kushindwa kumshawishi mteja kununua kwa mara ya kwanza. Hivyo hapa ndipo unapaswa kuweka nguvu zako kubwa.

Kwa sababu tayari una mkakati bora wa kutoa thamani kubwa kwa wateja wako, hawataweza kuona hilo mpaka pale watakaponunua kwako kwa mara ya kwanza.

Swali ni je utawezaje kumshawishi mteja kununua kwako kwa mara ya kwanza, mteja ambaye hajawahi kununua kabisa kwako?

Jibu ni kwa kuondoa vizingiti au vikwazo vyote ambavyo vinamzuia mteja kwa sasa. Kikwazo kikubwa kabisa kimekuwa ni hatari ambayo mteja anaona iko mbele yake, ya kupoteza fedha zake iwapo anachonunua hakitamfaa.

Hatua za kuchukua ni kuwa na mkakati wa kupata hasara mara ya kwanza mteja anaponunua kwako, lakini kwa kuwa utamhudumia vizuri na atarudi tena na tena, basi utaweza kutengeneza faida siku za mbeleni.

Hapa unaweza kutoa zawadi kwa mteja anaponunua kwa mara ya kwanza au kuwa na punguzo fulani. Vyote ni kumfanya achukue hatua ya kununua kwako kama kukujaribu, na akishanunua kwako mara moja, ataendelea kununua.

Zawadi au punguzo unalompa mwanzo linaondoa kabisa ile faida ambayo ungeweza kuipata, lakini anapokuja kununua tena, unatengeneza faida.

Chukua mfano unauza kitu ambacho bei yake ni elfu 10 na faida unayopata ni elfu 3. Mteja ananunua kitu hicho kila mwezi mara moja na unaweza kwenda naye kwa angalau miaka mitatu. Sasa unaweza kumpa mteja wako zawadi au punguzo la hiyo elfu tatu na hata zaidi anaponunua kwa mara ya kwanza. Lakini atakapoendelea kununua, utarudisha faida hiyo na zaidi.

Kabla ya kuchukua hatua hii unapaswa kukokotoa kiasi cha faida unachopata na muda ambao mteja atanunua ili uweze kupata matokeo mazuri.

ONDOA KABISA HATARI KWA MTEJA.

Tumeona kikwazo cha wateja kununua kwa mara ya kwanza kwako ni hatari ya kupoteza fedha zao iwapo kitu walichonunua hakitawafaa kama walivyotaka. Tumejifunza njia moja ya kuwapa ofa au zawadi ambayo itawasukuma kununua.

Ipo njia nyingine yenye nguvu zaidi, ambayo ukiitumia lazima mteja anunue. Njia hiyo ni kuondoa kabisa hatari kwa mteja. Yaani hapa unaondoa nafasi yoyote ile ya mteja kupoteza fedha zake, na unakwenda mbele zaidi kwa kumlipa kwa muda au chochote alichopoteza.

Jay anaiita mbinu hii BETTER-THAN-RISK-FREE GUARANTEE (BTRF). Biashara nyingi huwa zinamrudishia mtu fedha aliyonunulia kitu kama hakijamfaa, au kumpa kitu kingine. Sasa wewe unahitaji kwenda zaidi ya hapo, unahitaji kumrejeshea mteja kile alicholipa, lakini pia kumlipa fidia kwa muda aliopoteza au usumbufu uliomsababishia.

Kwa kuwa tayari kumlipa fidia mteja wako pale ambapo hajaridhishwa na ulichomuuzia inaonesha unamjali sana na pia una uhakika sana na kile unachouza. Kadiri mteja anavyopata uhakika wa aina hii, ndivyo anavyokuwa tayari zaidi kununua kile unachouza.

Kama kweli unajali kuhusu wateja wako na kama kweli unaamini kwenye kile unachouza na umechagua kuwazia wateja sahihi, unaweza kutumia mbinu hii na hutapata hasara yoyote. Kwa sababu kwanza utawahudumia wateja sahihi na watakuwa tayari kwenda na wewe kwa muda mrefu.

KUWA NA KITU CHA KUKUTOFAUTISHA NA WENGINE.

Ili kufanikiwa kwenye biashara au chochote unachofanya, unapaswa kujitofautisha na wale wanaofanya kile unachofanya. Hivyo hapa unahitaji kutengeneza utofauti wako na kuwaeleza wateja nini wakija kwako wanapata ambacho hawawezi kupata sehemu nyingine yoyote ile.

Angalia jinsi washindani wako wanafanya mambo yao, kisha wewe kuwa na njia bora zaidi ya kufanya ambayo inawapa wateja thamani kubwa, kisha hakikisha wateja wanajua kuhusu utofauti wako. Njia zote za masoko unazotumia zinapaswa kueleza utofauti wako na wengine, ili wateja washawishike kuja kwako na siyo kwenda kwa wengine.

Baadhi ya maeneo ambayo unaweza kujitofautisha kwenye biashara ni bei, huduma, ubora, upekee, uharaka, uhakika na mengine.

Njia bora ya kujitofautisha ni kuchagua eneo dogo (niche) ambalo utalihudumia vizuri zaidi kuliko kuhangaika na eneo kubwa. Hapa unachagua aina fulani ya wateja, wenye sifa za kipekee ambao utaweza kuwahudumia vizuri na kuachana na wateja wengine wote. Kuachana na wateja wengine huwa ni kitu kigumu kwa wafanyabiashara wengi, lakini unapaswa kukumbuka kwamba huwezi kuwaridhisha watu wote.

Tengeneza ujumbe unaobeba utofauti wako kibiashara na kila unapokutana au kuwasiliana na wateja hakikisha unawapa ujumbe huo. Ujumbe huu unapaswa kurudiwa rudiwa mara nyingi mpaka watu wauelewe na kuihusisha biashara yako na ule utofauti unaotengeneza. Yaani pale mteja anapotaka kitu cha tofauti na kinachomfaa yeye, basi anajua atakipata kwako

JUA UNAKOKWENDA.

Kama hujui unakokwenda, huwezi kufika na hata ukifika hutajua kama umefika. Hatua ya kwanza kuchukua ili kupata unachotaka ni kujua wapi unapokwenda.

Unapaswa kujua kwamba kila mtu kwenye maisha kuna kitu anauza, iwe upo kwenye biashara au ajira, hivyo jua ni nini unachouza na uweze kukiuza vizuri zaidi.

Zipo njia tatu za kukuwezesha kuuza zaidi, kupata wateja wapya, kuuza zaidi kwa wateja ulionao na kuwafanya wateja ulionao waje kununua mara nyingi zaidi.

Kama umeajiriwa, unauza muda wako, utaalamu wako na uzoefu wako kwa mwajiri wako. Na kitu kimoja ambacho kila mwajiri anapenda sana ni mtu ambaye anaweza kutatua matatizo na siyo anayesababisha matatizo.

Chochote unachochagua kufanya, hakikisha unakifanya kwa utofauti mkubwa na wengine wanavyokifanya. Usikubali kufanya kwa mazoea au kuiga kile ambacho wengine wanafanya.

Wape wateja wako urahisi wa kusema ndiyo kwa kile unachouza, kwa kutoa thamani kubwa sana ambayo hawawezi kuipata sehemu nyingine yoyote ile. Yaani unapaswa kutoa thamani kubwa kiasi kwamba mteja atajiona ni mjinga kujaribu kutafuta sehemu nyingine ya kununua.

TATIZO HUJUI UNACHOTAKA.

Pata picha, unataka kuwa na safari, unaondoka nyumbani umebeba mizigo yako na kuelekea kituo cha mabasi. Unakaribishwa na kuulizwa unaenda wapi, unasema popote basi linapokwenda. Je unafikiri basi hilo litakupeleka wapi?

Unaweza kushangaa na kujiuliza inawezekanaje mtu mwenye akili timamu aende kituo cha basi kwa ajili ya safari halafu hajui anakokwenda!

Kabla hujaendelea kushangaa, hebu jiulize kwanza maswali haya muhimu; unakwenda wapi na maisha yako? unakwenda wapi na biashara unayofanya? Unakwenda wapi na kazi uliyonayo? Unakwenda wapi na mahusiano uliyonayo?

Kwa maneno mengine, miaka 5, 10, 20 na zaidi ijayo unajiona wapi? Kama huwezi kutoa jibu moja kwamba unajiona wapi katika vipindi hivyo, kwa hakika huna tofauti na anayeenda kwenye kituo cha mabasi huku akiwa hajui anakwenda wapi.

Na hivi ndivyo watu wengi wanavyoendesha maisha yao, wanakazana sana kufanya chochote wanachofanya, lakini hawajui wanakwenda wapi, hivyo wanafanya leo kama walivyofanya jana, huku kesho ikiwa haipo kwenye mawazo yao kabisa.

Kama mpaka sasa maisha yako huyaelewi, kama umeshajaribu kazi na biashara nyingi lakini bado huoni matokeo mazuri, tatizo lako ni moja, hujui nini hasa unachotaka, hujui wapi hata unakotaka kufika.

Na kama hutachukua hatua ya kwanza muhimu ya kujua kwanza nini unachotaka na wapi unapotaka kufika, hutaweza kuwa na maisha bora. Kila siku utaishia kuyumbishwa kama bendera inayopeperushwa na upepo. Watu watakuja kwako na kila aina ya fursa mpya na utahangaika nazo, na hakuna hata moja itakayokusaidia kufanikiwa.

Jua kwanza ni nini hasa unachotaka, jua ni wapi unakotaka kufika, kisha weka juhudi zako zote katika kufika kule unakotaka kufika. Kuwa kiziwi na kipofu kwa vitu vingine vyote visivyohusiana na kile unachotaka. Usiwe mtu wa kukimbizana na kila aina ya fursa mpya, badala yake weka nguvu kubwa kufika kule unakotaka kufika.

Kujua unachotaka na kuweza kukipata, anza kwa kujiuliza maswali haya muhimu sana;

1. Mimi ni nani?
2. Ni nini ninachotaka?
3. Ni nini kinanipa furaha?
4. Nini hakinipi furaha?
5. Uimara wangu uko wapi?
6. Udhaifu wangu uko wapi?
7. Ni mchango gani mkubwa naweza kutoa kwa wengine kupitia maisha yangu, kazi yangu, biashara yangu na mahusiano yangu?

Ukijiuliza na kujipa majibu sahihi kwenye maswali hayo saba, na kufanyia kazi majibu hayo, utaweza kupata chochote unachotaka kwenye maisha yako.

JINSI YA KUPATA WAZO LA TOFAUTI NA WENGINE NA KUFANIKIWA

Katika kupata wazo bora, zingatia mambo yafuatayo;

Moja; anza na chochote unachojali sana.

Watu wengi wamekuwa wanafikiria kwamba ili uweze kuleta mabadiliko makubwa kwako na kwa wengine basi inabidi uwe na wazo kubwa na la kipekee sana. Wazo ambalo wengine hawajawahi kuwa nalo. Huo siyo ukweli, unaweza kuanza na wazo lolote na ukaweza kulijenga kwa utofauti na ukajitofautisha sana.

Anza na chochote unachojali, unachopenda, unachoamini, unachojua, ulichozoea au ambacho umesomea. Chochote kile ambacho unaona kinaweza kuwa bora zaidi ya kilivyo sasa, unaweza kukichukua kama wazo lako la kufanyia kazi.

Mbili; uliza maswali ambayo hayaulizwi.

Watu wamekuwa wanafanya mambo kwa mazoea kwa sababu wanafanya kile ambacho kila mtu anafanya, na hawathubutu kujaribu vitu vya tofauti. Sasa kwa wazo unalotaka kufanyia kazi kuliboresha zaidi, anza kwa kuuliza maswali ambayo watu wengine hawaulizi.

Maswali hayo yanaweza kuwa, vipi kama.... vipi kinyume cha... Hapa unajaribu kupata picha ya tofauti na wengi walivyozoea, kwa kuona upande wa pili wa vitu au kwa namna ya tofauti.

Tatu; angalia uzoefu wako binafsi.

Baada ya kujiuliza maswali ya tofauti kwenye wazo unalotaka kufanyia kazi, angalia uzoefu wako binafsi kwenye wazo hilo. Usijidharau kwa sababu labda huna elimu kubwa au uzoefu mkubwa kwenye jambo hilo. Labda siku za nyuma umewahi kujaribu kufanya tofauti na ukapata matokeo ya tofauti, hiyo inatosha kukuonesha kwamba kuna uwezekano wa kupata matokeo tofauti na ambayo watu wanapata sasa.

Nne; chagua eneo la ubobezi kwenye wazo lako.

Wazo unalokuwa nalo linaweza kuwa pana, sasa unahitaji kuchagua eneo ambalo utabobea kwenye wazo hilo ili kujitofautisha kabisa na wengine. Badala ya kutaka kufanya kila kitu, unachagua eneo moja ambalo utaweka muda na nguvu zako na kuweza kutengeneza ubobezi mkubwa. Ni kupitia ubobezi huu ndiyo unaweza kupiga hatua kubwa kwenye wazo hilo.

Tano; fanya utafiti.

Watu wengi wamekuwa wanapata mawazo mapya ya kuboresha zaidi, lakini hawanufaiki nayo kwa sababu huwa hawaweki kazi inayopaswa kuwekwa ili mtu kubobea kwenye kitu hicho. Moja ya kazi kubwa unayopaswa kuweka ni kufanya utafiti. Siyo kusoma tafiti, badala yake kufanya utafiti mpya, kwa kuangalia yale maeneo ambayo unataka yawe bora kisha kuja na njia bora za kuyaboresha kutoka kwenye tafiti mbalimbali zinazogusa wazo hilo.

Sita; unganisha mawazo.

Kuna maeneo mengine ambayo yameweza kupiga hatua kubwa, ambayo ni tofauti na wazo unalofanyia kazi wewe. hii haikuzuii wewe kujifunza kutoka maeneo hayo. Jifunze kupitia maeneo mbalimbali kwa hatua ambazo watu wameweza kupiga, kisha unganisha mawazo hayo na wazo unalofanyia kazi kuweza kuona jinsi gani ya kuboresha wazo unalofanyia kazi. Kumbuka misingi ya mafanikio kwenye kila eneo inafanana, hivyo kwa kuangalia jinsi ambavyo mawazo mengine yamefanikiwa, utaweza kufanikisha wazo lako pia.

Saba; tengeneza nguzo ya kubeba wazo lako jipya.

Baada ya kuchagua wazo unalotaka kuboresha, ukauliza maswali ya tofauti, ukatumia uzoefu wako, ukafanya utafiti na hata kujifunza kutoka maeneo mengine, unakuwa umejifunza mambo mengi sana kuhusiana na wazo lako jipya. Hapa unakuwa na maarifa na taarifa nyingi ambazo mtu mwingine siyo rahisi kuyaelewa. Hivyo ili wazo lako la kuboresha liweze kueleweka na kutumiwa na wengine, unahitaji kutengeneza nguzo ya kubeba wazo lako. Hapa unatengeneza mfumo unaobeba wazo lako jipya, kwa namna ambayo watu wengine wanaelewa jinsi linavyofanya kazi na matokeo ya tofauti yanavyopatikana.

Kwa hatua hizo saba, unakuwa umekamilisha wazo lako la tofauti, ambalo linaleta matokeo bora kuliko yale ambayo yamezoeleka. Baada ya hapo sasa unakwenda kwenye hatua ya pili ambayo ni kujenga wafuasi kwenye wazo lako.

TOKA KWENYE UMASKINI NA UTEGEMEZI KWA KUCHUKUA HATUA HIZI KUELEKEA UTAJIRI

HATUA YA KWANZA; TAMBUA ASILIMIA 95 HAWATAFANIKIWA.
Hatua ya kwanza ya kutoka kwenye umasikini na kuelekea kwenye utajiri ni kutambua kwamba asilimia95 ya watu hawatafanikiwa. Kwa maneno mengine ni kwamba utajiri siyo kwa kila mtu. Hata watu wote wangepewa fedha sawa au fursa sawa, bado mgawanyo utabaki vile vile, asilimia 5 watafanikiwa sana na asilimia 95 watakuwa na maisha magumu.
Na hili liko wazi ukiangalia kwenye jamii zetu. Mambo kama haya yapo wazi kabisa;
Ukianzia kwenye upande wa afya ya mwili, watu wengi wanakabiliwa na magonjwa sugu kama presha na kisukari, wengi hawapo kwenye afya nzuri inayowawezesha kujituma zaidi kwenye kazi zao.
Ukienda upande wa afya ya akili na roho, wengi wana msongo wa mawazo na sonona, hawawezi kuyakabili maisha yao bila ya kutumia dawa au vilevi vya kuwasahaulisha matatizo yao kwa muda.
Upande wa mahusiano nao una changamoto kubwa kwa wengi, ndoa nyingi zinavunjika na familia kusambaratika.
Kwenye fedha ndiyo mambo ni magumu zaidi. Wengi wapo kwenye madeni, kipato hakitoshelezi matumizi na hivyo wanaendelea kukopa, kitu ambacho kinawaumiza zaidi na kuwaweka kwenye umasikini mkubwa.
Ni muhimu sana utambue hali halisi na jinsi ambavyo wengi wanakwamba kwenye hali hiyo, ili wewe ukatae hali hiyo na kuweza kupiga hatua zaidi kwenye maisha yako.

HATUA YA PILI; TAMBUA CHANZO CHA WENGI KUBAKI KWENYE UMASIKINI.
Baada ya kukubali kwamba wengi hawatafanikiwa, hata kama kila kitu kitatolewa sawa kwa wote, hatua ya pili ni kutambua chanzo cha wengi kubaki kwenye umasikini.
Siyo bahati nzuri kwamba asilimia 5 pekee ndiyo wanaofanikiwa sana na siyo bahati mbaya kwamba asilimia 95 wanabaki kwenye umasikini mkubwa.
Kila kinachotokea kwenye maisha ya mtu kinasababishwa, na ili kubadili matokeo, unapaswa kubadili kwanza kisababishi.
Ili kuondoka kwenye kundi kubwa la wasiofanikiwa na kwenda kwenye kundi dogo la wanaofanikiwa, jua sababu hizi zinazowaweka watu kwenye umasikini na ondokana nazo mara moja.

1. Kuangalia nyuma badala ya mbele. Wale wanaoshindwa wanatumia muda wao mwingi kuangalia mambo ya nyuma kuliko pale walipo sasa na kule anakokwenda. Wamekuwa wanatumia matukio ya nyuma kama sababu ya wao kushindwa kupiga hatua zaidi. Wataeleza jinsi ambavyo walidhulumiwa, kuteswa au kunyanyaswa huko nyuma. Wataeleza jinsi ambavyo wamejaribu mambo mengi lakini wameshindwa. Kwa kuangalia zaidi nyuma kuliko mbele kunawafanya kuangalia kushindwa zaidi kuliko kufanikiwa.

HATUA YA KUCHUKUA; Acha kuangalia yale yaliyotokea nyuma na kuyatumia kama kisingizio au kikwazo kwako kupiga hatua. Chagua leo kuchukua hatua za tofauti ili kuitengeneza kesho iliyo bora kuliko leo.

2. Kukosa kusudi la maisha. Watu wengi wanaendesha maisha yao bila ya kusudi, hawajui nini wanachotaka kwenye maisha yao na wala hawajisukumi kufanya chochote kikubwa. Kwa kukosa kusudi wanajikuta wanakimbizana na kila kitu, mwisho wa siku wanachoka na hakuna hatua wanayokuwa wamepiga.

HATUA YA KUCHUKUA; Lijue kusudi la maisha yako na ishi kusudi hilo kila siku. Kadiri kusudi linavyokuwa kubwa ndivyo linavyokusukuma kuchukua hatua zaidi na hivyo kufanikiwa.

3. Kutenga madhara ya matukio. Watu wengi wanabaki kwenye umasikini kwa sababu hawana nidhamu. Mtu anapanga kufanya kitu fulani, lakini wakati wa kufanya unapofika hafanyi na anajipa sababu. Anachoamini ni kwamba asipofanya kitu mara moja hakuna madhara makubwa, atafanya siku nyingine. Asichojua ni kwamba kila tukio lina madhara kwenye maisha yake. Mfano mtu anapoacha kufanya kile alichopanga, hilo lina madhara makubwa kwake, anajichukulia kama mtu asiye makini na ni rahisi kurudia hilo kwenye maeneo mengine ya maisha yake.

HATUA YA KUCHUKUA; Tambua kila kinachotokea kwenye maisha yako kinaathiri maisha yako yote. Hivyo usijiruhusu kufanya kitu chochote ambacho hakiyaboreshi maisha yako.

4. Kukosa uwajibikaji. Watu wote waliofanikiwa wanajua uwajibikaji ni muhimu sana kwenye mafanikio yao. Ndiyo maana watu hao wana mamenta, makocha na washauri mbalimbali, hawa wanahakikisha watu hao wanatekeleza kile walichopanga. Lakini wasiofanikiwa hawapendi kabisa uwajibikaji, wao wanataka kuendesha maisha kama wanavyojisikia wenyewe. Bila ya uwajibikaji, hakuna hatua mtu anaweza kupiga.

HATUA YA KUCHUKUA; Jijengee uwajibikaji kwenye maisha yako. Chochote kikubwa unachopanga kufanya, kuwa na mtu ambaye unawajibika kwake, anaweza kuwa menta wako, kocha wako na hata watu wa karibu ambao wanajali kuhusu mafanikio yako. Waombe wakusimamie kweli ili utekeleze kila unachopanga.

5. Kuzungukwa na watu wa kawaida. Utafiti unaonesha kwamba maisha yako ni wastani wa watu watano wanaokuzunguka au unaotumia nao muda wako mwingi. Kinachowafanya watu wengi kubaki kwenye umasikini ni kuzungukwa na watu masikini. Unapozungukwa na watu masikini, fikra zako na hata matendo yako yanakuwa kama yao na hilo linapelekea ubaki kwenye umasikini.

HATU ZA KUCHUKUA; Chagua kwa umakini sana ni watu gani unaotaka kuzungukwa nao. Chagua kuzungukwa na watu ambao wameshafanikiwa au ambao wanapambana ili kufanikiwa. Epuka sana kuzungukwa na watu walioshindwa na kukata tamaa. Na wewe utakuwa kama wao.

6. Kutokujiendeleza binafsi. Watu wanaoshindwa huwa hawajiendelezi wao binafsi. Wakishahitimu masomo ndiyo basi, hawajisumbui tena kuendelea kujifunza hasa kusoma vitabu. Na hata wakisoma vitabu basi ni vya hadithi, na siyo vya kujifunza. Wale wanaofanikiwa wanaweka uzito mkubwa sana kwenye kujiendeleza wao binafsi. Wananunua na kusoma vitabu vinavyowafanya kuwa bora zaidi. Pia wanahudhuria mafunzo na semina mbalimbali zinazowafanya kuwa bora zaidi.

HATUA ZA KUCHUKUA; Uwekezaji wa kwanza na muhimu kufanya kwenye maisha yako ni kuwekeza ndani yako mwenyewe. Weka vipaumbele kwenye kujifunza mambo mapya na kuyafanyia kazi. Soma vitabu vya maendeleo binafsi, hudhuria mafunzo mbalimbali na kuwa na menta au kocha anayekusimamia kwa karibu.

7. Kukosa uharaka. Watu wengi hawapigi hatua kwenye maisha yao kwa sababu hawana ile hali ya uharaka wa kuchukua hatua kwenye jambo lolote. Ni watu wa kuahirisha mambo na kusubiri mpaka dakika za mwisho ndiyo wachukue hatua. Kwa kukosa hali hii ya uharaka wengi wamekuwa wanajichelewesha wao wenyewe kufanikiwa.

HATUA ZA KUCHUKUA; Jijengee hali ya uharaka kwenye maisha yako, chochote unachopanga kufanya, anza kufanya sasa. Kinachowezekana kufanyika leo kifanyike sasa na kisisubiri kesho. Ondokana kabisa na tabia ya kuahirisha mambo na utaweza kupiga hatua kubwa.
Rafiki, epuka sababu hizi saba ambazo zimewaweka wengi kwenye umasikini mkubwa. Huwezi kuondoka kwenye umasikini huo kama utaendelea kukumbatia sababu hizo.

HATUA YA TATU; CHORA MSTARI.
Baada ya kuzijua sababu ambazo zimekuweka kwenye umasikini kwa muda mrefu, sasa kuna hatua ya tatu ya kuchukua, ambayo ni kuchora mstari.
Kuchora mstari maana yake ni kufanya maamuzi kwamba kuanzia sasa mambo yako yote yanabadilika. Unaachana na mambo ya nyuma na kuanza maisha mapya ya kukufikisha kwenye mafanikio makubwa.
Maamuzi hayo unayafanya sasa na hatua unaanza kuzichukua sasa. Siyo baadaye, siyo kesho, siyo wiki ijayo, siyo mwezi ujao na wala siyo mwaka ujao. Ni leo, ni sasa. Kama hutachora mstari sasa hivi na kuanza kuishi maisha mapya, utaendelea kujichelewesha kufanikiwa.
Kataa kuwa wa kawaida, kataa kubaki kwenye umasikini na maisha magumu na chagua kufanikiwa na kufikia utajiri. Chagua kuziishi tabia ambazo zitayafanya maisha yako kuwa bora zaidi.
Usikubali kuendesha maisha yako kwa ukawaida, halafu unapofika ukingoni mwa maisha unagundua hukuishi maisha yako. Chagua leo kuyaishi maisha yako, chagua kuwa bora zaidi ya pale ulipo sasa. Yote yanawezekana na yapo ndani ya uwezo wako.

ACHA MAIGIZO KATIKA MAISHA YAKO, ISHI UHALISIA WAKO

Watu wanalalamika kwamba hawapati watu sahihi kwenye maisha yao, hawapati wenza sahihi, hawapati watu sahihi wa kushirikiana nao. Na hilo ni rahisi kupata sababu, ambayo ni kila mtu kuwa kwenye maigizo wakati wa kuanza. Na kwa kuwa tunajua maigizo huwa hayadumu muda mrefu, basi muda unapokwenda, rangi halisi za watu zinaonekana na watu kufikiri wenzao wamebadilika. Watu huwa hawabadiliki, ila wanajionesha, wanachoka kuigiza na mambo yanabaki wazi.

Acha kuigiza, acha kuishi maisha ya wengine, ishi maisha yako, ishi uhalisia wako, fanya kile chenye maana kwako, kile ambacho unakiamini kweli, kile ambacho upo tayari kukifanya hata kama hakuna anayekuangalia, hakuna anayekusifia, na kwa njia hii utakuwa na maisha yenye furaha, na pia utawavutia watu sahihi kwa kuwa kile unachoonesha ndicho kilicho ndani yako.

Na kwa kumalizia, waigizaji huwa wanavutia waigizaji, ukianza kuwa halisi, waigizaji wote wanakukimbia, kwa sababu hawataweza kuvumilia ule uhalisi wako.