UONGO TUNAOJIAMBIA KUHUSU MAFANIKIO NA KWA NINI HATUPENDI KUBADILIKA.

 Mwandishi anasema yapo mambo ambayo tumekuwa tunajidanganya sana kwenye mafanikio, na haya ndiyo yamekuwa yanachochea matatizo mengi tunayokutana nayo kwenye maisha. Baadhi ya mambo tunayojidanganya kwenye mafanikio ni haya; Tunajikadiria zaidi kwenye mchango wetu kwa mafanikio ya kile tunachofanya. Tunafikiri bila sisi mafanikio yasingepatikana, huku ni kujidanganya. Tunachukua sifa ambazo hatustahili kuchukua, kazi wamefanya wengine lakini wewe kama kiongozi ndiye unayetaka upewe sifa. Huwa tunajiona tuna ujuzi wa juu kuliko wale wanaotuzunguka. Huwa tunapuuza muda na gharama ambazo tumeshapoteza kwenye miradi ambayo haizalishi. Kukuza matarajio ya mafanikio ya mradi, kuwa na mategemeo makubwa kuliko uhalisia. Uongo huu ambao tumekuwa tunajiambia, hasa tunapokuwa viongozi kwenye kazi au biashara, unaathiri mahusiano yetu na wale walio chini yetu. Uongo huu unakuwa umetokana na mafanikio ambayo tunakuwa tumeyapata huko nyuma. Tunapopata mafanikio kidogo, huwa tunajiamini zaidi ya uhalisia. Kujiamini huku kulikopitiliza ndiyo kunawaingiza wengi kwenye matatizo na kuwazuia kufanikiwa zaidi.

WATU WANAOKUZUNGUKA WANA MCHANGO MKUBWA SANA KATIKA KUPATA CHOCHOTE UNACHOTAKA

Watu wanaokuzunguka wana nguvu kubwa sana kwako, hata kama hujui. Watu hao, hasa wale wa karibu, wana ushawishi mkubwa kwako. Kama wanaokuzunguka wana mtazamo hasi wa kuona mambo hayawezekani, na wewe pia utajikuta umebeba mtazamo huo, hata kama utakuwa unapingana nao kiasi gani.

 

Na kama watu wanaokuzunguka wana mtazamo chanya wa inawezekana, na wewe pia utabeba mtazamo huo. Nguvu hii ya wanaokuzunguka ni nguvu kubwa sana unayopaswa kuwa nayo makini. Wengi wamekuwa wanapuuza nguvu hii, wakiamini wanaweza kuzungukwa na watu wa aina yoyote lakini wakafanikiwa. Hicho kitu hakipo kabisa, kama haujazungukwa na watu sahihi, huwezi kufanikiwa. Ni asili ya binadamu, hatuwezi kwenda juu zaidi ya wale ambao wanatuzunguka.

 

Hivyo ili kupata kile unachotaka kwenye maisha, tafuta watu wanapiga hatua kwenye maisha yao na uwe nao karibu. Watu ambao wanaamini kwenye ndoto kubwa na wasiokata tamaa. Watu hawa watakupa nguvu ya kuendelea hata pale unapokutana na magumu na changamoto.

FURAHA HAIPATIKANI KWENYE MATOKEO , BALI IPO KWENYE MCHAKATO.

Kama unaitafuta furaha kwenye maisha, tayari umeshapotea, kwa sababu unatafuta kitu ambacho hakipatikani. Furaha haipo mwisho wa safari, bali ipo kwenye safari yenyewe. Furaha haipatikani mwishoni, bali katika ufanyaji wenyewe.

 

Ndiyo maana nakuambia furaha ndiyo njia yenyewe, hakuna njia ya kukupeleka kwenye furaha.

 

Mtu anajiambia nikipata kazi nitakuwa na furaha, anaipata na haioni furaha, anajiambia nikipanda cheo nitapata furaha, anapanda cheo hapati furaha, anajiambia tena nikiwa bosi nitakuwa na furaha, anakuwa bosi na haioni furaha. Mtu huyu haoni furaha kwa sababu anaangalia sehemu ambayo siyo sahihi. Furaha haipo kwenye matokeo bali ipo kwenye mchakato. Hivyo kama mtu huyo anataka furaha, basi inapaswa kutoka kwenye kazi zake za kila siku, na siyo matokeo ya mwisho ya kazi zake.

JINSI YA KUOKOA MUDA UNAOPOTEZA KILA SIKU NA OKOA MASAA MAWILI YA ZIADA KILA SIKU.

Kila mtu ana masaa 24 kwa siku ila kuna wanaofanikiwa sana na kuna ambao wanaishia kulalamika kwamba hawana muda. Kama una jambo ambalo ni muhimu kwako lazima utapata muda wa kulifanya. Tumia njia hizi hapa chini kuokoa muda unaopoteza kila siku na uanze kuwekeza kwenye maisha yako.

  Hebu fikiria unaambiwa ujisomee kila siku, ufanye mazoezi, ufanye  meditation, utenge muda wa kuweka mipango yako kwa siku, upate muda wa kupitia mipango yako, upate muda wa kupumzika na pia upate muda kwa ajili ya wale unaowapenda na wanaokupenda. Kwa mambo hayo tu tayari siku imeisha na bado hujaweka muda wa kufanya kazi na muda wa kulala.
 
  Kwa muda mfupi tulio nao ni vigumu sana kufanya mambo yote hayo kila siku. Unaweza kujiaminisha hivyo ila ni uongo mkubwa sana ambao umekuwa unajidanganya kila siku.
  Ili uache visingizio visivyo na maana leo ninakupa njia ya kupata masaa mawili ya ziada kila siku ambapo unaweza kufanya mambo hayo ambayo yatabadili maisha yako na kuwa bora zaidi.

  Kwanza hebu tuangalie muda wetu kwa siku. Kila binadamu ana masaa 24 kwenye siku moja. Wapo wengi ambao wameyagawa masaa yao kwa masaa nane ya kulala, nane ya kazi na nane ya kupumzika. Kwa vyovyote ulivyoyagawa wewe haijalishi, ila unaweza kuokoa masaa mawili ili kufanya mambo yako.

  Ili kupata masaa mawili ya ziada kila siku fanya mambo yafuatayo;
1. Amka nusu saa kabla ya muda uliozoea kuamka kila siku. Utumie muda huo kufanya jambo lenye manufaa kwenye maisha yako kama kujisomea au kuweka MALENGO   NA  MIPANGO. Na ili uweze kuamka nusu saa kabla ni vyema ulale mapema na ulale usingizi mzuri.

2. Punguza nusu ya muda unaotumia kusikiliza redio, kuangalia tv na kuangalia filamu. Asilimia 80 ya vipindi unavyofuatilia kwenye tv au redio havina msaada wowote kwenye malengo yako ya maisha. Asilimia kubwa ya taarifa zinazokushtua kila siku sio za kweli au zimeongezwa chumvi mno. Hivyo punguza muda huu unaotumia kwenye vyombo vya habari na uutumie kubadili maisha yako.

3. Punguza muda unaotumia kwenye mitandao ya kijamii hasa facebook na twitter. Mitandao hii ina ulevi fulani, unaweza kusema unaingia kuchungulia ujue ni nini kinaendelea ila ukajikuta saa nzima unashusha tu kuangalia zaidi. Na asilimia 90 ya unayofuatilia kwenye mitandao hii hayana msaada kwenye maisha yako. Tenga muda maalumu kwa siku wa kutembelea mitandao hii ili kujua nini kinaendelea.

4. Zima simu yako au iweke kwenye hali ya kimya kabisa(wala isitetemeshe). Hapa najua utanipinga sana na unaweza kudhani nimechanganyikiwa. Tumehamishia fikra zetu kwenye mawasiliano hasa ya simu. Mtu unakaa na simu ikiita kidogo tu unakimbilia kujibu bila ya kujali ni kitu gani cha muhimu unafanya. Inaingia meseji ambayo haina hata maana ila inakuhamisha kutoka kwenye jambo la muhimu unalofanya. Najua una madili mengi yanayokuhitaji kupatikana kwenye simu ila kuiweka simu yako mahali ambapo huwezi kuiona kwa masaa mawili kwa siku haiwezi kukupotezea dili lolote. Muda ambao unafanya kazi inayokuhitaji ufikiri sana na uwe na utulivu hakikisha simu yako haiwezi kukuondoa kwenye kazi hiyo. Hivyo izime au iwe kimya kabisa na iwe mbali.

JIWEKE KWENYE VIATU VYA MWINGINE HUTAKUWA NA SABABU YA KUUMIZWA NA CHOCHOTE TOKA KWA WENGINE

Njia ya kuondokana na msongo na kupata utulivu kwenye maisha yako ni kujiweka kwenye viatu vya wengine, kukaa kwenye nafasi ya mwingine ili kuweza kuelewa kwa nini mtu amefanya kile ambacho amefanya.

Chanzo kikubwa cha hasira, msongo na hata migogoro kwenye maisha yetu ni mahusiano yetu na wengine. Pale wengine wanapofanya vitu ambavyo hatukutegemea wafanye, tunapatwa na hasira na msongo. Tunaona kama wamefanya kwa makusudi au wamepanga kutuumiza kwa namna fulani.

Lakini mara nyingi sana watu wanafanya vitu kwa nia njema, hasa kwa upande wao. Ni wachache sana ambao wanafanya kitu kwa makusudi ili kumuumiza mtu mwingine. Ukitaka kuelewa kwa nini mtu amefanya kile alichofanya, jaribu kwanza kujiweka kwenye nafasi yake.

Kila mtu huwa ana sababu nzuri ya kufanya kile ambacho amefanya, iwe ni kizuri au kibaya kwako. Ukichukua nafasi ya kuelewa sababu hiyo, hasa kwa kujiweka kwenye nafasi yako, utagundua huna sababu ya kuwa na hasira au msongo. Kwa sababu huenda na wewe ungekuwa kwenye nafasi kama yake ungefanya kama alivyofanya yeye.

Tambua kwamba watu wana mitazamo tofauti, vipaumbele tofauti, uelewa tofauti na hata imani tofauti. Ukichukua nafasi ya kuelewa hayo kuhusu wengine, utaona huna sababu ya kuumizwa na chochote ambacho wengine wanafanya.

BADILI MPANGILIO WA VIPAUMBELE PALE MAMBO YANAPOKWENDA TOFAUTI.

Njia ya kuondokana na msongo na kuwa na utulivu kwenye maisha yako ni kubadili mpangilio wa vipaumbele vyako kulingana na mazingira unayojikuta upo. Kila mmoja wetu ana mpangilio wake wa vipaumbele, na tunapenda mpangilio huo uende hivyo bila ya kubadilika. Inapotokea hali inayobadili mpangilio huo tunapatwa msongo na kuona hatuna udhibiti wa maisha yetu.

Hatua bora za kuchukua hapa ni kubadili mpangilio wa vipaumbele vyako. Mfano inawezekana familia kwako ni kipaumbele cha kwanza, kazi au biashara ni kipaumbele cha pili. Sasa unajikuta kwenye kazi au biashara ambayo inataka muda wako mwingi na kukunyima muda wa kukaa na familia, ambayo ndiyo kipaumbele cha kwanza. Hali hii inaweza kukuletea msongo mkubwa na kukosa utulivu, kwa sababu vipaumbele vyako vinavurugwa. Lakini unaweza kuchukua hatua ya kubadili mpangilio wa vipaumbele vyako kulingana na hali uliyonayo. Kwa kipindi fulani kuweka kipaumbele cha kwanza kuwa kazi au biashara kabla ya familia, na baada ya kujijengea msingi mzuri ukarudi kwenye vipaumbele vyako vya awali.

Hilo pia linakwenda kwa vipaumbele vingine kwenye maisha, mfano kama umekuwa unapendelea kufanya kazi mwenyewe, lakini ukajikuta kwenye kazi inayokutaka ushirikiano na wengine, kama hutabadili kipaumbele kuwa kufanya kazi na wengine utakuwa na msongo kipindi chote cha kazi. Kadhalika kwenye mahusiano na maeneo mengine ya maisha, pale mazingira yanapobadilika au unapokutana na uhitaji tofauti, kuwa tayari kubadili vipaumbele vyako.

Unapobadili vipaumbele kulingana na mazingira au hali inapobadilika, unakuwa tayari kutumia kila hali unayokutana nayo badala ya kupambana nayo.

KUWA KING"ANG"ANIZI NA MVUMILIVU UTAFANIKWA SANA.

Kila kitabu kinachohusu mafanikio kinasisitiza sana ung’ang’anizi na uvumilivu ili kuweza kufanikiwa. Lakini siyo kila ung’ang’anizi na uvumilivu utakufikisha kwenye mafanikio. Bali unahitaji ung’ang’anizi sahihi, na kukubali pale ambapo umekosea ili kuboresha zaidi.

Tunapaswa kuwa ving’ang’anizi ili kupata utajiri na mafanikio, tunapaswa kujaribu tena na tena na tena kila tunaposhindwa. Lakini tunapaswa kukumbuka kwamba kufanya jambo lile lile kwa njia ile ile halafu kutegemea kupata matokeo tofauti ni maana sahihi ya ujinga.

Tunapaswa kung’ang’ana kwa njia sahihi, tunapaswa kubadili njia tunazotumia, ambacho hatupaswi kubadili ni lengo ambalo tumejiweka. Tunapaswa kuendelea na mapambano mpaka pale tutakapopata tunachotaka.

Wote tunajua jinsi ambavyo dunia ina uangalifu, haikubali kutoa kitu kwa mtu ambaye hajaonesha kweli anakitaka na yupo tayari kulipa gharama kukipata. Jioneshe kwamba wewe unautaka utajiri kweli, kuwa tayari kulipa gharama na ng’ang’ana kwa njia sahihi na utapata unachotaka.

JIAMINI WEWE MWENYEWE.

Kama hujiamini wewe mwenyewe, hakuna yeyote anayeweza kukuamini na hutaweza kufanikiwa kwenye jambo lolote maishani mwako.

Unapaswa kujiamini wewe mwenyewe, unapaswa kuamini kwamba una uwezo mkubwa ndani yako wa kukuwezesha kupata chochote unachotaka, unapaswa kuamini hakuna kinachoweza kukuzuia kupata kile unachotaka. Tunaambiwa imani inaweza kuihamisha milima, na hii ndiyo imani unayopaswa kuwa nayo ili kufanikiwa na kufikia utajiri.

Katika safari yako ya kusaka utajiri utakutana na vikwazo vya kila aina, utapatwa na hofu nyingi, wapo watakaokukatisha tamaa kwa kukupa mifano ya wengi walioshindwa. Kitu pekee kinachoweza kukuvusha kwenye hali hizo ni kujiamini wewe mwenyewe.

Pia hakuna utakachopanga na kikaenda kama ulivyopanga, utashindwa kwenye mambo mengi licha ya kufanya kila unachopaswa kufanya. Kujiamini ndiyo kutakupa nguvu ya kuamka kila unapoanguka ili uweze kuendelea na safari ya mafanikio.

Jiamini wewe mwenyewe na hakuna kitakachoweza kukuzuia kufanikiwa.

AMINI SAUTI YAKO YA NDANI.

Kila mmoja wetu ana sauti iliyopo ndani yake, hisia fulani unazozipata ambazo huwezi kuzielezea, ambazo zinakuashiria kama kitu ni kibaya au kizuri, kama ni sahihi au siyo sahihi. Mara nyingi huwa tunapuuza sauti hii na matokeo yake tunafanya makosa makubwa. Kuna wakati ndani yako unapata msukumo wa kufanya au kutokufanya kitu, lakini ushawishi wa nje unakufanya uende kinyume na sauti hiyo na unakuja kugundua ungejisikiliza ungekuwa sahihi zaidi.

Jifunze kuamini sauti yako ya ndani, hata kama inaendana na uhalisia wa nje. Kuna kitu kwa nje kinaweza kuonekana ni sahihi, lakini sauti yako ya ndani ikakuambia siyo sahihi, au kitu kwa nje kikaonekana siyo sahihi, lakini sauti yako ya ndani ikakuambia ni sahihi. Jifunze kusikiliza sauti yako ya ndani, inajua zaidi kuliko wewe na itakuongoza kwa usahihi mara zote.

Watu wote ambao wamefikia utajiri na mafanikio makubwa, kuna hatua ambazo wamewahi kuzichukua, ambazo watu wa nje waliwaambia wanakosea, lakini wao walifanya, kwa sababu sauti ya ndani iliwaambia ndiyo kitu sahihi kufanya.

Unapojikuta njia panda na hujui hatua ipi sahihi kuchukua, isikilize sauti yako ya ndani, inajua njia sahihi na utaweza kufanya kilicho sahihi.

SIKILIZA NA JIFUNZE.

Kusikiliza ndiyo silaha yenye nguvu sana katika safari ya mafanikio. Ukiwa msikilizaji mzuri, utajifunza mambo mengi sana kwa watu wengine. Kuanzia wale unaofanya nao kazi na hata wale ambao inabidi upatane nao kwenye makubaliano mbalimbali.

Kusikiliza ni kugumu sana, na wengi hawawezi kusikiliza kwa umakini ndiyo maana hawajifunzi, hawajui watu wanataka nini na kuweza kuwapatia. Ukiwa mtu wa kusikiliza kwa umakini, kwa lengo la kuelewa na kujifunza, utajua mengi na pia utazijua tabia za watu, ambazo utaweza kuzitumia kwa mafanikio zaidi.

Ukiwasikiliza wateja wako utayajua mahitaji yao hata kama hawajakuambia wazi na kuweza kuwatimizia. Ukiwasikiliza wafanyakazi wako utajua kinachowahamasisha na ukiwapatia watajituma zaidi. Ukiwasikiliza unaotaka kufikia nao makubaliano, utajia udhaifu wao uko wapi na kuweza kuutumia.

Katika safari ya mafanikio na utajiri, kusikiliza na kujifunza ni hitaji muhimu sana. Hata watu wanawaheshimu sana wale ambao wanachukua muda na kusikiliza. Tumia nguvu hii kwa manufaa yako na ya wengine pia.

KUWA NA VYANZO VINGI VYA KIPATO.

Chanzo kimoja cha kipato ni utumwa, iwe ni kazi au biashara, huwezi kutajirika kwa kutegemea chanzo kimoja pekee. Angalia matajiri wote wakubwa, hakuna hata mmoja ambaye anategemea chanzo kimoja pekee cha kipato.

Kila biashara huwa ina changamoto zake, hakuna biashara ambayo inafanya vizuri wakati wote, kila biashara kuna kipindi inafanya vizuri na kipindi kingine inafanya vibaya. Unapotegemea biashara moja pekee, kila wakati utakuwa kwenye kupanda au kushuka.

Dawa ya kuondoa hali hiyo ya kupanda na kushuka ni kuwa na vyanzo vingi vya kipato, na ambavyo havitegemeani. Hivyo unapokuwa na changamoto eneo moja, eneo jingine linakuwa linaenda vizuri.

Kanuni hii haiwahusu wale wanaoanza, unapokuwa unaanza, anza na kitu kimoja na kiwekee msingi imara wa kuweza kujiendesha chenyewe. Baada ya kuhakikisha kitu cha kwanza kimekuwa imara, hapo sasa unaweza kuanzisha kitu kingine. Kuanza vitu vingi kwa wakati mmoja ni njia ya uhakika ya kushindwa.

UKWELI KUHUSU UTAJIRI.

Wengi wanapoingia kwenye safari hii ya utajiri, huwa wanaona mambo mazuri tu mbele, kwamba wakishapata utajiri maisha yatakuwa mazuri na watakuwa na furaha.

Felix anatupa ukweli kuhusu utajiri, kupitia maisha yake binafsi, ili tuelewe ni kitu gani tunakwenda kukutana nacho mbele, na tujiandae vizuri.

Kwanza kabisa anasema utajiri haujawahi kumletea yeye furaha, zaidi umemletea matatizo makubwa ya kiafya baada ya kujihusisha na ulevi, madawa ya kulevya na uzinzi.

Pili anasema utajiri unakufanya uwe chambo ambapo kila mtu atatumia kila njia kupata fedha zako. Wapo watakaotumia njia za kuomba, wengine kuiba na hata wengine kukushitaki kwa kitu ambacho hujafanya.

Tatu utajiri utaharibu mahusiano mengi uliyonayo. Mahusiano ya ndoa, kwa wengi yanaathirika sana. mahusiano ya kifamilia na kindugu nayo yanaathiriwa sana na safari yako ya utajiri na hata baada ya kufikia utajiri.

Kwa kifupi kadiri unavyokuwa tajiri siyo kwamba matatizo uliyonayo yanaondoka, bali yanakuwa makubwa zaidi. Hivyo jiandae kukabiliana nayo, na kazana kujijengea busara zaidi kadiri unavyoendelea kutajirika. Kwa sababu utajiri bila busara utakuwa ni kujichimbia kaburi lako mapema.

JE, NI KWELI WALIOFANIKIWA WANA BAHATI ?

Felix Dennis katika kitabu chake anatuambia ni kweli kwamba watu waliofanikiwa wana bahati kuliko wale ambao hawajafanikiwa. Lakini kitu tunachopaswa kujua ni hiki, bahati hazikuwafuata vitandani kwao wakiwa wamelala. Bali walikutana na bahati katika mapambano yao.

Hivyo ili ufanikiwe unahitaji kupata bahati, lakini bahati hiyo haitakutafuta wewe, itabidi uitafute wewe. Lazima uweke kazi, lazima ujitume sana, na katika kujituma kwako ndiyo utakutana na fursa ambazo wengine hawawezi kuzitumia kwa sababu hawana maandalizi kama uliyonayo wewe.

Hivyo tunajumuisha kwa kusema, bahati ni pale maandalizi yanapokutana na fikra. Kama unataka bahati zaidi, hakikisha unakuwa na maandalizi bora zaidi.

KWA KUFANYA MACHAGUO HAYA TUTAWEZA KUDHIBITI MAISHA YETU.

1. Kuwa wewe, usiwe wao.

 

2. Fanya zaidi, tarajia kidogo.

 

3. Kuwa chanya, usiwe hasi.

 

4. Kuwa suluhisho, usiwe tatizo.

 

5. Kuwa mwanzilishi, usiwe mkwamishaji.

 

6. Hoji zaidi, amini kidogo.

 

7. Kuwa mtu fulani, usiwe mtu yeyote.

 

8. Penda zaidi, chukia kidogo.

 

9. Toa zaidi, pokea kidogo.

 

10. Ona zaidi, angalia kidogo.

 

11. Weka akiba zaidi, kuwa na matumizi kidogo.

 

12. Sikiliza zaidi, ongea kidogo.

 

13. Tembea zaidi, kaa kidogo.

 

14. Soma zaidi, angalia kidogo.

 

15. Jenga zaidi, bomoa kidogo.

 

16. Sifia zaidi, kosoa kidogo.

 

17. Safisha zaidi, chafua kidogo.

 

18. Ishi zaidi, usiwe upo upo tu.

 

19. Kuwa majibu, usiwe maswali.

 

20. Kuwa mpenzi, usiwe adui.

 

21. Kuwa mtuliza maumivu, usiwe mtoa maumivu.

 

22. Fikiri zaidi, itikia kidogo.

 

23. Kuwa wa tofauti, usiwe wa kawaida.

JINSI YA KUKABILI HOFU ( FEAR COMPLEX ).

Hofu ni kama magugu shambani, huwa yanaanza kidogo kidogo na yasipodhibitiwa yakiwa madogo, baadaye yanakuwa makubwa na kuharibu kabisa mazao.

Kadhalika, hofu huanza kidogo kidogo ndani yetu, lakini zisipodhibitiwa zikiwa ndogo, zinakua na kuzaliana kiasi cha mtu kushindwa kuchukua hatua kabisa.

Hivyo pale unapokuwa na hofu ya kufanya kitu, unapaswa kuanza kukifanya hapo hapo ili kuidhibiti hofu hiyo. Kwa sababu njia pekee ya kuishinda hofu ni kufanya kile unachohofia.

Unapofanya, unagundua vitu vingi ulivyokuwa unahofia havijatokea. Mara nyingi hofu ni hadithi tunayojielezea sisi wenyewe kwenye vichwa vyetu, ambayo siyo ya kweli.

Jiwekee utaratibu wa unapopata hofu ya kufanya kitu, basi unakifanya hapo hapo bila ya kusubiri. Mfano kuna mtu unataka kumuuliza kitu, lakini unapata hofu atakuchukuliaje, hapo hapo muulize mtu huyo kitu unachotaka kuuliza na utashangaa utakavyopata majibu bora kabisa. Na hata kama hutapata majibu unayotarajia, bado hakuna madhara yoyote unayokuwa umeyapata.

Ni wakati sasa wa kuacha kujidanganya na kuwa watu wa kuchukua hatua kwa kila tunachokutana nacho na tukakihofia.

Dawa ya hofu ni kuikabili ikiwa ndogo kabla haijaota mizizi na kuwa sugu.

ENEO LA KAZI : Ulipo Sasa, Unakotaka Kufika, Viwango Vya Kujiwekea , Kitabu Cha Kusoma.

Kazi au biashara unayofanya ni eneo muhimu sana la maisha yako. Hili ni eneo ambalo unapaswa kuwa unakua kadiri muda unavyokwenda. Kwa sababu kubaki pale pale, ni kurudi nyuma. Katika kazi au biashara unayofanya, lazima uweze kupima ukuaji wako.

ULIPO SASA; unaielezeaje kazi? Je unafurahia kazi au biashara unayoifanya? Je unajiona kuwa kwenye nafasi ya kufanikiwa kupitia kazi au biashara unayofanya. Je unakua kwa kiasi gani ukijipima kikazi na kibiashara?

UNAKOTAKA KUFIKA; ni ubobezi gani unajiona kuwa nao kwenye kazi unayofanya? Ni mabadiliko gani ungependa kuleta kupitia kazi au biashara unayofanya. Kuwa na picha ya mchango wako mkubwa na mabadiliko unayotaka kuleta na ifanyie kazi kila siku.

VIWANGO VYA KUJIWEKEA; jiunge na kundi la kitaalamu kulingana na taaluma au ujuzi ulionao. Shiriki mikutano na mafunzo mbalimbali yanayoendana na taaluma na ujuzi ulionao. Pia jipime jinsi unavyokua kupitia kazi au biashara unayofanya.

KITABU CHA KUSOMA; kitabu ORIGINALS cha Adam Grant ni kitabu kitakachokuwezesha kuwa na ubunifu mkubwa kwenye kazi yako na kufikiria nje ya boksi, kuuza mawazo yako na kuleta mapinduzi.

ENEO LA MAZINGIRA : Ulipo Sasa, Unakotaka Kufika, Viwango Vya Kujiwekea, Kitabu Cha Kusoma.

Mazingira yako yana mchango mkubwa sana kwenye mafanikio yako. Kuanzia nyumbani kwako, gari lako, eneo lako la kazi au biashara na eneo lolote ambalo unakuwepo unaposafiri.
ULIPO SASA; ni katika mazingira gani unajisikia furaha? Je umeridhika na pale unapoishi sasa na jinsi unavyoishi? Je unaamini unastahili kuwa na mazingira bora na ya kifahari, kuanzia nyumbani mpaka kwenye kazi zako?

UNAKOTAKA KUFIKA; tengeneza picha ya mazingira bora kwako, kuanzia nyumbani, kazini na popote unapokuwa. Kama usingekuwa na kikwazo chochote, hasa kifedha, ungeishi nyumba ya aina gani, ungeendesha gari ya aina gani na eneo lako la kazi lingekuwaje? Beba picha hii kila siku ya maisha yako na ifanyie kazi kuifikia.
VIWANGO VYA KUJIWEKEA; yafanye mazingira yako kuwa safi na yanayokupa hamasa zaidi. Fanya chumba chako kuwa safi, nyumba safi, mazingira masafi na hata eneo lako la kazi liwe safi na vitu vipangiliwe kiasi cha kuwa rahisi kupata chochote unachotaka kutumia.
KITABU CHA KUSOMA; soma kitabu kinachoitwa THE MAGIC OF THINKING BIG kilichoandikwa na David Schwarrz. Kitabu hiki kitakusukuma kuboresha maisha yako na kuwa na ndoto kubwa kuhusu nyumbani kwako, ofisini kwako na mengine mengi.

ENEO LA SAFARI : Ulipo Sasa, Unakotaka Kufika, Viwango Vya Kujiwekea, Kitabu Cha Kusoma.

Safari mbalimbali za kujifunza na kubadili mazingira ni muhimu sana kwa mafanikio yako. Unapotoka pale ulipozoea na kwenda maeneo mengine, unajifunza zaidi na hata kupata mtazamo wa tofauti na ule uliozoea.

ULIPO SASA; unapofikiria kuhusu safari, ni picha gani unaipata kwenye akili yako. Je unaamini unahitaji kujipanga sana na kuwa na fedha nyingi ndiyo uweze kusafiri? Je unaona hakuna kipya cha kujifunza katika kusafiri bali kujichosha tu?

UNAKOTAKA KUFIKA; pata picha ya wale ambao unaona wana safari na burudani, kisha jione na wewe ukiwa na safari na burudani kwenye maisha yako. Ni maeneo gani ambayo ungependa kutembelea kwa ajili ya kujifunza na hata kupata burudani? Orodhesha maeneo yote ambayo unasukumwa sana kuyatembelea ili kujifunza zaidi na ifanye hii kuwa ndoto unayoifanyia kazi.

VIWANGO VYA KUJIWEKEA; jiwekee viwango vya safari utakazofanya kwa mwaka na hata mapumziko ambayo utayachukua kwenye kazi au biashara yako. Panga kusafiri na kujifunza zaidi kupitia tamaduni za wengine.

KITABU CHA KUSOMA; soma kitabu kinachoitwa LOSING MY VIRGINITY kilichoandikwa na Richard Branson. Kitabu hiki kitakupa hamasa ya kuishi maisha bora kwa kuwa na safari matukio ya burudani wakati unafanyia kazi ndoto zako.

ENEO LA UBUNIFU :Ulipo Sasa, Unakotaka Kufika, Viwango vya Kujiwekea, Kitabu Cha Kujisomea.

Unapaswa kuwa na kitu cha kibunifu unachofanya kwenye maisha yako. Kitu hiki kinachochea akili yako kufikiri zaidi na kukuwezesha kukua zaidi. Inaweza kuwa uandishi, uchoraji, uimbaji, upigaji vifaa vya muziki, uigizaji na kadhalika.
ULIPO SASA; je unaamini kwamba wewe ni mbunifu? Je kuna mtu mbunifu ambaye unapenda sana kuwa kama yeye? Ni mambo gani ya kibunifu ambayo unafanya sasa kwenye maisha yako? Je ni vipaji gani ulivyonavyo na unavitumiaje?

UNAKOTAKA KUFIKA; ni ubunifu gani ambao ungependa kuwa nao na kubobea zaidi siku zijazo? Ni jinsi gani unaweza kutumia ubunifu huo kuwasaidia wengine zaidi. Chagua ubunifu unayotaka kuwa nao na jiendeleze kila siku na kutoa mchango kwa wengine.
VIWANGO VYA KUJIWEKEA; chagua aina ya ubunifu ambao utakuwa unajihusisha nao na kila siku tenga muda wa kujiendeleza kwenye ubunifu huo. Unaweza pia kujiunga na wengine au kushiriki madarasa yanayokuwezesha kukuza zaidi ubunifu wako.
KITABU CHA KUSOMA; soma kitabu THE WAR OF ART cha Steeven Pressfield ambacho kitaamsha na kuchochea ubunifu uliopo ndani yako na kuweza kufanya kazi za kibunifu.

ENEO LA FAMILIA :Ulipo Sasa, Unakotaka Kufika, Viwango vya Kujiwekea, Kitabu cha Kusoma.

Familia yako ni mahusiano ambayo ni muhimu sana kwenye maisha yako. Haya ni mahusiano ambayo yana mchango mkubwa sana kwenye mlinganyo wako wa mafanikio. Kadiri mafanikio haya yanavyokuwa bora, ndivyo unavyokuwa bora.

ULIPO SASA; je unafurahia kurudi nyumbani baada ya siku yako ya kazi kuisha? Je unajua lipi jukumu lako kuu kwenye familia? Na je familia kwako ni watu gani? Unaamini familia ni mzigo kwako au kichocheo kwako kufanikiwa?

UNAKOTAKA KUFIKA; pata picha ya familia bora kwako, inawahusisha watu gani, mahusiano yapoje na kila mtu ana mchango gani kwenye familia hiyo? Weka juhudi katika kujenga familia hii bora kwako na siyo kuishi kwenye familia usiyoifurahia.

VIWANGO VYA KUJIWEKEA; weka lengo la kutenga muda wa kufanya mambo ya kifamilia. Tenga muda wa kuwa pamoja na familia, mfano mzuri ni kuwa na chakula cha pamoja, kutoka pamoja au kwenda kutembelea ndugu na jamaa kama familia. Haya yanaimarisha mahusiano ya kifamilia.

KITABU CHA KUSOMA; kitabu MASTERY OF LOVE cha Don Miguel Ruiz kitakupa msingi mkuu wa mafanikio kwenye familia ambao ni upendo.