UNAPOJIANDAA KUUMIZA WENGINE , JIANDAE KUJIUMIZA WEWE MWENYEWE.

Tupo katika jamii ambayo watu huoneana wivu, hujenga chuki, wasopenda upendo na hata kupanga njama za kuharibiana maisha. Ila katika yote haya yanayofanyika watu wanasahau kuwa kwa kila jaribio baya dhidi ya mtu mwingine ni kuandaa mazingira ya kuumia wenyewe. Hujaona namna unapokuwa na kinyongo dhidi ya mtu fulani jinsi kinyongo hicho na wewe kinavyokuumiza hata kabla ya kuwafanyia wengine. Wengi huwa hatujui kuwa kwa lolote tunalopanga kuwaumiza wengine tunaanza kuumia kwanza sisi kabla ya hao watu hawajaumizwa.

Falsafa inatufundisha namna umuhimu wa kuishi kwa mashirikiano na watu wote. Inagusa namna maisha yetu ni mategemeano yaliyo sawa kabisa na viungo vya mwili katika mwili. Uwepo wa watu wanaotuzunguka hatuna namna ya kukataa uwepo wao mbali na kujifunza namna ya kuishi nao, kuwaelewa na kusaidiana. Uwepo wa hasira, chuki, visirani na vinyongo ni kutojua maisha yetu yamekuwepo kwa ajili ya uwepo wa watu wengine wanaotuzunguka.

Jamii nyingi zinazoingia katika migogoro huwa zimekosa kujua namna maamuzi mabaya au ya kiuonevu yalivyopanda mbegu ya chuki na hasira inayokuja kujirudia na kuwadhuru na wao pia. Ni kitu kigumu kuishi kwa Amani endapo umefanya jambo liloharibu Amani kwa watu au kuwaumiza wengine. Ndani ya mtu anayefanya ubaya hawezi kusema ana uhuru ndani yake bali ni kuwa katika vifungo na kuanza kuona matokeo au athari ya ubaya wake dhidi ya watu wengine.

Kama ilivyo katika suala la upendo linavyozalisha upendo ndivyo chuki inavyozalisha chuki. Kanuni ya asili inayosema kisababishi na matokeo “law of cause and effect” hufanya kazi katika maisha yetu kwa nguvu kubwa. Kuwa chochote utakachokifanya kitazalisha matokeo. Ukijenga chuki basi utatengeneza nafasi na fursa nyingi chuki ijengeke na kukurudia kukudhuru na wewe.

Kuumiza wengine inaweza kuwa kuwanyima nafasi ambazo wangepewa hizo nafasi au maarifa huenda wangekusaidia na wewe pia. Ila kwa kuwa hatujui chochote tunachokifanya kwa wengine tunajifanyia sisi wenyewe hilo tunapuuza. Unapokosa kufundisha wengine kuishi vizuri, kuwajengea misingi mizuri ndivyo unavyojitengenezea mzigo mkubwa hapo baadaye utakaokurudia. Hili utaliona katika maeneo ya kazi, elimu na uongozi ambapo walotangulia si wepesi kuwafundisha wengine njia angali bado wana nguvu. Ila kwa baadaye hutokea hawana watu chini yao ambao wangekuwa msaada au daraja baada ya wao kuchoka au kuumwa.

Marcus Aurelius anasema “When others try to hurt you, they hurt themselves”. Hii ikiwa na tafsiri kuwa “Tunapokuwa tunawaumiza wengine, basi tunajiumiza sisi wenyewe”. Unaposhindwa kusamehe mtu ndivyo unavyojikuta wewe usiyesamehe ukiumia zaidi kuliko hata aliyekukosea au huenda aliyekukosea hata hajui kama unaumia. Unaposhindwa kusahau yalopita si kuwa unaukomoa muda ila unajiumiza wewe mwenyewe ndani kwa kuendelea kuumizwa na kumbukumbu. Chochote kile unachokifanya unakifanya kikurudie wewe mwenyewe. Ukitenda baya utavuna baya na ukitenda jema utavuna jema. Dunia haidanganywi kwa lolote kukupa kile unachokifanya kwa wengine.

KOCHA   MWL.JAPHET   MASATU

WhatsApp +255 716924136 )  /   * 255 755400128

 

UNAKOSA UTHUBUTU WA KUANZA ,SIYO ELIMU , MSAADA AU MTAJI .

Karibu rafiki yangu mpendwa kwenye makala ya ushauri wa changamoto, ambapo tunashauriana hatua sahihi za kuchukua katika kukabiliana na changamoto ambazo ni kikwazo kwetu kufanikiwa kimaisha.

Moja ya changamoto ambayo wengi wanapitia ni kukwama kuanza kwa sababu ya kuamini bado hawajapata maarifa ya kutosha au hakuna wa kuwasaidia au  hawana   MTAJI. Hilo linawapelekea kujikuta wanaendelea kujifunza na kusubiri na wasianze kabisa.

Kwenye ushauri wa leo tunakwenda kuona jinsi unavyojizuia kuanza kwa kufikiri hujawa na elimu ya kutosha au hatuna watu wa kutusaidia. Na rafiki yetu   JUMA  ametuandikia kuomba ushauri kwenye hili;

“Ninatamani kufanya biashara lakini kila ninayetaka kuzungumza naye na kushirikiana naye hasaidii kufika kwenye lengo langu kuhusu biashara na ninajikuta nabaki na maarifa yangu. Pia nimefanya tafiti nyingi kuhusu biashara na kilimo lakini kinachonikwamisha ni kukosa msingi bora wa elimu na kukosa mtu atakaye kusaidia kufikia malengo je nifanyeje. - Ndimi   JUMA.

Nakumbuka kwenye moja ya vitabu vya utabibu , kulikuwa na nukuu ya mmoja wa waliofanya makubwa sana kwenye tasnia hiyo ya utabibu aliyeitwa William Osler, nukuu hiyo inasema; He who studies medicine without books sails an uncharted sea, but he who studies medicine without patients does not go to sea at all.

Kwenye nukuu hiyo anamaanisha yule anayejifunza utabibu bila vitabu anaogelea bahari isiyojulikana, lakini yule anayejifunza utabibu bila wagonjwa, hajaenda baharini kabisa.

Kwa maneno mengine ni sawa na mtu anayejifunza kuogelea bila hata ya kuyasogelea maji, au anayejifunza baiskeli bila hata ya kuipanda, unafikiri mtu huyo atanufaika na mafunzo hayo?

Hivyo pia ndivyo tunaweza kusema kuhusu biashara, unaweza kujifunza biashara uwezavyo, unaweza kusoma kila aina ya kitabu cha biashara, unaweza kufanya kila aina ya tafiti, lakini kama hutaingia na kufanya biashara, hujaijua biashara.

Kwenye jambo lolote lile, nadharia ni tofauti kabisa na uhalisia. Hata ukisoma kitabu kilichoandikwa na mfanyabiashara mwenye mafanikio makubwa kabisa, bado aliyopitia yeye siyo utakayopitia yeye. Na hata yeye angekuwa anaanza leo, angerudia kufanya yale aliyofanya hatafika viwango alivyofika.

Je ina maana kujifunza kuhusu biashara hakuna maana? Kufanya utafiti wa biashara hakuna maana? Jibu ni kuna maana mno, lakini utaiona maana hiyo pale utakapoingia uwanjani na kucheza, pale utakapofanya biashara kwa uhalisia.

Unapoingia kwenye biashara ndiyo unajifunza kuna mengi hukuwa unayajua licha ya kujifunza na kufanya tafiti nyingi. Utagundua mawazo uliyokuwa nayo awali hayakuwa sahihi na utahitajika kubadilika kulingana na soko lilivyo.

Na unapokutana na changamoto za kibiashara kiuhalisia, ndiyo sasa unajua wapi urudi kujifunza zaidi, unajua utafiti upi unahitaji kufanya zaidi kwa sababu hapo upo kwenye uhalisia.

Na vipi kama hupati wa kukusaidia? Jibu ni anza na wa kukusaidia watakuja kwako baada ya kuona unafanya.

Unajua kuongea na kupanga ni rahisi, na kila mtu anafanya hivyo. Ila wanaofanya kwa vitendo ni wachache. Hivyo kama unawaambia watu hawakuelewi, ni kwa sababu wameshakusikia unasema sana. Sasa achana na maneno na fanya vitendo. Ukianza biashara na ikaonekana, ni rahisi watu kukuunga mkono, hasa biashara inapokuwa inafanya vizuri.

Hatua za kuchukua;

1. Tambua umeshajifunza na kufanya tafiti vya kutosha, na utaendelea kujifunza kwa safari yako yote ya kibiashara.

2. Amua kuanza biashara sasa, anzia pale ulipo na kwa namna unavyoweza.

3. Anza na mteja hata mmoja, chagua tatizo unaloona linawakabili watu na unajua njia nzuri ya kulitatua, kisha anza kutatua kwa watu wachache.

4. Tumia mbinu za masoko na mauzo ulizojifunza ili kuwafikia wengi zaidi na kuwauzia pia.

5. Kwa kila hatua ya biashara yako unayopiga, jenga mfumo mzuri ambapo mtu anaweza kuona namna unavyofanya biashara na kushawishika kuungana na wewe.

6. Wachague watu sahihi na waoneshe hatua ulizopiga huku ukiwashirikisha mpango wa kukua zaidi na namna gani watanufaika kwa kuungana na wewe, kisha wape mpango wa namna gani wanaweza kuungana na wewe.

7. Pata na usome kitabu cha ELIMU YA MSINGI YA BIASHARA, hiki siyo cha kusoma mara moja na kuacha, bali ndiyo mwongozo wako kwenye safari nzima ya kibiashara.

Nimeorodhesha hapo hatua moja mpaka saba, lakini nikueleze wazi, mambo hayatakwenda kirahisi hivyo, utakutana na changamoto mbalimbali, utakutana na magumu yatakayokufanya utake kukata tamaa. Utapingwa na kuwekewa vikwazo na watu uliotegemea wakuunge mkono. Lakini usikubali hayo yakurudishe nyuma, amua kwamba unakwenda kufanya biashara na hakuna kitakachokurudisha nyuma.

Imetosha sasa kujifunza, ingia kwenye uhalisia na uendelee kujifunza kupitia kila hatua unayopiga. Biashara ndiyo darasa la maisha, hakuna siku utajiambia umeshajua kila kitu, hivyo anza kufanya na endelea kujifunza, kwa kipindi chote unachokuwa kwenye biashara, utaendelea kujifunza zaidi na zaidi.

Nakutakia utekelezaji mwema wa yale ambayo umejifunza,

Rafiki na Kocha wako,

MWL.  JAPHET   MASATU

WhatsApp = 255 716 924136 )  /  + 255 755400128

 

WEWE NI SEHEMU YA JAMII INAYOKUZUNGUKA , TENDA YATAKAYONUFAISHA JAMII .

Siku ambayo tutakufa jambo moja litakalokumbukwa kuyahusu maisha yetu ni namna tulivyoweza kugusa maisha ya wale walotuzunguka. Mali, umaarufu na mambo mengine yote huenda yakasahauliwa isipokuwa yale ambayo uligusa maisha ya watu wataendelea kuyakumbuka zaidi. Hili ndilo kusudi mama la maisha kuwa tupo Duniani kuwa sehemu ya jamii na katika si­ku za kuishi kwetu tuwe na mchango chanya kwa wale wanaotuzunguka.

Tuliona katika barua zilizopita namna maisha yetu ni duara la mahusiano. Mahusiano ya awali ni juu yetu wenyewe, wale wanaotuzunguka na mwisho ni ulimwengu mzima. Mahusiano yetu sisi wenyewe yanapokuwa mazuri ikiwa na maana kujipenda, kujielimisha na kupenda utulivu ndiko kunakozalisha kuwapenda wengine na kusambaza upendo toka mtu mmoja hadi mwingine na hatimaye ulimwengu mzima. U sehemu wetu wa jamii unatupa kujifunza kuhusu sisi wenyewe, kujifahamu na kuelewa kuwa tu familia moja ya chanzo kimoja. Kama ni mti basi wenye majani mengi yanayotokea katika utegemezi wa mizizi inayofanana.

Si watu wengi ambao huona umuhimu wa kuyatoa maisha yao kwa ajili ya kutengeneza njia kwa ajili ya wengine. Huenda kutengeneza njia ni kazi ya jasho, ngumu, isopongezwa na wakati mwingine isopewa thamani na wale wanaotendewa. Hili linafanya wengi wasiwe sehemu ya kuchangia mabadiliko chanya ya jamii zinazowazunguka. Licha hayo yote kuwa wengi hawajitoi kwa ajili ya kuongoza njia kwa jamii ipo nafasi nzuri, alama idumuyo na heshima kwa wale wote ambao wanaona maisha yao ni daraja kwa watu wengine na wana wajibu wa kuhudumia jamii katika siku za maisha yao. Unajisikiaje umepata nafasi ya maisha na ikafika ukomo hujafanya la kukumbukwa na jamii yako ?

Ishukuriwe teknolojia kwa kuwa inatupa nafasi muhimu ya kugusa maisha ya watu wengine wengi. Tunagusa maisha ya watu wengine katika yale ambayo tunayafanya kila siku. Iwe unaandika, kazi, una ujuzi fulani, una uzoefu fulani, una kitabu, una watoto au familia ndivyo unavyogusa mamia ya watu wengi. Unaweza kuanza ulipo kwa kugusa watu waliokata tamaa kwa kuwatia moyo, wale walokosa muongozo wa maisha kwa kuwasaidia kuwapa miongozo na wale walopoteza hamasa katika maisha kwa kuwahamasisha. Katika haya matendo madogo unayoyafanya unaacha alama zitakazodumu na kueleza maisha yako pindi utakapokuwa huna nafasi ya kuishi tena.

Marcus Aurelius namnukuu “As you are part of a community, act in ways that benefit your community. To act selfishly, against society, is mutiny”. Ikiwa na maana “Ukiwa Kama Sehemu ya Jamii, Tenda Katika Namna ya Kuifaidisha Jamii Yako. Kutenda kwa Kujiangalia Wewe Pekee “Uchoyo” dhidi ya Jamii ni Uasi”. Unapokosa kuihudumia jamii yako kwa vile ulivyonavyo ni sawa na mtu aliye muasi. Kwanini ufe na hazina ya hekima, uzoefu, maarifa kwa uchoyo wa kutowashirikisha wengine ?

KOCHA  MWL.JAPHET  MASATU

WhatsApp +255 716 924136 }  /   + 255  755400128

 

USIKIMBILIE UMAARUFU, UTAKOSA AMANI ,FURAHA NA UHURU.

Leo hii kila utakayeweza kuonana naye basi ndani kuna matamanio ya kutamani ajulikane na watu wengi. Iwe ni biashara, bidhaa, huduma au chochote alichonacho kipate umaarufu au kutambulika kwa watu wengi. Umaarufu limekuwa lengo mojawapo la watu wengi maeneo mbalimbali Duniani likitanguliwa na PESA.

Wapo wanaotamani kuwa maarufu katika wanachokifanya, wapo wanaotamani kuwa maarufu katika eneo dogo walilopo au hata kwa ukubwa. Matamanio haya ya watu wengi kutaka umaarufu mengi yanachangiwa na kutafuta furaha. Wengi wanafikiri watakapokuwa maarufu basi watakuwa na furaha isokoma.

Umaarufu unakuja na gharama zake. Gharama zake ni kunyang’anywa kwa uhuru na furaha. Mtu aliye maarufu atajitahidi kuhakikisha kuendelea kuwafurahisha wengine. Kufanya hivi ni kuuza uhuru na furaha ya maisha ndani ya mtu. Umaarufu wa mtu umefanya wengine wasiwe huru kuishi maisha ya kawaida kama watu wengine, kula au kuishi kama wengine. Matokeo ya maisha yasiyo halisi huanza kukaribia kwa watu wengi walio maarufu.

Hujawahi ona namna maisha ya watu wengi maarufu yanaishia katika njia isiyo nzuri. Wapo ambao wanaishia kuanguka katika walichokuwa nacho na umaarufu, wanaanguka katika starehe na wengine wanaanguka katika matatizo ya afya ya akili kama sonona. Je ni mtu aache kutafuta umaarufu ?. huenda likawa swali kwa watu wengi wanapoona mbona kuwa maarufu ni mzigo.

Falsafa ya Ustoa inahimiza namna utulivu na uhuru ni mambo makubwa muhimu ya kuyashikilia katika maisha ya kila siku. Licha kuwa wastoa wengi hawapendelei kuweka lengo na nguvu kuwa maarufu ila namna maisha yao na yale wanayoyasimamia yanafanya kazi zao ziende mbali na kujulikana na watu wengi. Umaarufu utokanao na kazi bora unatengeneza njia iliyo na nguvu na kulinda uhuru wa mtu.

Masikitiko makubwa ni pale watu wanapokuwa na njia isiyofaa ya kutafuta kujenga umaarufu. Umaarufu wa kutumia njia za mtu kujishushia utu wake ni umaarufu unaovuma kwa muda kisha anguko lake huwa baya. Wengi ambao wamejenga umaarufu kwa njia ambazo hazikuwa halali au za ujanja ujanja muda huwaangusha hapo baadaye. Umaarufu ni gharama na mtu anapokwepa gharama huanguka mbele ya safari.

Pia utakuwa umewahi ona namna watu wengine wanavyojaribu kutumia njia za mikato kujenga umaarufu na huwa hawafiki mbali wanaanguka. Huenda wengine kuiba hadi kazi za watu, majina ya watu, kuiba majina ya bidhaa na mwisho hawadumu katika walichokifanya wanapotezwa hawasikiki tena. Umaarufu una gharama na mtu anayekwepa hii gharama anaruhusu njia ya kuanguka hapo baadaye.

Si watu wote ambao mara baada ya kuwa maarufu wanabahatika kukutana na maisha ya uhuru na furaha. Wengi wanapoteza haya mambo makubwa mawili; uhuru na furaha. Hawawi tena huru kufanya yale ambayo wao wenyewe wangeweza kufanya ila isipokuwa wanafanya katika kuwafurahisha wale wanaowafuatilia. Pili ni upotevu wa furaha kadri mtu anavyokuwa na kundi kubwa la watu wanaomfuatilia pale anapokosa kujua nini alichokuwa akikihitaji pindi akiwa maarufu. 

KOCHA MWL.JAPHET  MASATU

 WhatsApp +255 716924136 )  /    + 255 755400128

 

STADI ZA KAZI---DARASA LA KWANZA ( STD 1 )---TUCHORE PICHA KWA KUTUMIA VIGEZO---NUKUU ZA SOMO--NOTES---KWA SHULE ZA MSINGI---TANZANIA----( PDF )

ISHI KAMA MKONDO WA MAJI , SIRI YA KUISHI KWA AMANI NA FURAHA.

Tunacheleweshwa katika maisha kuyaona kama zawadi kwa mambo mengi ambayo bado tumekuwa wazito kuyaacha yapite na turuhusu kuona thamani ya wakati tulio nao sasa. Ugumu mwingine ambao watu wanajitengenezea ni huu wa kuendelea kushikilia vitu au mambo yalokwisha kupita. Walio huru na kufurahia maisha ni wale wote ambao muda ukipita basi wanaruhusu nayo mambo yapite.

Naamini katika maisha yako umewahi pita eneo la mto au hata kuona mfereji wa maji unaopita katika mkondo wake. Ukitulia na kuangalia kwa macho yako mawili utaona namna maji yapitavyo na ikiwa utaweka kitu juu au kurusha ndani ya maji hayo hubebwa na kusafirishwa. Hili si ajabu kuona namna mikondo ya maji hukusanya vitu toka eneo lingine na kwenda kupeleka eneo lingine. Hili ni somo pana na kubwa la kifalsafa linalofundishwa na asili namna ya kuachilia vitu na tuviruhusu kupita.

Wangapi umekutana nao wakiwa na kauli za mambo yalopita au bado kufikiri kwa habari zilizopita. Wangapi ambao hadi sasa wameshindwa kuchukua hatua kwa sababu ya kuweka lawama kuwa asingekuwa fulani nisingekuwa maskini au kuwa hapa leo. Kauli za kujikatisha tamaa na kuendelea kuzitumia ziendelee kuwa na nguvu hata muda uwapo umepita kimekuwa kikwazo kwa watu wengi kuona wanahitaji kubadilika na kuanza maisha mapya na kuruhusu kufurahia wakati wa sasa. Utafungwa na nyakati zilizopita hadi lini kwa kushindwa tu kuachilia ili uruhusu upya ndani ya maisha yako ?

Nimekuja kugundua namna nilivyokuwa nikiachilia mambo yapite ndivyo nilivyokuwa naachia nafasi ya kufurahia maisha, kuwaza kutofauti na kuishi kwa utulivu mkubwa wa ndani. Si mimi pekee huwa naliona hili hata kujifunza kwa watu wengine wenye maisha imara, utulivu na furaha ni watu ambao huachilia mambo wanayokutana nayo. Kuachilia kwao kwa mambo na matukio wanayokumbana nayo maishani kumewazawadia utulivu na maisha ya furaha wakati wote.

Ukiishi namna mto unavyobeba vitu na kuvipitisha hutosumbuliwa na chochote kile. Wakati watu wanaendelea kufikiri yalopita wewe utakuwa ukitumia sasa yako vizuri na kuifurahia. Utakapokuwa unaruhusu kuachilia vitu vipite utakuwa ukitengeneza akili tulivu na kuepusha msongo wa mawazo ambayo ni hali inayowasumbua maelfu ya watu kwa kushindwa tu kukubali na kuachilia mambo.

Mstoa Marcus namnukuu “A person can stand by a mountain stream and insult it all day long—the stream remains pure. Even if they throw dirt into it, the dirt is quickly dispersed and carried away. Let your soul be like that stream—flowing freely, simply, and contentedly”, Hii ikiwa na maana “Mtu anaweza kukaa katika mkondo wa maji mlimani na akatukana siku nzima juu ya mkondo wa mto nao usiseme kitu. Hata ikiwa mtu atatupa uchafu ndani yake, si muda uchafu utasombwa na kuchukuliwa. Hebu chukulia nafsi yako iwe kama mkondo, mkondo ulio huru”. Maneno haya ni mazito na kuyatafakari kwa kina namna umuhimu wa kuachilia nyakati zipite na mambo yapite.

Chochote kile utakachokutana nacho maishani jua kuwa kitapita endapo utaruhusu kipite kama ulivyo mkondo wa maji upitishavyo vitu. Hili litakusaidia kukufanya uwe imara, mwenye furaha na kushiriki katika zawadi ya maisha kikamilifu.

KOCHA  MWL.  JAPHET  MASATU

WhatsApp +255 716924136 /  +  255 755400128   /  + 255 688 361 539

 

MAKUNDI MATATU ( 03 ) YA WATU KATIKA KUSTAHIMILI MAGUMU NA VIKWAZO MAISHANI.

Tunaishi katika zama ambazo watu wengi wanapokutana na magumu hukimbia, hurudi nyuma, hukata tamaa na wakati mwingine wapo ambao huchukua maamuzi ya kukatisha maisha yao. Magumu hayaepukiki katika maisha na yule ambaye anaweza kushinda na kuvuka ndiye mtu aliye shujaa na hodari na wakati mwingine mtu huyo huwa kivutio, mfano wa kuigwa na kioo cha kujitazamia.

Leo tunaenda kuangalia makundi makubwa matatu ya watu walivyo wanapokutana na magumu na uwezo wao wa kustahimili kushinda au kuvuka vikwazo hivyo. Jiangalie katika kila kundi namna gani maisha yako umekuwa ukiyaendesha kila siku. Utakapojiona basi fuata njia ambayo itakupa kuwa na uwezo na nguvu ya ustahimilivu wa kushinda magumu na kuvuka vikwazo.

Kundi la kwanza ni watu laini “soft people” ndani na nje. Matukio au taarifa mbalimbali zinapojitokeza ni rahisi kutetereka kwa watu hawa, ni rahisi kuumizwa, hawawezi kustahimili. Huenda wakawa ni sawa na yai. Yai nje haliwezi himili mitikisiko kwa kani au nguvu ndogo tu toka nje wanavurugika haraka. Watu hawa wanaumizwa haraka na mambo yanapobadilika, hisia zao ziko nje nje kuvurugwa na maisha. Kundi hili lina watu wengi katika jamii ambapo mtu nje na ndani hawezi stahimili magumu au vikwazo. Huwa ni wepesi kuacha kitu walichokianzisha, wepesi wa kukata tamaa na hawawezi kujaribu wakiwa na hofu kubwa vipi endapo nitakutana na magumu itakuwaje ?

Kundi la pili ni watu walio na uimara kidogo nje na ndani wanaweza kustahimili kwa muda tu ila kadri mambo yanavyokuwa magumu ndivyo wanavyorudi kuwa kundi la watu wa kwanza. Wanavurugika mapema endapo magumu wanayoyapitia hayaoneshi dalili ya kupata majibu. Wanapoteza tumaini haraka kadri mambo yanavyozidi kuonekana mbele kiza kinene. Kundi hili wapo watu wengi pia ambapo huonekana ni imara kwa nje ila mambo yanapokuwa magumu basi unaona namna wasivyo na ustahimilivu, wanachoka haraka mambo yanapokuwa hayatokei majibu. Uimara wao hulainishwa kadri mambo yanavyozidi kujaa vikwazo na masumbufu mengi.

Kundi la tatu ni watu waitwao miamba “rocks”. Watu hawa ni miamba maana si nje wala ndani ni watu imara, hakuna kitu kigumu ambacho kinawazuia kusonga mbele, kadri magumu yanavyozidi kuwa mengi ndivyo wanavyozidi nao kuimarika na kuwa miamba zaidi. Watu hawa ni watu ambao hugeuza vikwazo, magumu na masumbufu wanayoyapitia kuwa njia ya kupita kuelekea ukuu na mafanikio. Kundi hili lina watu wachache ambao tunawapa majina ni mashujaa, hodari, miamba na mifano ya kuigwa. Njia yao huenda isiwezwe na makundi mawili ya juu ila hawa watu ndio wanaofanya mabadiliko makubwa katika maisha iwe ni eneo la biashara, uongozi, taaluma, sanaa na maisha kwa ujumla. Falsafa ya Ustoa inakuandaa uwe katika kundi hili kuwa hakuna kitu kitachokukwamisha katika maisha yako. Kuwa katika magumu si wakati wa kukimbia ila ni wakati wa kukabiliana na vikwazo na kuvishinda.

Marcus anasema "The impediment to action advances action. What stands in the way becomes the way". Akiwa na maana “kuwa kila kikwazo mbele yako ni njia”. Magumu yote ambayo utapitia yanakuandaa kuwa hodari, kuwa na subira, kujijenga kihekima na kiuzoefu. Mwaka huu utakutana na matukio mengi na matukio yote yatakayojitokeza yafanye njia na kuwa mtu mwamba kuvuka hilo eneo. Haitakuwa rahisi ila utaweza kadri usivyoruhusu kukimbia utakapokuwa unapitia changamoto au magumu.

KOCHA  MWL.  JAPHET    MASATU

 (  WhatsApp  + 266 716924136  ) /  + 255 755 400128  /  + 255 688 361539