MAMBO 03 UNAYOHITAJI ILI UNUFAIKE NA USOMAJI WA VITABU

 

Wengi wa wanaosoma vitabu wanapoteza tu muda wao, wanakazana kusoma ili waweze kuwaambia wengine wamesoma vitabu vingapi, huku maisha yao yakiwa hayabadiliki kwa namna yoyote ile.

Huu siyo tu upotevu wa muda, bali pia kuchafua akili, maana kama ambavyo Alexander Pope amewahi kusema, “Maarifa kidogo ni kitu hatari, unapaswa kunywa kwa kina au usionje kabisa maji ya chemchem ya maarifa. Maarifa ya juu juu ni sumu kwa akili.”

Hili tumekuwa tunaliona wazi, mtu anapata maarifa kidogo ambayo hata hajayaelewa kwa kina na kuanza kuona anajua kila kitu, kuanza kuwadharau wengine ambao hawana maarifa hayo, lakini cha kushangaza, maisha yao yanabaki vile vile.

Mtu anaweza kusoma kitabu kimoja au vichache na kujifunza juu juu kwamba elimu rasmi ni upotevu wa muda na ajira ni utumwa. Akatoka hapo na moto wa kwenda kuacha shule au kuacha kazi, lakini anakuwa hajaiva kwenye nini aende kufanya, kinachotokea ni majuto baadaye.

Wapo wanaokuja kukiri wazi kwamba waliponzwa na vitabu na wapo ambao hawataki kuona kosa ni lao, bali hutafuta wengine wa kuwalaumu. Na siku hizi limepatikana kundi rahisi la kulaumu kwenye kupotezwa na maarifa ambalo ni la wahamasishaji au kama wanavyojulikana ‘motivational speakers’.

Mtu anapata maarifa ya juu juu, anatoka akiwa amejaa upepo na kwenda kuchukua hatua, ambazo zinamwangusha vibaya. Badala ya kuangalia tatizo liko wapi, ambalo ni yeye, anatupa lawama kwa mwingine.

Leo tunakwenda kujifunza vitu vitatu unavyohitaji ili uweze kunufaika na usomaji wa vitabu. Ukizingatia vitu hivi vitatu, hutakuja kulaumu usomaji wa vitabu, maana utakuwa na manufaa makubwa kwako.

Kwenye kitabu cha Fahrenheit 451, mhusika mkuu, Guy Montag ni mzima moto (Fireman), ambaye kwenye jamii yao kazi yao siyo tena kuzima moto, bali kuchoma vitabu moto. Ni jamii ya watu ambao wameacha kusoma vitabu na kuendekeza starehe na burudani mbalimbali kama kuangalia tv na michezo mingine.

Guy amefanya kazi hiyo kwa miaka kumi, lakini hajawahi kupata nafasi ya kutafakari kama kazi hiyo ina maana kwake au inampa furaha. Kwa udadisi, amekuwa akiiba vitabu kwenye nyumba wanazokwenda kuchoma, ila hajawahi kuvisoma, amekuwa anavificha ndani.

Siku moja Guy anakutana na binti ambaye anamhoji maswali yanayomfanya aanze kuyatafakari maisha yake na hapo anagundua kwamba maisha anayoishi siyo sahihi.

Anaamua aanze kusoma vitabu, lakini tatizo linakuja kwamba haelewi chochote anachosoma. Siku nzima anakazana kufungua vitabu na kusoma, lakini haelewi chochote.

Anakumbuka aliwahi kukutana na mzee mmoja ambaye alikuwa profesa aliyepoteza kazi yake baada ya watu kuacha kusoma. Anamtafuta ili amsaidie jinsi anavyoweza kusoma vitabu na kuelewa.

Profesa huyo anampa vitu vitatu anavyopaswa kuzingatia ili aweze kusoma vitabu, kuvielewa na maisha yake yabadilike. Hapa nakwenda kukushirikisha vitu hivyo vitatu ili na wewe uweze kupiga hatua kubwa kwenye maisha yako kupitia usomaji wa vitabu.

Kitu cha kwanza; jua jinsi ya kuchagua vitabu vyenye maarifa bora.

Vitabu havifanani, ubora wa maarifa unaopatikana kwenye vitabu haulingani. Kuna vitabu ambavyo ni bora, vyenye maarifa mazuri na unayoweza kutumia kupiga hatua.

Halafu kuna vitabu ambavyo ni vya hivyo, vyenye maarifa ambayo hayana manufaa kwako.

Kitu cha kwanza kuzingatia ni ubora wa maarifa yaliyo kwenye kitabu. Unapaswa kujua jinsi ya kuchagua vitabu bora kwako kusoma ili uweze kupata maarifa ambayo ni bora.

Kwa zama tunazoishi sasa, mitandaoni kunapatikana kila aina ya vitabu, na vingi sana ni vya hovyo. Ikiwa unataka kuanza kusoma vitabu kwa sasa, utajikuta njia panda usijue ni vitabu gani vya kuanza navyo.

Njia rahisi kwako kujua vitabu vya kuanza navyo, ni kuchagua watu ambao wamepiga hatua kwenye eneo unalotaka kupiga hatua, kisha waulize ni vitabu gani wamesoma.

Kama kuna mtu amefanikiwa zaidi yako, kwenye eneo lolote la maisha, kuna vitu anajua ambavyo wewe hujui. Badala ya kumwonea wivu au kumwogopa, mwombe akushirikishe ni aina gani ya vitabu anasoma, hapo utapata vya kuanzia.

Uzuri wa zama hizi ni mitandaoni kuna orodha za vitabu ambavyo wale waliofanikiwa wamekuwa wanashauri watu wavisome.

Hicho ni kitu cha kwanza, kuweza kuchagua vitabu ambavyo ni bora kwa maarifa yaliyo ndani yake.

Kitu cha pili; muda wa kutafakari yale uliyoyasoma.

Kusoma pekee, hata kama ni kitabu chenye maarifa bora kabisa hakutakuwa na manufaa kwako. Kwanza kabisa hutaweza kukumbuka kila ulichosoma na pili siyo kila maarifa yaliyo kwenye kitabu yatakuwa na manufaa kwako.

Hivyo unapaswa kupata muda wa kutafakari kile ulichosoma. Na hapa ndipo wengi wanapofeli na kuja kulaumu wengine. Wanasoma au kusikia kitu na kukimbilia kuchukua hatua kabla hawajatafakari kwa kina.

Kila maarifa unayoyapata, yatafakari kwa kina. Angalia maisha yako yalipotoka, yalipo sasa na kule yanakokwenda. Angalia ni jinsi gani maarifa uliyoyapata unaweza kuyaingiza kwenye maisha yako.

Kwa bahati mbaya sana, kutafakari ni kitu unachopaswa kukifanya mwenyewe, kwa sababu ni wewe pekee unayeyajua maisha yako kwa undani. Watu wawili mnaweza kusoma kitabu kimoja na wote mkakielewa, lakini hatua za kuchukua zikawa tofauti, kwa sababu maisha yenu ni tofauti.

Ambacho nimekuwa nashauri watu kwenye usomaji wa vitabu ni hiki, anza kwa kujua unataka nini kwenye maisha yako, kisha kila kitabu unachosoma jiulize kinakusaidiaje kupata au kufika pale unapotaka kufika.

Ikiwa hujafanya maamuzi unataka nini, kwenye kila kitabu unachosoma utakuja na vitu vipya. Utasoma kitabu cha kilimo cha tikiti na kuona ndiyo kitu bora, unaenda kufanya, unasoma kitabu cha ufugaji wa kuku unaona huo ndiyo wenyewe, unaenda kufuga. Unasoma kitabu cha forex na kusema siwezi kupitwa na hii, unaenda kufanya. Mwisho unajikuta umejaribu mengi lakini hakuna hatua uliyopiga.

Anza na unachotaka, kisha kwa kila kitabu unachosoma, tafakari kinakusaidiaje kufika kule unakotaka kufika.

Kitu cha tatu; kuchukua hatua kwenye yale uliyojifunza na kutafakari.

Kusoma maarifa ambayo ni bora na kuyatafakari jinsi unavyoweza kuyatumia kwenye maisha yako ili kupata unachotaka ni asilimia 10 ya manufaa ya kitabu.

Asilimia 90 inapatikana kwenye kuchukua hatua. Usikubali usome kitabu halafu maisha yako yabaki kama yalivyokuwa kabla hujasoma kitabu hicho. Chukua hatua, hata kama ni ndogo kabisa, kuhakikisha unakuwa bora kuliko ulivyokuwa kabla ya kusoma kitabu hicho.

Hivyo kwa tafakari unayoifanya, weka hatua utakazochukua na anza kuzichukua mara moja. Hazihitaji kuwa hatua kubwa sana, bali zinapaswa kuwa hatua zenye tija kwako, kiasi kwamba ukijiangalia unaona kitabu ulichosoma kimekuwa na manufaa kwako.

Siyo maarifa yote unayoyapata kwenye kitabu utaweza kuyatumia kwa mara moja, kuna mengine utayahifadhi kwa ajili ya baadaye. Lakini hupaswi kusoma kitabu na ukamaliza kisha ukarudi kwenye maisha yako ya awali kama yalivyokuwa. Badili kitu kwenye maisha yako, hata kama ni mtazamo wako au jinsi unavyotumia muda wako na kuendesha siku zako.

Kuna mengi ya kufanya pale unapopata maarifa bora na kuyatafakari yanakufaaje kwenye maisha yako.

Soma vitabu kwa tija na viwe na manufaa kwenye maisha yako, chagua vitabu vilivyo bora, pata muda wa kutafakari ulichojifunza na chukua hatua kuyafanya maisha yako kuwa bora zaidi. Ukizingatia hayo matatu, usomaji wa vitabu utayafanya maisha yako kuwa bora zaidi.

Rafiki, kama ungependa kuendelea kupokea makala na mafunzo mengine mazuri , JIUNGE  NA   DARASA  ONLINE---NA  ENDELEA   KUSOMA  KILA   SIKU  HAPA   "MAISHA  NA   MAFANIKIO   BLOG "  LIFE   AND   YOU  

Tuwasiliane  kwa  + 255 716 924136 /   + 255  755 400128 /  + 255 688 361 539  

Ndimi  KOCHA   MWL    JAPHET   MASATU

NI WAKATI GANI WA KUCHUKUA MKOPO WA BIASHARA ILI UWE NA MANAUFAA ?

WAKATI    SAHIHI  WA  KUCHUKUA   MKOPO    KWA  AJILI  YA    BIASHARA .

Kwenye makala hii nitakwenda kushauri mambo matatu ambayo kila mfanyabiashara anapaswa kuyafanyia kazi ili biashara yake iweze kukua.

JAMBO LA KWANZA; WAKATI SAHIHI WA KUCHUKUA MKOPO.

Usichukue mkopo kwenye biashara kwa sababu umeambiwa unakopesheka,

Usichukue mkopo kwa sababu wewe ni mfanyakazi hivyo unaweza kukopa kwa kutumia mshahara wako.

Na usichukue mkopo kwenye biashara kwa sababu umesikia watu wanasema biashara haiwezi kufanikiwa bila mkopo.

Zote hizo ni sababu mbovu za kuchukua mkopo kwenye biashara, ambazo zimewapoteza wengi.

Kabla hujachukua mkopo kwenye biashara, hakikisha imetimiza vigezo hivi vikubwa vitatu;

Kigezo cha kwanza ni biashara inajiendesha kwa faida, yaani tayari biashara inaingiza faida, hivyo unapochukua mkopo unakwenda kukuza faida hiyo zaidi.

Kigezo cha pili ni biashara ina mfumo mzuri wa uendeshaji ambapo kuna vitengo mbalimbali na kila kitengo kina majukumu yake ya kutekeleza. Hata kama uko mwenyewe kwenye biashara, unapaswa kuwa na vitengo hivyo.

Kigezo cha tatu ni matumizi ya fedha za biashara na matumizi yako binafsi hayaingiliani. Yaani fedha ya biashara inakaa kwenye biashara na huitumii kwa namna yoyote ile, una akaunti ya biashara benki ambapo fedha zinaenda huko. Hata kama huna pesa ya kula, hutoi tu kwenye biashara kiholela.

Kama biashara yako haijafikisha vigezo hivyo vitatu, ukichukua mkopo unaiwahisha kufa.

JAMBO LA PILI; MAMBO YA KUZINGATIA PALE UNAPOCHUKUA MKOPO.

Baada ya kuhakikisha kwamba biashara yako imefikia vigezo vya kuchukua mkopo, kwa maana kwamba inajiendesha kwa faida, ina mfumo mzuri na fedha za biashara haziingiliani na matumizi yako binafsi, basi unaweza kuchukua mkopo.

Lakini pamoja na kukidhi vigezo hivyo, mkopo unaweza kuwa hatari kwa biashara kama hutazingatia mambo muhimu katika kuuchukua na kuutumia. Yafuatayo ni mambo matano muhimu ya kuzingatia pale unapochukua mkopo wa biashara.

Moja ni kupanga matumizi ya mkopo huo kabla hujauchukua. Usichukue mkopo kisha ndiyo upangilie unautumiaje. Badala yake iangalie biashara yako kwanza, angalia ni bidhaa au huduma zipi zinazotoka haraka, zina uhitaji na faida yake ni nzuri, hivyo unapochukua mkopo unaenda kuweka kwenye bidhaa au huduma hiyo. Mfano kwenye hardware kama umegundua cement ndiyo inatoka sana na yenye faida na kwa mtaji wako huwezi kununua kwa wingi, unapochukua mkopo basi unawekeza kwenye eneo hilo.

Mbili ni kutokutumia mkopo wote uliouchukua, tumia robo tatu na robo iache kama akiba. Mipango yako ya mwanzo inaweza kuwa siyo sahihi, sasa kama mkopo wote umeshautumia, utajikuta umekwama. Acha kiasi fulani cha mkopo kama fedha taslimu, ili kama ulivyopanga awali mambo hayajaenda hivyo, unakuwa na kiasi cha kukuwezesha kufanya mpango mwingine wa kuokoa hali unayokuwa umeingia.

Tatu ni usitumie mkopo kufanya mambo yasiyozalisha faida, mfano kufanya marekebisho eneo la biashara, kununua samani na mengineyo. Mkopo unarudi kwa riba, hivyo unapaswa kuzalisha faida ambayo ni kubwa kuliko riba unayolipa. Kama mkopo hauzalishi faida, maana yake riba unayoilipa inatoka kwenye mtaji wako, ndiyo maana utamaliza kulipa mkopo na biashara kufa.

Nne ni kuweka nguvu na kujisukuma zaidi, ulipokuwa huna mkopo, hukuwa na gharama kubwa za kuendesha biashara, ukishachukua mkopo, gharama zimeongezeka. Hivyo pia lazima ujisukume sana, pambana kuongeza wateja na kuwashawishi wateja wako kununua zaidi. Usiendelee kuendesha biashara yako kwa mazoea kama wakati huna mkopo.

Tano ni kufuatilia kwa karibu mwenendo wa biashara na marejesho ya mkopo. Usirejeshe tu bila kuangalia biashara inaendaje, kama unafika wakati unakuta marejesho unayofanya ni makubwa kuliko faida unayoingiza, jua mapema kabisa kwamba unamega mtaji wa biashara. Hivyo anza kuchukua hatua mapema na siyo kusubiri mpaka umemaliza kurejesha mkopo huku biashara imekufa. Ukishagundua marejesho ni makubwa kuliko faida una mengi ya kufanya, kwa upande wako ni kukazana kuongeza mauzo, kwa upande wa mkopo unaweza kwenda kuongea nao wapunguze kiwango cha marejesho unachofanya.

Ukizingatia haya matano pale unapochukua mkopo, utainufaisha biashara yako na kuiwezesha kukua zaidi.

JAMBO LA TATU; UFANYE NINI PALE UNAPOKUWA HUNA VIGEZO VYA KUCHUKUA MKOPO.

Wafanyabiashara wengi wadogo na wa kati wamekaririshwa na kuamini kwamba njia pekee ya kupata mtaji wa kuanza na kukuza biashara ni kuchukua mkopo. Ndiyo maana utasikia kilio cha wengi kwamba hawakopesheki au hawana dhamana ya kupata mkopo.

Usikimbilie kuchukua mkopo kama bado hujakidhi vigezo vya kuchukua mkopo ambavyo tumejadili hapo juu.

Swali ni je ufanyeje ili kukuza biashara yako wakati huwezi kuchukua mkopo? Kuna mengi ya kufanya, hapa kuna matatu ya kuzingatia.

Moja ni kuanza biashara kwa akiba zako wewe mwenyewe. Kwenye njia nyingine ulizonazo za kuingiza kipato, basi weka akiba kwenye kila kipato na akiba hiyo iwekeze kwenye biashara, anza kidogo na endelea kukua. Kila mwezi jiwekee kiango ambacho utawekeza kwenye biashara yako kutoka kwenye njia zako nyingine za kuingiza kipato.

Mbili ni kutokuondoa fedha kwenye biashara kabisa, acha biashara ijiendeshe yenyewe kwa kutokuingilia na kutoa fedha kwa matumizi yako binafsi. Unapaswa kuwa na nidhamu kubwa sana ya kutenganisha matumizi yako binafsi ya fedha na fedha za biashara. Zione fedha za biashara kama za mtu mwingine kabisa na usiwe na mazoea ya kutumia biashara kutatua shida zako.

Tatu ni kuanza na biashara nyingine ili kutengeneza mtaji wa kwenda kuanza biashara ya ndoto yako. Kama biashara unayotaka kuanzisha inahitaji mtaji mkubwa ambao huna, anza na biashara nyingine unayoweza kuanza kwa mtaji kidogo kisha tumia biashara hiyo kutengeneza mtaji wa kuingia kwenye biashara ambayo ndiyo unataka kufanya. Hili ni jibu kwa wale watakaokuwa wamesoma namba moja hapo na kusema sina ajira nitatengenezaje mtaji au kuendesha maisha bila kutegemea biashara. Fanya chochote unachoweza kuhakikisha kwanza unaingiza kipato, omba hata kuwa wakala wa mauzo kwenye biashara za wengine ambapo watakulipa kamisheni, pambana kuuza na tengeneza mtaji wako ili baadaye uwe na biashara yako.

Kuanzisha na kukuza biashara ili ikupe mafanikio kunahitaji kazi, msimamo na uvumilivu. Hakuna njia ya mkato inayoweza kuondoa mahitaji hayo matatu. Wengi wamekuwa wanakimbilia kuchukua mkopo wakifikiri ni njia ya mkato na kinachotokea ni kuua kabisa biashara zao.

Zingatia haya uliyojifunza kwenye ushauri huu, yafanyie kazi na biashara yako itapata manufaa makubwa.

UFUKARA UNAONDOA FURAHA.

Kwenye moja ya tafiti ambazo Daniel ametumia kwenye kitabu chake, inaonesha kwamba wale ambao wako kwenye umasikini mkubwa, ambao wanaishi chini ya kiwango cha kawaida cha maisha, wanakuwa na wakati mwingi wa kukosa furaha kuliko ambao hawapo kwenye ufukara.

Mfano kitendo tu cha kuumwa na kichwa, kinawapelekea walio kwenye ufukara kupatwa na wasiwasi zaidi kuliko ambao hawapo kwenye ufukara.

Katika changamoto za kawaida za maisha, kama kuumwa, kufukuzwa kazi, biashara kufa, kutengana na mwenza, zinawaumiza zaidi walio kwenye umasikini kuliko wale ambao hawapo kwenye umasikini.

Na kikubwa zaidi ambacho Daniel ametushirikisha kwenye hili ni kwamba kwa walio masikini, maamuzi yoyote anayofanya ni ya kupoteza.

Iko hivi, sisi binadamu huwa tunaepuka hali ya kupoteza na kupenda hali ya kupata. Hivyo hatua yoyote ya kupoteza tunayochukua, huwa tunajisikia vibaya na hilo linachangia kukosa furaha.

Kwa kuwa masikini ana uhaba wa fedha, kila fedha aliyonayo haimtoshi, hivyo akitumia fedha hiyo kupata kitu fulani, anakuwa amechagua kukosa kitu kingine. Una elfu 5 mfukoni, unataka kwenda kujiburudisha mahali, ungependa kununua chakula na kinywaji, lakini fedha hiyo haitoshi, hivyo utaishia kupata chakula tu, au kinywaji tu.

Haijalishi chakula utakachopata au kinywaji utakachokunywa kitakuwa kizuri kiasi gani, akili yako haitaangalia kile ulichopata, bali itafikiria kile ulichokosa. Hilo ndiyo linachangia hali ya kukosa furaha kwa walio masikini.

Maumivu ya kukosa ni makubwa kuliko raha ya kupata. Ukipoteza elfu 10, utaumia kuliko raha utakayoipata kwa kuokota kiasi hicho hicho cha fedha.

NO GAINS WITHOUT PAINS---HAKUNA FARAJA / FURAHA / FAIDA BILA MAUMIVU

Mpendwa msomaji wa MAISHA NA  MAFANIKIO  BLOG (  LIFE  AND YOU) , napenda nianze kwa kusimulia jinsi nilivyokosa FARAJA kwa kuandika makala hii: 

“Leo nimeamka usiku saa tisa na nusu, na tayari nimeanza kuandika makala hii ambayo upo unaisoma. Lakini NIMEKOSA FARAJA kutokana na uwepo wa mbu wengi wanaonisumbua sana, achilia mbali hatari ya kuambukizwa ugonjwa wa malaria. Niko tayari KUKOSA FARAJA, kwasababu ni kwa njia hii nitaweza KUPATA FARAJA kama ambavyo imekuwa ikitokea pale wasomaji wa mtandao wa MAISHA  NA  MAFANIKIO BLOG ( LIFE  AND  YOU ) wanaponitumia ujumbe kuwa makala zangu zina mchango mkubwa kwenye maisha yao”. . 

Kisa hiki cha mbu walionisumbua kinatuonyesha kwamba, FARAJA ni kitu kizuri sana kwa binadamu na kwa wengine ni kichocheo kikubwa kwao kufanya kile wanachokifanya. 

Niseme tu, FARAJA ni ile hali ya kujisikia vizuri na huru kutoka kwenye maumivu, matatizo au msongo wa mawazo. 

Ukweli ni kwmba watu wengi wanapenda FARAJA. Matokeo yake FARAJA imekuwa ni kizingiti kikubwa katika kuyafikia maisha ya mafanikio na utajiri. 

Watu wengi wemejikuta wakishindwa kuchangamkia fursa kwasababu fursa nyingi ambazo ni kubwa zinakutaka huwe tayari kukosa FARAJA kwa muda Fulani ndio upate tena. 

Kutokana na tabia hiyo ya kupenda sana FARAJA, wengi wamejikuta wakifanya vitu vidogo vidogo sana na vya kawaida ILIMRADI tu haviwaondoi kwenye FARAJA yao ya awali. 

Ni vizuri kutambua kwamba FARAJA endelevu itapatikana kwa wale ambao wako tayari kukosa FARAJA kwa muda. 

Ukweli ni kwamba, vitu vingi vyenye kuleta FARAJA ENDELEVU vinafanyika katika mazingira ya kukosa FARAJA. 

Mfano ukitaka kuwa na afya nzuri, lazima uwe tayari kuacha kula vyakula Fulani hata kama ni vitamu sana, lazima uwe tayari kupunguza sukari, lazima kuamka mapema na kufanya mazoezi—hapa lazima uwe tayari kukosa raha ya usingizi wa asubuhi n.k, 

Wengi wetu katika kusaka mafanikio huwa tunapenda njia iliyonyooka. Martin Luther King aliwahi kusema kuwa;

“Kipimo kizuri cha binadamu siyo mahali aliposimamia wakati wa FARAJA, bali pale anaposimamia wakati wa changamoto na ubishani.”

Binadamu tuna tabia ya asili ya kuegemea zaidi kwenye HADHI tuliyonayo na tunapinga kile tusichokijua, ili tuweze kuendelea kukaa na FARAJA yetu. 

Tabia ya kupenda FARAJA inafungamana na tabia ya mababu zetu ya kuhofia kuhatarisha maisha. Tunaogopa kujaribu vitu vipya. Tunataka tukwepe mabadiliko. 

Kwahiyo, hatujisukumi mbele kwenda katika kiwango kingine cha maisha mazuri. Katika dunia ya sasa ya usumbufu na inayobadilika kwa kasi, inasaidia wewe kubadilisha mahusiano yako na mabadiliko na kuwa tayari kufurahia KUKOSA FARAJA. 

Wengi tunafikiri maisha ni kutafuta ulinzi na usalama na FARAJA peke yake. 

Hivi vitu ni muhimu na ni sehemu ya maisha ya kila siku, LAKINI maisha yamejaa RAHA na MAUMIVU, KURIDHIKA na KUTESEKA, URAHISI na UGUMU. 

Kwa kuangalia tu! upande mmoja wa sura ya FARAJA, tunajitenga na safu kamili ya uzoefu wa maisha ya binadamu—na maarifa, ujuzi na huruma itokanayo na upande mwingine wa (KUKOSA FARAJA). 

Kama haujisikii vizuri KUKOSA FARAJA, bilashaka huwa unakaimbia mabadiliko. Katika dunia ya sasa, huwezi kukimbia mabadiliko! 

Kila kitu kiko katika hali ya kubadilika mara kwa mara. Ngozi yetu ubadilika, majani ubadilika, watu ubadilika. Kwahiyo suala la kubadilika linatokea kila mahali muda wowote. 

Kuishi kikamilifu, lazima uwe tayari kukanyaga kwenye visivyojulikana, sasa hivi kuliko siku zote. Mfumo wetu wa kufanyakazi kidigitali na utandawazi unakuhitaji kufanyiakazi hata vile usivyojulikana pale unapoanza. 

Lazima uwe tayari kujipa changamoto ili kukua na kubadilika. Na mabadiliko huwa yana harufu ya KUKOSA FARAJA kwa wengi wetu. Woga na wasiwasi na kukosa FARAJA ni asili ya mapambano ya kimaisha kwa binadamu. 

Kujifunza namna ya kuwa na FARAJA kwa KUKOSA FARAJA, pengine ni mojawapo ya somo muhimu sana ambalo nimejifunza kama mjasiriamali. 

Anza leo kujiandaa na uzoee wakati Fulani KUKOSA FARAJA ili kupata FARAJA ENDELEVU hasa wakati huu unapoanza safari yako ya mafanikio. 

Kuendelea kujipatia ujuzi na maarifa juu ya pesa, kazi, biashara, ujasiriamali, afya, uongozi na suala zima la uchumi wa kaya; jaribu kuendelea  kusoma  na  kujifunza  katika  MAISHA  NA  MAFANIKIO  BLOG ( LIFE  AND  YOU )

MILIKI MUDA WAKO SASA , MUDA USIKUMILIKI.

Nimesikia mara nyingi sana watu wakilalamika kuwa hawana muda. Kupitia malalamiko haya, nimejikuta nikijiuliza maswali mengi kama haya;”kwamba muda huwa unatoka wapi? Nani huwa anagawa muda? Nani ni mmiliki wa muda? Je mimi ndiye mmiliki wa muda? Au muda unanimiliki mimi. 

Katika kutafakari maswali yote haya nimegundua kwamba... MUDA ni dhana ambayo ilitengenezwa na binadamu hasa baada ya kutambua kuwa kuna kifo. 

Hii inasaidia katika kupima utendaji wa shughuli za kimaisha kwa lengo la kuuambia mwili wako kuwa unatakiwa kukamilisha vitu Fulani kwa muda Fulani. 

Katika dhana hii ya muda, tunapata kufahamu kuwa kuna makundi ya watu aina mbili; kundi la kwanza ni lile LINALOMILIKI MUDA na kundi la pili wale WANAOMILIKIWA NA MUDA – yaani watu wanamilikiwa na muda. 

Kundi la wale WANAOMILIKI MUDA, ni watu wanaojua kuwa wana wajibu wa kuwa wachoyo wa muda wao. 

Yeyote anayemiliki muda inamlazimu kuwa mchoyo wa muda wake ili kuutumia kuzalisha thamani ambayo wanaweza kufaidi hata wale ambao uliwanyima muda wako mwanzoni. 

Kuwa mchoyo wa muda wako ni busara ilimradi unawagawia watu wengine kile kitokanacho na matumizi ya muda wako. 

Acha ku-manage muda na badala yake anza KUUMILIKI, 

MUDA ni mali ghafi ya kupata kitu chochote cha thamani. MUDA ni kitu pekee duniani ambacho huwezi kirudisha kikishapotea. 

Poteza pesa lakini unaweza kutengeneza pesa nyingi. Poteza ajira lakini unaweza kupata ajira nyingine. Lakini poteza muda na hautaupata tena. 

Kuna masaa 168 katika wiki. Na una wastani wa dakika 2,400 kila wiki. Huu ni muda mwingi sana. Unaweza kwenda wapi? Au muda huu wote unautumia wapi? 

Mambo makubwa yanaweza kufanyika kwa siku kama ukijua ni nini cha kufanya kwa muda husika. 

Pindi ukiacha kusimamia MUDA na badala yake chukua umiliki wa muda wako, ni rahisi sana kuongeza uzalishaji na kuacha kufanya vitu ambavyo huvipendi. 

“Kuna njia nne za kutumia muda wako: Kuwaza, mazungumzo, kutenda na usumbufu”- Chagua kwa busara 

Wewe peke yako unaweza kuchukua umiliki wa MUDA WAKO na uamue ni muda gani utatumia kwenye KUFIKIRI, MAZUNGUMZO, KUTENDA na hata USUMBUFU WA MAKUSUDI mbao utakupelekea kufikia mafanikio. 

Kama hujaajiriwa na mtu, maana yake unamiliki masaa yote 24. Lakini kama wewe uko kwenye ajira maana yake unamiliki masaa 16, yaani.. (masaa 24 KUTOA Masaa 8). 

Kwa mwajiriwa tunatoa masaa 8 kutoka kwenye masaa 24, nikiwa namaanisha yale masaa 8 yalishauzwa kwa mwajiri na thamani yake ni huo mshahara unaoupata kila mwisho wa mwezi. 

Kwahiyo, ulinde sana muda wako kama uwekezaji wa thamani. Upangia kazi MUDA wako kila wakati. 

Kila shughuli ya siku lazima ikamilishwe kwa muda uliopangwa. Na kikubwa zaidi kila shughuli lazima iwe ni ile inayochangia kwenye ndoto yako kwa siku, mwezi au mwaka. Ufinyu wa muda utakusukuma kuzingatia na kuwa mwenye ufanisi katika kile unachokifanya. 

Bila wewe kujali mambo yaliyo mbele yako, jitahidi kuwa wazi, ili ujue ni kipi cha kuzingatia na kimsingi ujue ni kipi cha kufanya pale unapopata muda wa ziada! 

Kumiliki muda wako siyo kuwa na muda wa kukaa bure; BALI ni kujua unataka nini na kutumia muda wako kufanya vitu vyenye tija na vinavyokusogeza au kukufikisha kwenye ndoto yako. 

Unahitaji kuanza leo kumiliki MUDA wako na kama suala la kumiliki muda wako ni jambo la kipaumbele kwako, basi endelea kufuatilia tandao huu wa MAISHA   NA   MAFANIKIO  BLOG ( LIFE   AND  YOU )

SIRI ( 09 ) ZA MAISHA NA MAFANIKIO ZA KUPATA CHOCHOTE UNACHOTAKA KWENYE MAISHA.

Ukiwachukua watu 100 kutoka eneo lolote lile, kumi watakuwa na mafanikio makubwa kuliko 90 na mmoja kati yao atakuwa na mafanikio makubwa kuliko wote.

Ni namba hizi ndiyo zimekuwa zinawachanganya watu, wasielewe kwa nini wachache sana ndiyo wafanikiwe huku wengi wanaopenda kufanikiwa wakiwa hawafanikiwi.

Kiu ya kutaka kupata siri za mafanikio siyo ya zama hizi tunazoishi, imekuwepo tangu enzi na enzi.

Mwaka 1912 mwandishi Orison Swett Marden alikusanya pamoja ushuhuda wa wale waliofanikiwa, kwa namna walivyoeleza wao wenyewe na kuja na kitabu alichokiita; How They Succeeded: Life Stories of Successful Men Told by Themselves. Kitabu hicho kimesheheni hadithi za watu waliokuwa na mafanikio makubwa sana kipindi hicho, kwa namna ambavyo walieleza wenyewe.

Ni kitu kimoja kusoma hadithi ya mafanikio ya mtu inayoelezwa na wengine na ni kitu kingine tofauti kabisa kusoma hadithi hiyo ikielezwa na mtu mwenyewe.

Upekee wa kitabu hiki, unatufanya tuwasikie wenyewe wanasemaje kuhusu mafanikio yao.

Mmoja wa watu waliofanikiwa ambaye hadithi yake inapatikana kwenye kitabu hiki ni aliyekuwa mwandishi Amelia E. Barr (March 29, 1831–March 10, 1919). Ambaye pamoja na kupoteza mume wake pamoja na watoto wake watatu kati ya sita aliokuwa nao, aliweza kufikia mafanikio makubwa sana kwenye uandishi.

Kwenye insha yake iliyo kwenye kitabu hiki, ameshirikisha siri 9 za mafanikio kutokana na uzoefu wake binafsi.

Hapa tunakwenda kujifunza siri hizo kama alivyoeleza mwenyewe, kisha nitaongeza hatua ya wewe kuchukua ili kuweza kufanikiwa sana.

( 01). KUWA   TAYARI   KWA  MAUMIVU

Amelia; watu wanafanikiwa kwa sababu wako tayari kupokea maumivu wanayopitia ili kufanikiwa. Juhudi na uvumilivu ni muhimu na wote waliofanikiwa walifanya maamuzi na kung’ang’ana nayo. Wanajua kusudi lao na wanafanya maamuzi ya kulifikia.

Somo; jua hasa nini unachotaka kwenye maisha yako, amua kwamba utapata kitu hicho na chukua hatua kukipata. Usikate tamaa hata kama unapitia maumivu makali kiasi gani, hakuna aliyewahi kufanikiwa bila ya kupitia maumivu.

( 02 ). WEKA  KAZI  KILA  SIKU.

Amelia; mafanikio ni zawadi kwa wale ambao wanaweka kazi kila siku. Hii ndiyo siri kuu ya mafanikio, kuweka juhudi kuliko wengine wanavyoweka. Kama kuna kitu hujui, utajifunza kwa kufanya. Na hata pale unapopata matokeo usiyotegemea, usiache kuweka juhudi mpaka umepata unachotaka.

 (03 ). USISUMBUKE  NA  WANAOKUPINGA.

Amelia; safari yako ya mafanikio haitakuwa rahisi, utakutana na vikwazo na moja ya vikwazo hivyo ni watu watakaochagua kuwa maadui wako na kukupinga kwenye kile unachofanya. Usiumizwe na upingaji wa wale wanaokupinga, badala yake utumie kupiga hatua zaidi. Ukinzani una nguvu ya kukusukuma zaidi.

Somo; usitegemee kila mtu akubaliane na wewe, wengi watakupinga, kukukosoa na kukukatisha tamaa. Lakini kumbuka kitu hiki kimoja, wote hao hawajui nini unataka na uko tayari kujitoa kiasi gani kukipata. Hivyo usiumizwe na ukosoaji wao, kama kuna kitu chenye manufaa wanakigusia kifanyie kazi, kama hakuna wapuuze na endelea na safari yako.

(04 ). BAHATI  INAUZWA.

Amelia; kosa kubwa kwenye mafanikio ni kufikiria kwamba ni jambo la bahati, kwamba wanaofanikiwa wanakuwa wamepata bahati. Dunia inaendeshwa na sheria kali ambazo hazitoi nafasi kubwa kwa bahati kufanya kazi. Asili huwa inauza vitu vyake, huwa haivitoi bure, hivyo hata bahati, utainunua, hutapewa bure.

Somo; ni kweli waliofanikiwa wanakutana na bahati fulani, lakini bahati hizo huwa haziwafuati wakiwa wamelala kitandani, bali zinawakuta wakiwa wanaweka kazi kwenye kile wanachotaka. Hivyo kama unataka kukutana na bahati, lazima ulipe gharama ya kuwa tayari kuweka kazi. Kama ambavyo tumekuwa tunajifunza, bahati ni pale maandalizi yanapokutana na fursa.

(05 ). PASHA  CHUMA  MOTO.

Amelia; kwa miaka tumekuwa tunaambiwa tuziangalie fursa, kupiga wakati chuma ni cha moto. Ni vizuri, lakini itakuwa bora kama tutakifanya chuma kuwa cha moto kwa kupiga, badala ya kusubiri chuma kiwe cha moto ndiyo tupige.

Somo; usisubiri mpaka fursa ije ndiyo uanze kuchukua hatua, badala yake anza kuchukua hatua na utakutana na fursa. Ukiwa kwenye kuchukua hatua inakuwa rahisi kuziona na kuzitumia fursa kuliko ukiwa unasubiria mpaka fursa ije huku hauchukui hatua. Usisubiri chuma kiwe cha moto ndiyo upige, kipige chuma mpaka kiwe cha moto.

(06 ). UNAHITAJI  MUDA.

Amelia; kila kitu kizuri kinahitaji muda, usiwe na haraka kwenye kazi yako. Weka muda na zama ndani kwenye kazi yako, kadiri unavyoweka muda zaidi ndivyo inavyokulipa zaidi. Kazi za hovyo hufanywa kwa haraka, akili kubwa ni kujipa muda wa kufanya vizuri kile ambacho wengine wanafanya vibaya.

Somo; hakuna njia ya mkato ya kufikia mafanikio makubwa, yeyote anayekuambia njia hiyo ipo anataka kukutapeli. Jipe muda, kama ukiwahi sana jua itakuchukua miaka 10, lakini mara nyingi ni zaidi ya hapo. Acha papara za kutaka mafanikio ya haraka, hayapo. Jipe muda, weka muda wa kutosha kwenye kazi yako, jua kwa kina kile unachokifanya na kazana kuwa bora, kila unachoweka kitakulipa zaidi.

(07 ). KUWA  NA  MPANGILIO.

Amelia; kazi inayofanywa bila mpangilio siyo kazi nzuri, ni uzembe au mtu anayefanya ana matatizo ya akili. Siwezi kuamini kati ya mtu ambaye hana mpangilio, kazi ambayo ni ya hovyo, duni na isiyoeleweka.

Somo; kuwa na mpangilio kwenye kila eneo la maisha yako, tenga muda wako kwa mambo sahihi na utumie hivyo, pangilia vizuri eneo lako la kazi na kila eneo la maisha yako pia. Usiwe mtu wa kukurupuka na kufanya kila kinachokuja mbele yako. Tenga muda wa kazi na fanya kazi, tenga muda wa kupumzika na pumzika. Kazi yako ifanye kwa namna ambayo mtu akiona anajua kweli umeweka juhudi kwenye kuifanya.

(08 ). HESHIMU  KAZI  YAKO.

Amelia; usijione wewe ni bora kuliko kazi au biashara yako. Kuwa mnyenyekevu, heshimu kile unachofanya na kipe heshima na umakini wa kutosha. Hata kama kuna vitu vingine unafanya, usichukulie kitu hicho kama ni cha pembeni. Kama ni mwandishi na pia ni daktari, usichukulie uandishi kama kitu cha pembeni, bali kipe heshima kama kitu kikuu kwako.

Somo; weka moyo wako wote, akili yako yote na umakini wako wote kwenye kile unachokifanya. Kwa maana hiyo, unahitaji kuchagua vitu vichache ambavyo utavifanya vizuri kwa kuweka kila kitu chako kwenye vitu hivyo na kupuuza vitu vingine vyote. Acha kuhangaika na kila kitu, kutawanya nguvu na umakini wako, maana hilo litakuzuia wewe kufanikiwa.

(09). USIWE   NA  HASIRA.

Amelia; usiangukie kwenye hasira na hisia nyingine hasi pale unapokutana na majaribu. Mara zote kuwa na furaha na moyo mkunjufu, ifanye kazi yako kwa moyo mmoja na amua kuweka kila kikwazo pembeni. Na zaidi ya yote kuwa na furaha huku ukijua utapata unachotaka kama hutakata tamaa.

Somo; mambo hayatakwenda kama ulivyopanga, utakutana na vikwazo vya kila aina, wakati mwingine watu watakuzuia au kukukwamisha kwa makusudi kabisa. Hali hiyo itaibua hisia hasi ndani yako, hasira, chuki, kinyongo na nyingine. Epuka kuruhusu hisia hizo kukutawala, badala yake ziondoe na tawaliwa na hisia chanya ya furaha na matumaini. Endelea kuweka juhudi huku ukijua kila kikwazo kitashindwa kama wewe hutakata tamaa.

Angalizo; Amelia anatoa angalizo hili kuhusu siri hizi za mafanikio; kuna watu unaweza kuwaona wamefanikiwa kwa kutumia njia ambazo siyo sahihi, lakini jua hili, mafanikio yao hayatadumu kwa muda mrefu. Asili huwa haiibiwi, huwa inalipa kila ambacho mtu anafanya. Anayepata mafanikio kwa njia zisizo sahihi atalipa kwa kuyapotea. Na wewe unayetumia njia sahihi, hata kama utachelewa, utafikia mafanikio makubwa kama unavyotaka.

Amelia pia anashirikisha kwamba msingi wa mafanikio yake ulijengwa miaka mingi kabla hajafanikiwa. Alianza kuyaona mafanikio baada ya miaka 45 ya kazi bila ya kuchoka ndiyo alipata alichokitaka. Anasema mara nyingi akili yake ilikwamisha, mikono yake ilimkwamisha, miguu yake ilimkwamisha, lakini anashukuru roho yake haikuwahi kumwamisha.

Na hicho ndiyo unachohitaji ili ufanikiwe, roho ambayo haitakukwamisha, imani na matumaini kwamba licha ya kupitia magumu, bado utafanikiwa kama tu hutakata tamaa.

JE , WAHITAJI KUFANIKIWA SANA NA KUFIKA MBALI ? ZINGATIA MAMBO HAYA .

---

Kama unataka kujenga maisha yako ya mafanikio, na ukajikuta mbali sana, unaweza ukazingatia sana mambo haya mawili tu. Haya ni mambo ambayo yamewasaidia sana wengi kufanikiwa;-

 #1. Linda kazi yako ya siku na anzisha biashara ya muda.
Kama umeajiriwa anza na kulinda kazi yako kwanza, na kama umejiajiri, chunga sana kipato chako, hiyo inakusaidia sana, kujifunza biashara, na kuchukua uzoefu mkubwa wa biashara. Pia inakusaidia kuchukua umiliki wa maisha yako ya baadae, ya kwamba utakuwa wapi mara baada ya muda fulani.
Kwa kadri unavyokuwa kwenye ajira au biashara yako na huku unafanya biashara nyingine ya pembeni itakusaidia sana kujifunza mengi ambayo usingeweza  kujifunza kama usingeanza kabisa biashara hiyo.

 #2. Wekeza katika nyumba.
Ukiwekeza katika nyumba, ama "real estate" ni rahisi kwa benki kukupa mkopo na ukasonga mbele sana kimafanikio. Hivyo kazana kujenga nyumba hata kama ni ndogo ndogo tu, kwa ajili ya mikopo.
Wawekezaji wengi, wanafanikiwa kwa sababu ya kutumia mikopo ya nyumba. Unasubiri nini, anza kuwekeza kidogo kidogo kwenye nyumba ili ikusaidie kuchukulia mkopo, ila hakikisha isiwe nyumba yako ya kuishi.