USIKIMBILIE UMAARUFU, UTAKOSA AMANI ,FURAHA NA UHURU.

Leo hii kila utakayeweza kuonana naye basi ndani kuna matamanio ya kutamani ajulikane na watu wengi. Iwe ni biashara, bidhaa, huduma au chochote alichonacho kipate umaarufu au kutambulika kwa watu wengi. Umaarufu limekuwa lengo mojawapo la watu wengi maeneo mbalimbali Duniani likitanguliwa na PESA.

Wapo wanaotamani kuwa maarufu katika wanachokifanya, wapo wanaotamani kuwa maarufu katika eneo dogo walilopo au hata kwa ukubwa. Matamanio haya ya watu wengi kutaka umaarufu mengi yanachangiwa na kutafuta furaha. Wengi wanafikiri watakapokuwa maarufu basi watakuwa na furaha isokoma.

Umaarufu unakuja na gharama zake. Gharama zake ni kunyang’anywa kwa uhuru na furaha. Mtu aliye maarufu atajitahidi kuhakikisha kuendelea kuwafurahisha wengine. Kufanya hivi ni kuuza uhuru na furaha ya maisha ndani ya mtu. Umaarufu wa mtu umefanya wengine wasiwe huru kuishi maisha ya kawaida kama watu wengine, kula au kuishi kama wengine. Matokeo ya maisha yasiyo halisi huanza kukaribia kwa watu wengi walio maarufu.

Hujawahi ona namna maisha ya watu wengi maarufu yanaishia katika njia isiyo nzuri. Wapo ambao wanaishia kuanguka katika walichokuwa nacho na umaarufu, wanaanguka katika starehe na wengine wanaanguka katika matatizo ya afya ya akili kama sonona. Je ni mtu aache kutafuta umaarufu ?. huenda likawa swali kwa watu wengi wanapoona mbona kuwa maarufu ni mzigo.

Falsafa ya Ustoa inahimiza namna utulivu na uhuru ni mambo makubwa muhimu ya kuyashikilia katika maisha ya kila siku. Licha kuwa wastoa wengi hawapendelei kuweka lengo na nguvu kuwa maarufu ila namna maisha yao na yale wanayoyasimamia yanafanya kazi zao ziende mbali na kujulikana na watu wengi. Umaarufu utokanao na kazi bora unatengeneza njia iliyo na nguvu na kulinda uhuru wa mtu.

Masikitiko makubwa ni pale watu wanapokuwa na njia isiyofaa ya kutafuta kujenga umaarufu. Umaarufu wa kutumia njia za mtu kujishushia utu wake ni umaarufu unaovuma kwa muda kisha anguko lake huwa baya. Wengi ambao wamejenga umaarufu kwa njia ambazo hazikuwa halali au za ujanja ujanja muda huwaangusha hapo baadaye. Umaarufu ni gharama na mtu anapokwepa gharama huanguka mbele ya safari.

Pia utakuwa umewahi ona namna watu wengine wanavyojaribu kutumia njia za mikato kujenga umaarufu na huwa hawafiki mbali wanaanguka. Huenda wengine kuiba hadi kazi za watu, majina ya watu, kuiba majina ya bidhaa na mwisho hawadumu katika walichokifanya wanapotezwa hawasikiki tena. Umaarufu una gharama na mtu anayekwepa hii gharama anaruhusu njia ya kuanguka hapo baadaye.

Si watu wote ambao mara baada ya kuwa maarufu wanabahatika kukutana na maisha ya uhuru na furaha. Wengi wanapoteza haya mambo makubwa mawili; uhuru na furaha. Hawawi tena huru kufanya yale ambayo wao wenyewe wangeweza kufanya ila isipokuwa wanafanya katika kuwafurahisha wale wanaowafuatilia. Pili ni upotevu wa furaha kadri mtu anavyokuwa na kundi kubwa la watu wanaomfuatilia pale anapokosa kujua nini alichokuwa akikihitaji pindi akiwa maarufu. 

KOCHA MWL.JAPHET  MASATU

 WhatsApp +255 716924136 )  /    + 255 755400128

 

STADI ZA KAZI---DARASA LA KWANZA ( STD 1 )---TUCHORE PICHA KWA KUTUMIA VIGEZO---NUKUU ZA SOMO--NOTES---KWA SHULE ZA MSINGI---TANZANIA----( PDF )

ISHI KAMA MKONDO WA MAJI , SIRI YA KUISHI KWA AMANI NA FURAHA.

Tunacheleweshwa katika maisha kuyaona kama zawadi kwa mambo mengi ambayo bado tumekuwa wazito kuyaacha yapite na turuhusu kuona thamani ya wakati tulio nao sasa. Ugumu mwingine ambao watu wanajitengenezea ni huu wa kuendelea kushikilia vitu au mambo yalokwisha kupita. Walio huru na kufurahia maisha ni wale wote ambao muda ukipita basi wanaruhusu nayo mambo yapite.

Naamini katika maisha yako umewahi pita eneo la mto au hata kuona mfereji wa maji unaopita katika mkondo wake. Ukitulia na kuangalia kwa macho yako mawili utaona namna maji yapitavyo na ikiwa utaweka kitu juu au kurusha ndani ya maji hayo hubebwa na kusafirishwa. Hili si ajabu kuona namna mikondo ya maji hukusanya vitu toka eneo lingine na kwenda kupeleka eneo lingine. Hili ni somo pana na kubwa la kifalsafa linalofundishwa na asili namna ya kuachilia vitu na tuviruhusu kupita.

Wangapi umekutana nao wakiwa na kauli za mambo yalopita au bado kufikiri kwa habari zilizopita. Wangapi ambao hadi sasa wameshindwa kuchukua hatua kwa sababu ya kuweka lawama kuwa asingekuwa fulani nisingekuwa maskini au kuwa hapa leo. Kauli za kujikatisha tamaa na kuendelea kuzitumia ziendelee kuwa na nguvu hata muda uwapo umepita kimekuwa kikwazo kwa watu wengi kuona wanahitaji kubadilika na kuanza maisha mapya na kuruhusu kufurahia wakati wa sasa. Utafungwa na nyakati zilizopita hadi lini kwa kushindwa tu kuachilia ili uruhusu upya ndani ya maisha yako ?

Nimekuja kugundua namna nilivyokuwa nikiachilia mambo yapite ndivyo nilivyokuwa naachia nafasi ya kufurahia maisha, kuwaza kutofauti na kuishi kwa utulivu mkubwa wa ndani. Si mimi pekee huwa naliona hili hata kujifunza kwa watu wengine wenye maisha imara, utulivu na furaha ni watu ambao huachilia mambo wanayokutana nayo. Kuachilia kwao kwa mambo na matukio wanayokumbana nayo maishani kumewazawadia utulivu na maisha ya furaha wakati wote.

Ukiishi namna mto unavyobeba vitu na kuvipitisha hutosumbuliwa na chochote kile. Wakati watu wanaendelea kufikiri yalopita wewe utakuwa ukitumia sasa yako vizuri na kuifurahia. Utakapokuwa unaruhusu kuachilia vitu vipite utakuwa ukitengeneza akili tulivu na kuepusha msongo wa mawazo ambayo ni hali inayowasumbua maelfu ya watu kwa kushindwa tu kukubali na kuachilia mambo.

Mstoa Marcus namnukuu “A person can stand by a mountain stream and insult it all day long—the stream remains pure. Even if they throw dirt into it, the dirt is quickly dispersed and carried away. Let your soul be like that stream—flowing freely, simply, and contentedly”, Hii ikiwa na maana “Mtu anaweza kukaa katika mkondo wa maji mlimani na akatukana siku nzima juu ya mkondo wa mto nao usiseme kitu. Hata ikiwa mtu atatupa uchafu ndani yake, si muda uchafu utasombwa na kuchukuliwa. Hebu chukulia nafsi yako iwe kama mkondo, mkondo ulio huru”. Maneno haya ni mazito na kuyatafakari kwa kina namna umuhimu wa kuachilia nyakati zipite na mambo yapite.

Chochote kile utakachokutana nacho maishani jua kuwa kitapita endapo utaruhusu kipite kama ulivyo mkondo wa maji upitishavyo vitu. Hili litakusaidia kukufanya uwe imara, mwenye furaha na kushiriki katika zawadi ya maisha kikamilifu.

KOCHA  MWL.  JAPHET  MASATU

WhatsApp +255 716924136 /  +  255 755400128   /  + 255 688 361 539

 

MAKUNDI MATATU ( 03 ) YA WATU KATIKA KUSTAHIMILI MAGUMU NA VIKWAZO MAISHANI.

Tunaishi katika zama ambazo watu wengi wanapokutana na magumu hukimbia, hurudi nyuma, hukata tamaa na wakati mwingine wapo ambao huchukua maamuzi ya kukatisha maisha yao. Magumu hayaepukiki katika maisha na yule ambaye anaweza kushinda na kuvuka ndiye mtu aliye shujaa na hodari na wakati mwingine mtu huyo huwa kivutio, mfano wa kuigwa na kioo cha kujitazamia.

Leo tunaenda kuangalia makundi makubwa matatu ya watu walivyo wanapokutana na magumu na uwezo wao wa kustahimili kushinda au kuvuka vikwazo hivyo. Jiangalie katika kila kundi namna gani maisha yako umekuwa ukiyaendesha kila siku. Utakapojiona basi fuata njia ambayo itakupa kuwa na uwezo na nguvu ya ustahimilivu wa kushinda magumu na kuvuka vikwazo.

Kundi la kwanza ni watu laini “soft people” ndani na nje. Matukio au taarifa mbalimbali zinapojitokeza ni rahisi kutetereka kwa watu hawa, ni rahisi kuumizwa, hawawezi kustahimili. Huenda wakawa ni sawa na yai. Yai nje haliwezi himili mitikisiko kwa kani au nguvu ndogo tu toka nje wanavurugika haraka. Watu hawa wanaumizwa haraka na mambo yanapobadilika, hisia zao ziko nje nje kuvurugwa na maisha. Kundi hili lina watu wengi katika jamii ambapo mtu nje na ndani hawezi stahimili magumu au vikwazo. Huwa ni wepesi kuacha kitu walichokianzisha, wepesi wa kukata tamaa na hawawezi kujaribu wakiwa na hofu kubwa vipi endapo nitakutana na magumu itakuwaje ?

Kundi la pili ni watu walio na uimara kidogo nje na ndani wanaweza kustahimili kwa muda tu ila kadri mambo yanavyokuwa magumu ndivyo wanavyorudi kuwa kundi la watu wa kwanza. Wanavurugika mapema endapo magumu wanayoyapitia hayaoneshi dalili ya kupata majibu. Wanapoteza tumaini haraka kadri mambo yanavyozidi kuonekana mbele kiza kinene. Kundi hili wapo watu wengi pia ambapo huonekana ni imara kwa nje ila mambo yanapokuwa magumu basi unaona namna wasivyo na ustahimilivu, wanachoka haraka mambo yanapokuwa hayatokei majibu. Uimara wao hulainishwa kadri mambo yanavyozidi kujaa vikwazo na masumbufu mengi.

Kundi la tatu ni watu waitwao miamba “rocks”. Watu hawa ni miamba maana si nje wala ndani ni watu imara, hakuna kitu kigumu ambacho kinawazuia kusonga mbele, kadri magumu yanavyozidi kuwa mengi ndivyo wanavyozidi nao kuimarika na kuwa miamba zaidi. Watu hawa ni watu ambao hugeuza vikwazo, magumu na masumbufu wanayoyapitia kuwa njia ya kupita kuelekea ukuu na mafanikio. Kundi hili lina watu wachache ambao tunawapa majina ni mashujaa, hodari, miamba na mifano ya kuigwa. Njia yao huenda isiwezwe na makundi mawili ya juu ila hawa watu ndio wanaofanya mabadiliko makubwa katika maisha iwe ni eneo la biashara, uongozi, taaluma, sanaa na maisha kwa ujumla. Falsafa ya Ustoa inakuandaa uwe katika kundi hili kuwa hakuna kitu kitachokukwamisha katika maisha yako. Kuwa katika magumu si wakati wa kukimbia ila ni wakati wa kukabiliana na vikwazo na kuvishinda.

Marcus anasema "The impediment to action advances action. What stands in the way becomes the way". Akiwa na maana “kuwa kila kikwazo mbele yako ni njia”. Magumu yote ambayo utapitia yanakuandaa kuwa hodari, kuwa na subira, kujijenga kihekima na kiuzoefu. Mwaka huu utakutana na matukio mengi na matukio yote yatakayojitokeza yafanye njia na kuwa mtu mwamba kuvuka hilo eneo. Haitakuwa rahisi ila utaweza kadri usivyoruhusu kukimbia utakapokuwa unapitia changamoto au magumu.

KOCHA  MWL.  JAPHET    MASATU

 (  WhatsApp  + 266 716924136  ) /  + 255 755 400128  /  + 255 688 361539

 

INATOSHA KUWA UNACHOKIFANYA NI KIZURI HUHITAJI PONGEZI ZA WATU

 Mitandao ya kijamii imeteka watu wengi na kuwaumiza wengi pale ambapo watu wanashirikisha maisha yao au matukio fulani ili watu wengine wawapongeze au kuwafurahia “likes” au “Comments”. Ikitokea mtu kashirikisha kitu iwe picha yake na hakuna mtu yeyote anayesema umependeza au unaonekana vizuri basi watu wengi wanaumia kuwa inaonekana watu hawajapenda nilichofanya. Watu wengi wanakazana lakini wanaumia kuwa wanachokifanya watu hawatoi mrejesho.

Zama tuishizo zimekosa subira pia katika kuweka mambo ya siri kuwa siri na ya umma kuwa ya umma. Ila watu wengi utaona maisha ya siri au mambo ya faragha wanasukumwa kushirikisha wengine kwa nia mbalimbali na moja ni kupongezwa na watu wengine. Matarajio makubwa ambayo mtu anaweka kuwa akishirikisha atapongezwa na asipopongezwa huumia ndani yake. Huu ni mtego na utumwa ambao unawaendesha watu wengi wasio na udhibiti wa maisha yao.

Mstoa Marcus Aurelius nanukuu “A man when he has done a good act, does not call out for others to come and see, but he goes on to another act, as a vine goes on to produce again the grapes in season.” Hii ikiwa na maana “Mtu ambaye kafanya tendo jema, hapaswi ita watu wengine waje na kuona, ila huendelea na tendo lingine jema. Hufanya vile mzabibu utoavyo zabibu kila vipindi vyake”. Matendo mema hujitangaza yenyewe na hutoa mchango mkubwa kwa maisha bila msukumo wa pongezi au hongera toka nje.

Huhitaji pongezi ndo uendelee kufanya kitu chochote kilicho bora katika maisha yako. Ondoa haya matarajio na huu utumwa ambao utakuzuia kufanya mambo mazuri katika maisha. Ikiwa unachokifanya ni kizuri basi furaha ya ndani kukifanya inatosha na huhitaji kulazimisha watu watoe pongezi kwa ulichokifanya. Wengi huu mtego hunasa hasa pale ambapo wanafanya vitu vizuri na wanasukumwa kuwashirikisha wengine kwa lengo la kusikia “hongera” au “keep it up”. Ukikosa mrejesho huo utaumiza hisia zako na kama wanafalsafa hatuhitaji kuumia kihisia kwa vitu vilivyo katika udhibiti wetu.

Endelea kutenda yaliyo mazuri bila msukumo wa nje kufanya hilo. Nguvu kubwa ambayo unaweka katika kufanya yaliyo na mchango chanya yanatengeneza utoshelevu mkubwa ndani ya mtu atendaye. Hili linatosha na mengine yatakayotokea ni ya ziada si lazima yatokee. Si lazima watu wakupongeze kwa kazi nzuri unayofanya, si lazima kupongezwa kwa hatua nzuri ulofikia. Usikubali kuwa mtumwa wa kuhitaji wengine watambue unachokifanya. Kazi yako ni kutenda kilicho kizuri na hili latosha katika safari ya maisha mengine ni ya ziada tu.

Jifunze kufanya kitu kilicho kizuri au kupiga hatua nzuri katika maisha na usiumizwe na hali zozote zitakazojitokeza za watu kutojali ulichokifanya, kutokupongeza au kupata utambulisho au utambuzi wa mchango wako “recognition”. Hesabia kuwa sehemu ya pongezi si jambo la lazima kupata. Inatosha kufanya kazi nzuri na ndani yako kupata utoshelevu na furaha. Shinda jambo hili ili uwe na utulivu mkubwa ndani yako. Zoezi hili linaweza kuwa gumu kuanza ila ukishazoea hutakwamishwa na chochote kile wala kuumizwa na matarajio “expectations” unayoweka maishani.

Jitahidi kusoma kitabu cha mwandishi William Irvine cha “A Guide to Good Life” kikiwa kinampa msingi mwanafalsafa yeyote mchanga ambaye atapenda kujifunza falsafa ya Ustoa. Kisome na kiishi hakika utakuwa imara katika maisha yako.

KOCHA    MWL.  JAPHET   MASATU

WhatsApp  +255 716 924 136

USIPOTENGANISHA NGAZI HIZI TATU ZA MAHUSIANO , MAISHA YAKO YATAJAA FURAHA.

 Adui wetu wa kwanza katika chochote tunachotaka kukifanya katika maisha yetu ya kila siku ni Mwili. Mwili umeumbiwa tamaa katika asili yake na utumwa wowote wa maisha basi umekaa katika mwili wa mtu. Tamaa za mwili, tamaa za chakula, ulafi, ulevi vyote vinatoka katika utumwa wa mwili. Mwili unapokosa udhibiti toka ndani ya mtu ni njia rahisi ya maharibifu ya maisha kutokea. Hujaona watu wanavyobadilika kimaisha kwa kukosa udhibiti wa tamaa zitokanazo na mwili ?

Yote haya yanatokea katika mili yetu kwa kuwa hatutoi nafasi ya kujenga mahusiano mazuri na miili yetu. Hili ni kosa kubwa ambalo tunafanya na linatugharimu kushindwa kuishi maisha bora na ya kifalsafa. Mwili ndio ulio na ulimi, macho, miguu, via vya uzazi, ubongo, tumbo na kadhalika. Maeneo yote haya ya mwili yakikosa udhibiti toka ndani hutumika kuleta maisha ya mateso na masumbufu. Hebu fikiria unapokosa kutumia kiungo ulimi vizuri namna utaumiza wengine wengi kwa kauli zako au kutumia vibaya ubongo wako utafikiria mambo mabaya na yenye kuleta madhara kwa wengine.

Lini umekaa na kuushukuru mwili wako kwa mazuri na kuona ni chombo cha thamani kinachokupa heshima ya uwepo wako ?, Lini mwili wako umeupenda na kuupa chakula kizuri, maarifa safi, mapumziko na udhibiti wa mihemko?. Mahusiano mazuri unayojenga katika wewe na mwili wako ni mwanzo wa maisha bora na yenye furaha.

Hiyo ni ngazi moja ya mahusiano matatu makubwa ya maisha yetu. Maeneo mengine muhimu mawili ni “Utambuzi wa Asili yako Kiroho” na Tatu ni “Mahusiano ya Watu wanaokuzunguka Kutenda Haki na Ukarimu”. Ukiziweka ngazi hizi tatu kwa pamoja ni matokeo ya maisha bora na ya furaha.

Ngazi ya pili ya utambuzi wa asili yako kiroho ni mahusiano mengine ambayo watu wengi wamejisahau, wapo gizani na hawalipi uzito katika maisha yao. Kukosekana kwa mahusiano mazuri ya mtu na asili yake ndo panapozaliwa utupu “emptiness” ndani ya mtu. Hii utakuwa unaona mtu ni tajiri, maarufu, kiongozi mkubwa lakini asiye na furaha ndani yake licha kuwa mmiliki wa utajiri mkubwa. Mtu anaweza kuonekana nje ni mwingi wa utajiri ila ni maskini wa roho yake. Utajiri wa roho au utambuzi wa asili kiroho ni mahusiano yanayoleta tuone furaha na maana kubwa ya uwepo wetu katika maisha.

Ngazi hii ya kiroho inatupa kuwa na mtizamo mpana wa maisha. Inatupa tuweze kukabiliana na jambo lolote gumu linaloweza kujitokeza maishani. Ngazi hii inatuunganisha na umoja wetu wa asili na kuwa tu sehemu ya asili na tu wamoja. Ngazi hii inatukumbusha namna lolote tunalofanya kwa wengine si kuwa tunawafanyia hao bali sisi nasi tunaathirika kwa kutenda huko. Mahusiano ya ngazi hii ni sawa na pigo la maji na jiwe linavyoweza yatawanyisha wimbi moja hadi lingine. Ukikomaa ngazi hii utaona namna chochote kinachotokea katika asili kina maana na kinatufungua kufahamu mambo yaliyo zaidi ya kuona kwetu.

Ngazi ya tatu na ya mwisho na ngumu ni “kuishi na watu wanaokuzunguka”. Mtu aliye na jina jema kwa watu wengine utagundua kitu kimoja kikubwa anakimiliki ndani yake. Hicho kitu ni kuwa na mahusiano mazuri ya ngazi mbili tulizozungumzia. Hii ikiwa na maana ana mahusiano mazuri ya yeye mwenyewe “mwili wake” na ana mahusiano mazuri na utambuzi wa kuwa yeye ni mtu wa kiroho. Hutaweza kuona taabu kutenda haki na ukarimu kwa watu wote endapo ndani yako kuna utajiri wa kujua binadamu wote tumeumbwa kusaidiana na kutegemeana. Matatizo yote tunayofanyiana sisi binadamu kwa ubaya ni kwa kuwa ndani yetu tu maskini wa kujitambua na kutambua asili yetu ya kiroho. Watu wote walowahi kuishi na kuacha alama za matendo yao mema basi wana sifa kuu ya haki, ukarimu, upendo, kujitoa na kuwa tayari kufa au kuteketea ili wengine wapate kufaidika.

Hitimisho, navutiwa na kazi za Marcus Aurelius katika kitabu chake cha “The Meditations” ikiwa na maana ya “Tahajudi/Tafakari za Kina” akisema “You have three relationships: First, to your own body; second, to the divine Source of all life and existence; third, to your fellow human beings. And so you have three responsibilities: First, to use your reason to master your body and make right judgments; second, to gratefully accept all that happens in the universe; third, to treat all people with justice and generosity”.

Maana ya kifungu hapo juu Marcus Aurelius anasema “Una mahusiano matatu: Mosi, juu ya mwili wako: Pili, juu ya kiini chako cha kiroho na uwepo wako duniani: tatu, ni juu ya binadamu wenzako. Katika mahusiano haya matatu una majukumu matatu: Mosi, kutumia kufikiri na kuutawala mwili wako na kuamua sahihi; pili, kuwa mwenye shukrani na kukubali kila litokealo katika asili; tatu, ni kuwatendea watu wote haki na ukarimu”.

Yaweke haya mambo matatu pamoja mwaka 2021 na siku zote za maisha yako. Haitakuwa rahisi kwa kuanza lakini kadri unavyoweka nia ndivyo utakavyoendelea kuimarika kwa hizi ngazi zote tatu kwa pamoja. Utoshelevu mkubwa unaokuja kwa kuishi ngazi hizi tatu hauelezeki.

KOCHA    MWL.  JAPHET   MASATU

WhatsApp +255 716 924 136

JIFUNZE KUHUSU ASILI NA ULIMWENGU KUJIHUSU WEWE.

Mwaka 2020 nilikuwa nikijipa zoezi kubwa la kubadilisha kila juma lilolokuwa likipita kwa kulipa jina na kukisoma kitu hicho kwa kina na kukiishi. Nilifanya majuma mengi yaloenda kwa majina kama “Utulivu”, Muziki, Upendo, Machozi, Utoaji na Asili. Somo la asili nilikuwa nikishirikisha tafakari nyingi kuhusu asili kwa siku saba kupitia mtandaoni tu kwa njia ya kuta za mtandao “Status wall”. Somo hili lilipendwa na wengi na wengi waliona namna wanapata nguvu mpya kuona kumbe asili ni mwalimu na mtunza siri za nguvu kubwa za Maumbile mbalimbali ulimwenguni.  

Nikatia uzito zaidi wa somo hili la asili nilipoona na Marcus Aurelius Mstoa naye kaandika katika kitabu chake cha “The Meditations”. Namnukuu “The more you learn about nature and the universe, the more you learn about yourself. For without knowing where you are, you can’t know who you are, or the role you have to play”. Maneno haya yakiwa na tafsiri ya “Kadri unavyojifunza zaidi kuhusu asili na ulimwengu, ndivyo unavyojifunza mengi kujihusu wewe. Kama ilivyo usipojua utokako, ni Kazi wewe kujijua wewe ni nani au una kazi gani kubwa hapa “duniani” ya kufanya. Maneno haya ndio yanayoenda kubeba msingi wa barua yetu ya leo.

Asili ni mwalimu wa falsafa ya utoaji usiokoma. Ona jua linavyofanya kazi pasipo kuchoka kwa watu wote, ona namna usiku na mchana usivyokoma, ona namna asili ina mimea na wanyama ambao kwa mategemeano kuna chakula na hewa safi inayosaidia viumbe hai kuendelea kuishi. Ona namna asili licha kuwepo kwa vifo vya viumbe bado inaleta uzao mpya usiokoma vizazi hadi vizazi. Utoaji huu unafanya asili iendelee kustawi na kukua kusikokoma.

Asili ni mhifadhi wa hazina ya hekima kupitia vilivyomo kuanzia mimea, wanyama, watu, milima, bahari, mito na mabonde. Masomo makubwa ya maisha hutayakosa ukijifunza moja kwa moja kutoka katika asili. Watu hutalii maeneo mbalimbali duniani ili wajifunze maisha na kujifahamu zaidi. Hazina ya hekima iliomo katika asili haipimiki na haielezeki. Mimea hutufunza juu ya utoaji, juu ya ustahimilivu, juu ya utetezi wa uhai na juu ya upendo usiokoma. Mafunzo yamehifadhiwa na asili kwa viumbe wote wenye udadisi kuyafaidi na kujifunza.

Asili ina Nguvu zisizokoma zinazofanya kustajaabisha namna mambo hufanyika. Kila eneo la asili linaloonekana na lisiloonekana limefanywa katika nishati. Nishati au nguvu zimebeba maana ya maisha na nguvu hii haiharibiwi na chochote isipokuwa hubadilika umbile lake. Kila kitu unachokiona ni nishati kwa udogo wake. Karatasi unayoiona nayo ni nishati tulivu ambayo inaweza kubadilika kuwa nishati mwanga, sauti au joto. Choma karatasi ambalo awali uliona ni tulivu lisilo na madhara uone namna karatasi hilo linawaka, linaang’aza na kutoa sauti. Watu wote wanaojua wao ni sehemu ya hii Nguvu ya Asili hufanya mambo makubwa yasowezwa kupimwa.

Asili ina utajiri na utele kwa viumbe wake wote na haiwezi kukaukiwa kwa kuwa inatoa isivyo kawaida. Hutaona asili inaishiwa isipokuwa watu wanaokaa wanaweza tu kuharibu maumbile kwa hasara tunayoitengeneza wenyewe. Walio na utulivu na kupenda kuithamini asili basi ina wingi wa utajiri wa mambo yasowezwa kumalizwa na mtu awaye yeyote kwa mara moja. Kila kitu unachokiona kipo kwa ukubwa usioweza kubebeka. Unaweza kusema umeona mtu ni mkarimu au mwenye upendo ila hujakutana na mtu mwenye upendo kuzidi huyo.

Unajifunzaje kujihusu wewe kupitia asili?, tumeona asili ina nguvu na kuwa kila kilichomo ni nishati au nguvu ilofichwa katika maumbile tu. Watu wote bila kujali chochote kwa maana ya jinsi, umri au utaifa kuna nguvu ndani yetu. Kila kitu chenye umbile kina nguvu iliyofichika ndani yake. Nguvu ndio kiini cha maisha na matokeo makubwa yoyote tunayoyaona. Iwe ni ubunifu, kuamka kiroho, ugunduzi na utoaji ni muunganiko wa nguvu zilizopo ndani yetu zilizo mamoja na asili na mazingira yanayotunguka. Kadri unavyojifunza asili iwe kwa kutazama kwa utulivu na kupata kuzijua siri na ajabu zake, au kufanya tahajudi ndivyo unavyojikuta u sehemu moja na asili na huu ndio mwanzo wa kujua kusudi kubwa la uwepo wa mtu kuwa hapa Duniani.

Kusudi la mtu lipo katika nguvu ambayo inafanya njia kwa ajili ya watu wengine “Mtengeneza Njia”. Si watu wote hupata nafasi ya kuamka “uwezo wa kuona mbali” na kujitambua kuwa wana nguvu na wana uwezo fulani wa kufanya makubwa. Watu wanaopata nafasi ya kujitambua husaidia na wengine wajitambue na wajifahamu zaidi walivyo. Hili ni zao kubwa la kila anayejibiidisha kujifunza kutokana na asili na ulimwengu.

Tenga muda katika maisha yako kuwa na utulivu wa kutembelea maeneo tulivu kama mbuga, mashamba, misitu, sehemu za milima na pata saa za kutafakari na kutuliza akili uone namna asili iko karibu na wewe na inao utajiri mkubwa, upendo, makazi na nguvu kubwa ya kusaidia watu kuelekea kujitambua na kuamka kihisia, kimwili, kiakili hadi kiroho.

KOCHA   MWL.  JAPHET   MASATU

WhatsApp +255 716  924 136