ISHI SASA , ISHI KAMA HUTAISHI TENA.

Kuishi tunaishi mara moja na nafasi hii tunapoipoteza ndivyo tunavyopoteza dhahabu katika mikono yetu. Wakati ambao tunao sasa ni wa thamani mno kiasi kwamba ingetokea ni nafasi ya kupatikana tena basi watu wengi walokwisha yaaga maisha ya dunia wangeomba warudie kuishi tena. Ila haitokei tena hii nafasi ifikapo ukomo wake endapo hatutaweza kuipa uzito kuwa ni fursa ya muda mfupi mno.

Tunapokuta wengine wakiyapoteza maisha huwa tunakumbuka kuwa kumbe maisha yetu ni mafupi na yanakimbia mno kuisha. Ila ikitokea hakuna taarifa zozote za watu kufariki basi huwa tunasahau hilo na kuendelea kuyapoteza maisha yetu kwa vitu ambavyo havitupi nafasi ya kuishi vizuri au kutumia nafasi ya kuwa hai kwa utoshelevu. Maisha huendelea na hukatika kama kamba ilochakaa na kuanzia hapo hakuna tena marudio kuwa utaishi tena au upya.

Nafasi ya kuishi ni adimu mno na ya kuthaminiwa zaidi kuliko chochote kile. Maisha yana maana endapo mtu yu hai ila baada ya hapo mtu husahaulika. Nafasi hii ya kuishi inatupa mwaliko wa kuanza, kuthubutu, kupenda, kusaidiana na kuwa tayari kuandaa njia kwa ajili ya watu wengine ambao watakuja badala yetu sisi. Kila mmoja ambaye huwaza hili kuwa maisha huisha basi hupata mwamko na hamasa kubwa ya kuishi akijiandaa au akiandaa mazingira mazuri kwa watakaokuja nyuma yake.

Unaweza ukawa unapitia mambo magumu katika maisha ila ukitulia na kugundua bado moyo unadunda, pumzi bado unavuta huu ni utajiri mkubwa mno. Maana licha magumu umeyapata ila kama hayaondoi uhai wako basi ni njia bora ya kuimarika, kuwa mstahimilivu na mtulivu ukiwa na falsafa ya kuyaongoza maisha yako kuwa hakuna kitu kitakuwa kigumu wakati wote au hakiharibiwa na muda.

Furahia kila nafasi unayopata ya kuamka na kukuta bado unapumua na mwili unafanya kazi. Furahia hii zawadi kwa kuishi kwa ukubwa, kuishi kwa uzito na kuishi kana kwamba muda ulonao ni mdogo na pengine unachokifanya ndo unakifanya kwa mara ya mwisho haitakuja kutokea tena. Maisha ni haya haya yaendayo yasodumu hivyo thamini kila nafasi ya wewe kuwa hai.

NA KOCHA  MWL.  JAPHET   MASATU , DAR  ES  SALAAM , TANZANIA.

WhatsApp + 255 716 924136 /  + 255 755 400128 /  + 255 688 361 539

 

HOFU YA WATU WATESEMAJE , ITAUA NDOTO NA MAONO YAKO. KUWA WEWE / BE YOURSELF.

Tunangoja kuishi tukijua kuwa watu wengi wanatufikiria kumbe hakuna anayekufuatilia watu wanahangaika na maisha yao pia. Pia wengi wameshindwa kuanzisha vitu kwa kuhofia namna watu watakavyowasema. Hii hofu imeua ndoto nyingi za watu wasijue kuwa hakuna aliyekuwa anajali au kuwafuatilia. Watu wana asili ya kusahau kadri muda unavyosogea.

Falsafa inatufikirisha namna miaka 100 ijayo watu wanaokuzunguka wengi hawatakuwepo na kumbuko la wengi litasahaulika kabisa. Jinsi ambavyo walowahi kuishi wamesahaulika ndivyo hata sisi tutakavyosahaulika. Kwanini uogope kuishi sasa ukiwa hai, kwanini uogope kutumia kipaji au kwanini uogope kuziishi ndoto zako wakati miaka 100 ijayo hakuna atakayekuwepo ?.

Hofu ya kuwafikiria watu wakati hawakufikirii wewe ni upotevu wa muda katika zawadi ya maisha. Watu wengi wanaishi wakihofu hofu kubadili maisha yao na kupata mafanikio kwa hofu za wale wanaowazunguka. Hili linanyima nafasi ya watu wengi kujitambua kuwa maisha ni ya mtu mwenyewe na kila mtu anapitia changamoto mbalimbali katika maisha kiasi kwamba hawatakuwa wanakuwazia wewe tu masaa yote 24 katika siku.

Anza kuishi, anzisha vitu, weka mpango wa kubadili maisha yako huku ukiondoa hofu kabisa juu ya watu watakuchukuliaje. Ikiwa ni kitu kizuri na kitakuwa na manufaa kwako na wale wanaokuzunguka hata kama si sasa basi ivuke hofu ya watu watasemaje. Usikubali kuishi kwa kuwapendeza watu huku unajiumiza ndani yako. Kuwa huru kuishi katika uhalisia wako, ishi wajue uhalisia wako na hili ndo jambo muhimu kulifanya. Wengi wanaishi maisha ambayo si yao kwa kuogopa watu ingawa wangependa kuishi vizuri kwa nafsi zao.

Kila wakati ambao utakuwa unafikiria kuwa watu sijui watanionaje katika mambo mazuri jikumbushe kuwa miaka 100 watu wote ambao unaona sasa watanionaje hawatakuwepo na pengine na wewe hutakuwepo. Kuhofia hilo ni kupoteza nafasi hii ya maisha ulopata. Ishi kwa uhalisia pasipo kuogopa watu maana hakuna atakayekukumbuka miaka 100 ijayo.

NA   KOCHA  MWL.  JAPHET   MASATU , DAR  ES  SALAAM , TANZANIA.

 ( WhatsApp  + 255 716924136  ) /  + 255 755 400128  /   + 255 688 361 539 

EMAIL :  japhetmasatu@gmail.com

 

UWEZEKANO WA KUISHI MUDA MFUPI NA KUTENDA MAKUBWA UPO , TUMIA RASILIMALI MUDA VIZURI.

Muda ni rasimali muhimu sana katika kuleta mchango mkubwa duniani. Mtu hupimwa katika muda aloishi na namna katika kuishi alivyohusika katika kuleta mchango au athari fulani katika maisha ya watu. Si urefu wa maisha unaoweza kuleta mchango mkubwa ila ni katika uchache wa siku tuishizo mtu anavyozitumia vizuri kuwa mtu mwenye mchango au athari fulani inayobakia alama ya kudumu kunakothaminiwa.

Historia imebeba maelfu ya watu ambao hawakuishi muda mrefu ila alama walizoacha kwa vitu walivyofanya zimeendelea kudumu vizazi hadi vizazi. Ufupi wa maisha yao ulijenga uhai wa majina yao yaendelee kuishi daima. Muda haukuwa kikwazo kwao ila ilikuwa ni lulu ambayo walijua kuitumia vizuri kama nafasi inayoisha bila habari. Hili liliwasukuma sana kuchukua hatua, kuanzisha vitu na kufanya vitu vingi vinavyoendelea kuwasemea mema na alama njema walizoacha.

Napenda sana kufuatilia muziki wa Reggae na ninaposikiliza nyimbo hizi huwa najifunza kwanza kwa ujumbe uliomo hususani za Lucky Dube na Bob Marley, pili zinatengeneza utulivu wa akili na tatu zimeimbwa na watu ambao walipenda walichokifanya. Bob Marley anahesabika moja ya miamba mikubwa ya waanzilishi walokuwa na ushawishi kupitia muziki huu wa Reggae. Ushawishi wa muziki huu umeenea duniani kote licha Bob Marley kufariki dunia mwaka 1981 akiwa ni kijana wa miaka 36 tu. Unapozungumzia muziki huu huwezi msahau kumtaja huyu mwanamuziki

Maisha yetu ni mafupi na wakati mwingine katika ufupi wa hizi siku huwa hatuzitumii kwa uzito au utoshelevu. Ila watu wenye kupata ufahamu mapema kuwa maisha haya hukatika haraka kama kamba basi hufanya mambo makubwa kwa muda mfupi kwa njia ya kutumia muda wao vizuri kwa utoshelevu wakiweka akili zote kufanya mambo yaachayo alama. Ndivyo hutufundisha na sisi kutumia hii nafasi ya maisha tusojua inaweza kukoma lini kutumia kwa utoshelevu, kujisukuma, kufanya zaidi ya pale ambapo tumekwisha kufanya awali na kuandaa mazingira mazuri kwa ambao watakuja nyuma yetu.

Ili tuweze kutumia nafasi ndogo ya maisha kufanya makubwa kipindi kifupi ni kuanza kujifunza kuchukua hatua mapema, kutoghairisha, kutekeleza haraka iwezekanavyo. Haya mambo matatu ndio yanayofanywa na watu wote ambao huacha alama kubwa ndani ya kipindi kifupi cha maisha yao. Ni watu ambao huchukua hatua mapema, hawaghairishi mambo na tatu ni watu ambao wanatekeleza wanachosema haraka iwezekanavyo iwe mchana au usiku hutaka kuona matokeo.

Maisha tunaweza kuyafanya yawe marefu pale ambapo tunatumia nafasi ndogo hii ya maisha kufanya vitu kwa ukubwa. Tunapojifunza kutopoteza muda katika rasimali hii adimu ndivyo ambavyo tunatengeneza matokeo makubwa kadri siku zinavyoenda. Urefu wa maisha unawezekana kwa kutumia kila dakika na saa kwa kufanya mambo yatakayodumu na kufaidisha wengine kwa wakati wa sasa na ujao.

NA   KOCHA   MWL.  JAPHET   MASATU , DAR  ES  SALAAM , TANZANIA.

WhatsApp + 255 716 924136  /  + 255 755 400128  /  +  255 688 361  539

 

MCHEZO UITWAO MAISHA.

Chochote kile kinaweza kutokea au kumpata yeyote katika maisha yetu ya kila siku. Hii ndilo somo pana la maisha na asili linavyotuandaa kuwa lolote linaloweza kujitokeza bila kujali mtu, cheo au mazingira. Tumekuwa tunaona mfano kifo kinavyoweza kumkuta yeyote yule na wakati mwingine hata bila kutarajia tunasikia habari za vifo vya watu ambao tulifikiria huenda hawakutakia kufa sasa. Hilo ni moja linalojitokeza ambalo linatufundisha kuwa kwa yeyote yule kifo kinaweza kujitokeza. Maisha ni mfululizo wa matukio ambayo yanaendelea kutokea na kutufundisha kuwa yale ambayo tulikuwa tukiamini hayawezi kujitokeza hujitokeza. Kuna namna huwa tunafikiria sisi kuwa mambo yataenda vizuri kwa kuwa tumejiandaa vizuri ila huwa tunashuhudia namna mambo yanavyoenda vibaya licha maandalizi yalikuwa mazuri. Asili wakati mwingine inatufundisha tuone mambo kwa sura mpya kabisa. Maisha yetu yanapokaribia nafasi ya ujana na utu uzima huwa ni masomo mengi tunayoendelea kuyapitia kupitia visa na watu. Kuna mambo huwatokea watu wengine na hili linatuzindua akili kuwa hata kumbe watu wengine nao wanapitia magumu, wanaanguka, wanashindwa au wanafeli. Ukijifunza hili utajiandaa kuwa maisha yataenda kufundisha masomo magumu na kutuondoa ujuaji wetu wa mambo. Falsafa inatuandaa kwa hili kuwa tutaenda kushuhudia mengi ambayo tulidhani hayawezekani kutokea yatakatokea. Hili litagusa pia hata maisha yetu moja kwa moja kuwa mengine ambayo tutafikiria kuwa hayawezi kujitokeza kwetu basi yatajitokeza. Maandalizi ya kuwa mambo yanaweza kwenda tofauti ni muhimu mno ili uepuke kushangaa au kushangazwa na mambo yatakavyokuwa tofauti. Wengi huwa hawaamini hili mpaka pale ambapo mambo hujitokeza na kugundua kuwa maisha mambo hujitokeza si vile tutakavyo sisi ila hujitokeza namna yalivyo yenyewe tu. Katika kusubiri au kushuhudia wakati unaokuja mambo yaloonekana hayawezekani yakawezekana linaweza kujitokeza hata katika magumu au matatizo ambayo yapo sasa kuja kuwa na majibu wakati ujao. Magumu yalokuwepo jana na kuonekana ilikuwa ngumu kumalizika basi leo yamepata majibu. Ndivyo inavyojitokeza kuwa magumu ya sasa yataenda kupata majibu na njia itapatikana siku zijazo. Maisha ni mchezo wa ajabu usoacha kutufunza na kutubadilisha namna tulivyokuwa tukichukulia mambo yalivyo. NA  KOCHA  MWL.  JAPHET   MASATU , DAR  ES  SALAAM , TANZANIA  (  WhatsApp + 255 716  924 136 / ) /  +  255 755 400128  /  + 255 688361  53 9 EMAIL :  japhetmasatu@gmail.com

KUWA TAYARI KUISHI UHALISIA WAKO , UACHE ALAMA NJEMA.

Maisha yetu mengine huanza pindi tunapomaliza maisha haya ya mwili. Awamu hii ya pili ya maisha ni kuishi katika mioyo ya watu wakikumbuka namna tulivyogusa maisha yao kipindi uhai wetu ulipokuwepo. Nafasi hii ya kushuhudia kila kitu ambacho kimeachwa kama alama tuachayo huchipua pindi ukomo wa maisha yetu ufikapo na hivyo huwa hatuoni namna alama iloachwa bali waloachwa hushuhudia.

Maisha yetu ni alama na nyayo tunazoacha kuwa tulikuwepo wakati fulani wa maisha. Alama za maisha yetu zinabebwa na kumbukumbu ambazo zinaachwa mioyoni mwa watu ambao huwa tayari kubeba masimulizi kwa vizazi vingine. Watu wenye alama njema alama ya matendo yao huchipua na kuendelea kuishi kwa muda mrefu.

Kuishi katika vipawa na vipaji ulivyopewa kwa ukubwa au kutojibakiza ndivyo alama njema inavyoacha katika mioyo ya watu. Jina la mtu atendaye mambo mema hudumu na kukua zaidi. Mtu hukumbukwa kwa vile alivyowagusa watu kwa namna mbalimbali

Moja ya mambo niaminiyo kuwa uwepo wetu wa maisha ni kuacha alama ya vipawa, vipaji, ujuzi na uzoefu kwa kuandaa njia kwa ajili ya watu wengine. Tulipo leo ni kwa sababu ya majitoleo ya watu wengi ambao majitoleo yao hawakuweza kuona matokeo ya mbegu walizopanda, majitoleo yao ndio unafuu ambao tunao sasa na majitoleo yao ni njia ambazo leo tunapita kwa sababu yao. Tupo tuishi na kuacha Dunia katika nafasi nzuri zaidi tofauti na vile tulivyoikuta.

Kuishi bila kujibakiza ni maisha yatakayo moyo, ni maisha ya kujitoa sadaka, ni maisha ya kujisahau wakati mwingine ili uwe daraja kwa watu wengine. Kuacha alama njema ni gharama na hugharimu hata watu maisha yao. Kujitoa usiku na mchana kuishi kikamilifu ni kujikana kuwa hutafanya kila kitu katika maisha haya bali utawekeza nguvu maeneo muhimu katika maisha ili kuandaa njia njema kwa wengine. Yataka moyo, yataka moyo thabiti, yataka ustahimilivu kujitoa na kuishi kitoshelevu.

Alama njema unayoweza kuitengeneza na kutoa zawadi yenye manukato kwa dunia ni kuwa tayari kuishi uhalisia wako, u tayari wa kujimimina kwa vipaji ulivyojaliwa, mawazo, ujuzi, uzoefu, maarifa kuisaidia jamii kujitambua, kukua na kuendelea. Hii alama huyapa maisha ya mtu kuwa marefu hata baada ya kufa kwake. Maisha ya mashujaa ambao tunawasoma na kuwakumbuka ni kwa sababu ya alama za matendo yao yasofutika mioyoni mwetu. Mimi na wewe tuna nafasi sasa tukiwa hai kuendelea kufanya mambo bila kujibakiza tukijitoa kadri tuwezavyo kuifanya Dunia kuwa sehemu salama ya kuishi.

KOCHA   MWL. JAPHET   MASATU , DAR   ES SALAAM

WhatsApp + 255 716924136  /    + 255 755 400128 / + 255 688 361 539

 

NYUMA YA PAZIA , KUNA MAUMIVU MAKALI , SI VILE ULIVYOKUWA UKIFIKIRIA.

Jambo lolote lile unaloweza kuliona kwa wengine unaweza kufichwa uhalisia wake na ukachukulia huenda ni jepesi au watu hao wanaofanya hivyo hawapitii changamoto zozote zile. Ni rahisi sana watu kutamani kuishi kama wengine ila wanapoanza kuishi kama hao watu wanakuja kugundua ukweli kuwa si vile walivyofikiria itakuwa. Unachokiona na unachokutana nacho huenda visiwe vinafanana kabisa na hili limefanya watu wengi wagundue kuwa maisha si vile wanavyoona kwa juu juu bali yana siri kubwa mno.

Unaweza kuona ni rahisi kusikia mtu ambaye kila siku anaamka asubuhi na mapema na kufanya mazoezi bila kuacha ukadhania kujenga nidhamu ya namna hiyo ni vyepesi. Ikiwa huna utamaduni huo na ukajisemea siku basi ngoja nianze kufanya mazoezi kila asubuhi bila kuacha utakuta umeanza siku ya kwanza vizuri, ya pili vizuri, ya tatu unaanza kukutana na vikwazo, ya nne unasema ngoja leo nipumzike, ya tano unapendezwa na mapumziko, siku zinapita hufanyi tena mazoezi. Unapotafakari haya unakuja kugundua kuwa wale wanaofanya mazoezi ya mwili au akili kila siku kwa kufanya matendo kama kukimbia au kusoma vitabu kila siku si rahisi na si wa kubezwa hata kidogo.

Unapopitia mwenyewe kufanya kitu ndivyo unavyoweza kuwa na uzoefu na kuweza kukielezea vizuri katika ugumu wake tofauti na unaposema mambo kwa nadharia au kuyasikia sikia tu. Jamii zetu nyingi hupenda kuona mambo rahisi huku hakuna ambaye ana uzoefu nayo bali ni kwa kusikia au kujifanya kujua ila inapotokea mtu inabidi ahusike kuyapitia ndipo anapokuja kugundua si rahisi kama alivyodhani au kuambiwa na watu wengine.

Wengine wanaweza kusema hiyo biashara unayofanya mbona ni rahisi au kama ni jambo la kuandika au kusoma kitabu mtu anaweza kuona anayefanya ni rahisi. Ila inapotokea mtu huyo aingie kuandika, kusoma au kufanya biashara ndipo anapokuja kugundua namna ilivyo ngumu kufanya hivyo vitu. Kuna msemo unaosema kama ingekuwa mambo rahisi basi watu wengi wangekuwa wameyapata isitoshe ni asili ya binadamu kuishi vizuri na kwa furaha. Ndivyo ambavyo hata njia ya kufanikiwa inavyotamaniwa na wengi ila si rahisi kama vile watu wanavyoingia katika mitego ya kuambiwa toa fedha sasa na utapata mara mbili yake au toa fedha na utajirike haraka. Wengi wameingia katika matatizo kwa kutamani kupita njia rahisi au wakijaribu kurahisisha mambo huku kiuhalisia mambo huwa si rahisi kama yanavyodhaniwa na wengi.

Usiwe mwepesi kuvunja moyo watu au kuchukulia vitu kirahisi hasa kama hujawahi kuvipitia au huvijui kiuzoefu wake. Inawezekana ukijaribu hutaweza kuvifanya kama wengine wanavyofanya.

KOCHA  MWL.  JAPHET   MASATU.

WhatsApp + 255 716924136 /  + 255 755 400128

EMAIL :  japhetmasatu@gmail.com

 

STADI ZA KAZI---DARASA LA SABA ( STD 7 )---KILIMO NA UFUGAJI----NUKUU ZA SOMO---NOTES---KWA SHULE ZA MSINGI---TANZANIA---( PDF )