BILL GATES KUSAIDIA WATU KUFUGA KUKU AFRIKA

Mwanzilishi wa kampuni ya Microsoft Bill Gates, amezindua kampeni ya kusaidia watu maskini zaidi barani Afrika, kusini mwa jangwa la sahara, kwa kufuga kuku

Bilionea huyo Bill Gates anasema kuwa kufuga kuku kunaweza kuwa kifaa muhimu katika kukabiliana na ufukara hohe hahe.

Ameahidi kutoa kuku 100,000, na ukurasa katika mtandao wa mradi huo tayari umewavutia na kusambazwa kwa maelfu ya watu.

Umoja wa Mataifa unakisia kuwa asilimia 41 ya watu katika Bara la Afrika, Kusini mwa jangwa la Sahara wanaishi katika ufukara mkubwa.

 Bwana Gates alisema kuwa mkulima anayefuga kuku watano anaweza kupata zaidi ya Dola 1,000 kwa mwaka. 

Bwana Gates alisema kuwa mkulima anayefuga kuku watano anaweza kupata zaidi ya Dola 1,000 kwa mwaka. Mtu hutajwa kuwa maskini iwapo anapata Dola 700 pekee kwa mwaka.

Alisema kuwa lengo la mradi huo ni kusaidia zaidi ya asilimia 30 ya watu wanaoshi mashambani Kusini mwa Jangwa la Sahara ili wapate huduma ya kufuga kuku wa hali ya juu mbao watachanjwa. Alisema hatua hiyo itaongeza watu wanaofuga kuku kwa asilimia tano.

Ananukuliwa akisema kuwa kuku huongezeka maradufu na kwa hivyo hakuna uekezaji ulio na mapato mazuri kwa asilimia ya juu kuliko ufugaji kuku.

Alisema hayo alipokuwa akianzisha mradi huo jijini New York. Anashirikiana na shirika na kutoa misaada kwa maskini la Heifer International.

Watu milioni 800 huishi katika hali ya umaskini hohehahe, kulingana na takwimu za Umoja wa Mataifa.

CHANZO   CHA  HABARI : BBC  SWAHILI , 09   JUNI, 2016

NGUVU YA MAWAZO KATIKA MAFANIKIO KIUCHUMI

 

 MAWAZO   NI  NGUVU  YA   AJABU   IKITUMIWA  VIZURI

 Kila kitu kinachoonekana duniani kilianza na mawazo. Mawazo ndiyo kiwanda kikubwa cha uumbaji wote unaoonekana duniani. Hata katika vitabu vya dini tunaelezwa kuwa Mungu aliamua (Mawazo) kuumba mbingu na nchi.

Ninaposoma Biblia kuhusu habari hizi za uumbaji wa Mungu, kuna kitu huwa najifunza kwa namna ambavyo Mungu aliumba mbingu na nchi. Kimsingi Mungu aliamua kuumba dunia hii pamoja na vyote vilivyomo. Licha ya kwamba tunaambiwa kuwa vitu vyote vilikamilika kuumbwa kwa muda wa siku saba, lakini kutokea kwake kulichukua miezi, miaka na karne nyingi baadaye.

 Kwa mfano, baada ya Mungu kutamka kuwa mimea iwepo katika ardhi, tunaambiwa kuwa ili kuota ilibidi mimea hiyo isubiri binadamu aumbwe ili awepo mtu wa kuilima ardhi na kuitunza hiyo mimea. Kuna kitu tunaweza kukipata hapa: Mawazo yako ni ya thamani sana na kila unapowaza na kuamua, mara zote jambo lile huwa limeshaumbika kabisa.

Kwa maana hii yafaa tujifunze kuwa na mawazo ambayo yataumba mambo na vitu tunavyovihitaji pekee na si vile tusivyovihitaji. Jambo jingine la kushika ni kuwa huwezi kutenda kile usichowaza. Matendo yote ni matokeo ya mawazo.
Na kama mtu akisema hutenda pasipo kuwaza, hiyo siyo kweli. Ubongo wa binadamu unazo sehemu kadha wa kadha zinazohusika na kumbukumbu na takwimu mbalimbali. Kila tunachoamua ni matokeo ya taarifa fulani ambazo zimeshakuwamo katika ubongo wetu huko nyuma. Yawezekana hata muhusika akawa hana habari ya kuwa taarifa hizo zipo ubongoni mwake, lakini kutofahamu huku hakuzuii taarifa hizo kuendelea kutumika na ubongo katika kuamua.

Wapo watu ambao hujikuta wanaamua uamuzi wasioupenda ama wanapata matokeo wasiyoyapenda. Tatizo si matokeo, tatizo ni uamuzi ambao yanakuja hivyo yanavyokuja kwa sababu ya taarifa zinazoujaza ubongo wako.
 Nimesema kuwa ili upate matokeo unayoyataka ni lazima akili yako ijikite katika kutafakari yale tu unayoyataka. Jambo hili la akili kutafakari yale tu unayoyataka siyo jambo rahisi hata kidogo.

Kwa kawaida asili ya binadamu huongozwa na woga na mashaka. Uamuzi mwingi wa binadamu huweza kutawaliwa na woga na mashaka kuliko kutawaliwa na kujiamini na matumaini. Na kama akili yako isipoona ama kutafakari yale unayoyataka ni vigumu sana kupata matokeo unayoyataka.
Haiwezekani wewe ukawa tajiri ikiwa akili yako inauona na kuuhusudu umasikini. Ni jambo lisilowezekana mtu kuishi kwa amani na furaha ikiwa akili yako inaona kuwa watu wanaokuzunguka ni wabaya. Utapata unachokiona akilini mwako.

Na ifahamike kwamba suala la akili ya mtu kujiweza kufikiria kile unachokipenda siyo kazi rahisi, ni suala linalohitaji bidii nyingi katika uamuzi. Kufikiria kujenga nyumba yako ya kuishi wakati hata kulipa kodi katika nyumba uliyopanga kunakusumbua; inahitaji bidii kubwa.
Ni rahisi kujisemea kuwa ‘sitaweza kujenga nyumba yangu kwa sababu hata kodi tu ya hiki chumba kimoja inanitoa jasho’. Kufikiria kuanzisha biashara wakati hata mtaji huna siyo lelemama.

  Na jambo hili la malalamiko ya wengi kuwa hawana mitaji ni matokeo ya namna wanavyowaza. Wanawaza kuwa haiwezekani kupata mtaji, ndicho kinachotokea kwamba wanakuwa hawana mitaji. Kuhusu hili la uwezekano wa kuzalisha fedha na mitaji pasipo kutumia fedha nimeeleza kwa kina katika sura za uchumi ndani ya kitabu changu.

Huwezi kutenda jambo pasipo kufikiria.
  Na nimekwishasema kuwa kufikiria unatakiwa kujaza akilini mwako picha, mambo na taarifa unazozihitaji tu ili uwe na matendo unayohitaji. Ni kweli kuwa inahitajika nia ya dhati sana kufikiria kupata cheo kikubwa kabla hujapata ajira. Lakini kama kweli unakitaka hicho cheo huna namna zaidi ya kuwaza kuhusu hicho cheo na siyo kuwaza kuhusu tatizo lako la ajira.

Kufikiria uwekezaji wakati huna hata hela ya kula siyo jambo rahisi, lakini linawezekana. Kutafakari habari za kuwa na familia bora wakati ndoa haioneshi dalili yoyote ya kutengemaa hilo linahitaji akili yenye nia bora.
Ukiwa unaumwa ni lazima uwaze uzima ili uzima ukujie na si kuwaza kuhusu ugonjwa wako. Hii ni kanuni ya kiasili na kiroho na inatueleza kuwa mara zote mtu huvuta na kupata anachokiwaza. Na wataalamu wa saikolojia wanatueleza kuwa ubongo huwa hauna vikanushi.   Ubongo unafikiria kwa uelekeo wenye uzani sawa.

Unapotaka joto sema nahitaji joto na kamwe usiseme sipendi baridi. Ukisema sipendi baridi ubongo unarekodi neno baridi na unakuletea baridi badala ya joto. Kama unahitaji maisha mazuri sema ninahitaji maisha mazuri na usiseme sipendi maisha magumu. Ukisema hivyo basi ubongo unarekodi maisha magumu na unakudhihirishia maisha magumu.

 Wewe mwenyewe jaribu kuchunguza katika jamii, je, ni watu gani wenye maisha mazuri? Je, ni wale wanaolalamika sana kuhusu maisha ama ni wale ambao hawalalamiki kuhusu maisha? Utakachogundua ni kuwa kadiri mtu anavyotajataja habari za maisha magumu, ndivyo hayo maisha magumu yanavyodhihirika maishani mwake. Kiuhalisia ni kwamba hata kama ungetaja habari za ugumu wa maisha kutoka asubuhi mpaka jioni, hilo halibadilishi ugumu huo wa maisha, badala yake linafanya hali kuwa vile vile na pengine kuwa ngumu zaidi. Kama unataka utajiri sema ninataka kuwa tajiri na usiseme siupendi umasikini. Ukisema habari za kuwa siupendi umasikini ni kwamba ubongo unarekodi neno kuu  umasikini na hatimaye unajikuta kuwa umezungukwa na manukato ya kimasikini.

Mawazo yanayoutawala ubongo wako wakati mwingi ndiyo yatakayofanya uwe na fikra za namna fulani. Mfumo wako wa kifikra ndiyo unaoamua aina ya uamuzi unaoamua mara kwa mara. Uamuzi unaoamua unapelekea namna ya kutenda kwako. Namna ya kutenda kwako ndiko kunakopelekea matokeo ya aina yoyote unayoyaona katika maisha yako.

Hakuna jambo wala matokeo yanayokutokea kwa bahati mbaya. Kuna umuhimu pia wa mtu kuwa na fikra za kishukrani katika maisha. Mara nyingi binadamu tunashindwa kupata tunayoyataka kwa sababu ya kutokuwa na shukrani kwa kila tulichonacho.
Nafahamu kuwa wengi tunaamini kuwa kuna Mungu (ingawa aina ya Mungu tunayemwamini inaweza kutofautiana kutoka imani hadi imani). Hata hivyo katika imani zote duniani waumini wake hufundishwa kuwa na moyo wa shukrani. Moyo wa shukrani ni matokeo ya fikra za shukrani. Ni vigumu sana kumshukuru Mungu ama binadamu mwenzio ikiwa huna fikra za shukrani. Mara zote fikra za kishukrani huwa hazilalamiki wala kunungunika, hazilazimishi wajibu wala hazipuuzi haki.

  Ili kuweza kuwa na mawazo sahihi yatakayokupeleka kwenye uamuzi sahihi katika kila jambo, ni vema sana kuwa na fikra za shukrani. Isisahaulike kuwa maneno yanayomtoka mtu huwa ni matokeo ya fikra zilizoijaa akili yake. Kwa jinsi hii ni kwamba mawazo yetu na uamuzi wetu uwe ni ule unaosapoti picha nzuri zilizomo vichwani mwetu.
Ukitaka kufanikiwa kiuchumi na kimaisha kwa ujumla, hakikisha unakuwa na mfumo chanya wa mawazo. 

MAKALA   toka  GAZETI   LA   JAMHURI, 27 / 06/ 2016

MAISHA YANAONGOZWA NA MALENGO ---1

Maisha ni malengo. Hakuna maisha ya mkato. Ishi kwa malengo. Tusiishi kwa sababu tunaishi. Tuishi kwa malengo, kwa sababu Mungu ametuumba tuishi kwa malengo. Ungana na Henry James kuamini maneno haya; “Ni muda mwafaka wa kuishi maisha ambayo umeyafikiria kwa muda mrefu.’’ 

Binadamu wengi wanaishi ni kwa sababu wanaishi. Hawaishi kwa malengo. Tunaishi maisha yasiyo na utafiti. Tunapenda majibu mepesi kwa maswali magumu. Karne ya 21 siyo karne ya kutafuta miujiza makanisani. Siyo karne ya kutafuta ushirikina kwa waganga wa kienyeji ili kutajirika. 

Si karne ya ubabe wa kimadaraka. Si karne ya wizi wa mali za umma. Si karne ya dharau na kebehi. Hii ni karne ya utafiti, ugunduzi na ushindani katika nyanja zote zinazomhusu binadamu kama vile teknolojia inayoendana na wakati na tafiti mbalimbali za kisomi. Kupanga ni kuchagua. Mwanafalsafa Benjamin Franklin anasema, “Ukishindwa kujiandaa, umejiandaa kushindwa.” 

Hakuna anayepanga kushindwa ila wengi wanashindwa kupanga. Mwandishi Vicent Lombardi anasema, “Kila mtu anapenda kufanikiwa ila ni wachache wanaopenda kujiandaa kufanikiwa’’. Mantiki inatunong’oneza ukweli kwamba fikra zilizotufikisha katika mazingira tuliyomo kwa sasa na hali tuliyonayo leo, fikra hizo kwa uhalisia wake hazitaweza kututoa kwenye matatizo tuliyonayo kwa sasa.

Ukweli wa niyasemayo hapo juu alipata kuusema mwanafizikia wa Kijerumani, Albert Einstein [1879-1955], kwa maneno haya, “Hatuwezi kutatua matatizo kwa kutumia namna ile ile ya kufikiri tuliyotumia katika kuyaanzisha matatizo’’. Tunahitaji fikra tofouti. Tunahitaji fikra mbadala. Yatufaa kubadili gea sasa ili tuweze kuupanda mlima wa mafanikio kwa usalama, uhakika na weledi. Gea hiyo ni kuanza kuishi maisha kwa malengo. 

Kuna methali ya Kifaransa inayosema hivi; “Yeye anayengoja kuvaa viatu vya marehemu anaweza kutembea pekupeku kwa muda mrefu’’. 

Watanzania tusisubiri viatu vya marehemu. Kusubiri maendeleo yatokee pasipo kufanya kazi kwa bidii ni kama unaishi kwa kusubiri viatu vya marehemu. Kulalamika kwa kila jambo pasipo kubuni mbinu na mikakati ya kukuinua kiroho, kimaadili, kisiasa, kiafya na kiuchumi ni kama unaishi kwa kusubiri viatu vya marehemu. 

Kukaa na ukimsubiri mwanaume mwenye pesa ajitokeze kukuoa ni kama unaishi kwa kusubiri viatu vya marehemu. Methali ya Kiswahili inaupambanua ukweli huo kwa maneno haya, “Mtegemea cha ndugu hufa maskini.’’ Mtu anayeweza kukuokoa wewe ni wewe. Ni wewe unayeweza kujiandikia historia nzuri au mbaya. Ni wewe unayeweza kuwa chachu ya mabadiliko au mhanga wa mabadiliko. Ishi kadri ya uwezo wako, usiishi kama watu wengine wanavyotaka uishi. Methali ya Kiswahili inatukumbusha maneno haya, “Miluzi mingi humpoteza mbwa’’. 

Watu wengi walioshindwa kufanikiwa kimaisha, kiroho, kimaadili ni wale walioishi kadri ya watu walivyowapendekezea waishi. Usijaribu kuishi kwa kumfurahisha mwanadamu, ishi kwa kumfurahisha Mungu. Ukiishi kwa kumfurahisha mwanadamu, ipo siku huyo mwanadamu uliyeishi kwa kumfurahisha atakusaliti. Mhubiri wa Injili, Israel Ayivor, alipata kusema, “Yule aliyekusaidia kuzungumza mambo mabaya kuhusu mwenzako, ndiye atakayemsaidia mtu mwingine kuzungumza uovu juu yako’’. 

Maneno haya yana ukweli ndani yake. Yapo na si kwamba hayapo. Maisha hayaongozwi kwa mihemko na papara zisizo na dira. Maisha hayaongozwi kwa dhuluma. Maisha yanaongozwa kwa hekima, busara, maono na jitihada binafsi. 

Huwezi ukawa kama unavyotaka uwe kama hujawa na dhamira ya dhati ya kubadilika. George Benerd Shaw alipata kuandika haya, “Maendeleo hayawezekani bila mabadiliko ya fikra na wale ambao hawawezi kubadilika namna wanavyofikiri hawawezi kubadili chochote”. Stephen Richards anaamini kwamba “Namna yetu ya kufikiri inatengeneza matokeo mazuri au mabaya’’. 

Ukosefu wa fikra sahihi na bainifu kwa maisha ya mwanadamu yeyote yule ni ugonjwa. Ni ugonjwa usioonekana kwa vipimo vya kisayansi lakini ni ugonjwa unaoua kwa haraka sana kuliko magonjwa mengine. Ni ugonjwa unaoonekana kwa vitendo na kwa uamuzi mbalimbali wa mhusika. Fikra sahihi zinaishi. Badilika kwanza. Badili mtazamo wako katika kufikiri. Badili mtazamo wako kwa kuupenda ukweli ulivyo na uhalisia wake. Badili mtazamo wako kwa kusoma tafiti za wasomi mbalimbali, vitabu, magazeti, na majarida mbalimbali. Lisilowezekana linawezekana kwa kubadili namna ya kufikiri. Maisha ni malengo. Baba wa kiroho, Sai Baba, alipata kuyatafsiri maisha kwa namna hii: 

“Maisha ni wimbo, uimbe,

Maisha ni mchezo, ucheze,

Maisha ni changamoto, ikabili,

Maisha ni ndoto, ielewe,

Maisha ni sadaka, itoe,

Maisha ni upendo, ufaidi,

Maisha ni lengo, lifikie,

Maisha ni kengele, igonge,

Maisha ni barabara, ipite,

Maisha ni mti, upande.’’ 

Kwa hakika maisha ni wimbo, imba kadri ya uwezo wako. Maisha ni mchezo, cheza kadri uwezavyo. Maisha ni changamoto, kabiliana na changamoto unazokutana nazo katika maisha yako. Maisha ni ndoto, timiza ndoto ulizonazo katika maisha yako. 

Msanii wa nyimbo za ‘Hip-hop’ ambaye pia ni Mbunge wa Tanzania, Jimbo la Mbeya Mjini, Joseph Osmund Mbilinyi, katika kibao chake cha ‘Muziki na Maisha’ anatufundisha falsafa inayosema, “Maisha ni ubishi’’. 

Maisha ni kuanguka na kuinuka. Ukianguka inuka. Ukianguka amini unaweza bado kufanikiwa kwa kiasi kikubwa. Virgil anasema, “Wanashinda wale wanaoamini wanashinda.’’ Mungu ni dereva wa maisha yetu. Tumwamini yeye na hakika tutashinda. Jinsi uyaonavyo maisha yako huumba maisha yako. Maisha tunayaona kama kitendawili kisicho na jibu kwa sababu tulio wengi tunaishi maisha yasiyo na malengo. Umefika wakati sasa wa kuacha kuishi maisha ya kimazoea. 

Kama unataka maisha yako yawe na mvuto mkubwa yape mhuri wa malengo. Maisha bila malengo ni kama suruali isiyo na zipu!. Katika filamu ya ‘’Chariotos of fire’’, mkimbiaji wa Olimpiki aitwaye Eric Liddell anasema, “Mungu aliniumba kwa malengo.’’ Kama anavyosema kwa ufasaha kabisa Ethel Waters kwamba, “Mungu haumbi takataka.’’

Kuna watu wanaofikiri kwamba wapo duniani kwa bahati mbaya. Sio kweli. Hapa duniani hakuna binadamu aliyeumbwa kwa bahati mbaya. Mchungaji Rick Warren anasema, “Hapo zamani kabla hujawa katika tumbo la mama yako ulikuwa katika mawazo ya Mungu’’. Kuzaliwa kwako hakukutokana na makosa wala bahati mbaya. Mungu hana sifa ya kukosea. Mungu hana sifa ya kubuni. Mungu ana sifa za uhakika. Mungu ana sifa ya umilele. Uko hai kwa sababu Mungu alitaka kukuumba ili uwe sehemu ya viumbe walioumbwa na Mwenyezi Mungu.

Upo ukweli unaopendwa kutumiwa na watu wengi sana, ukweli huo unasema hivi, “Kazi ya Mungu haina makosa.’’ Ni ukweli kwamba hujaumbwa kwa makosa wala kwa bahati nasibu. Mwanasayansi Albert Einstein anasema, “Mungu hachezi bahati nasibu’’. Mshairi Russel Kelfer anasema,‘’Wewe ni wewe kwa kusudi. Wewe ni sehemu ya mpango wa ajabu. Wewe ni wa thamani na chombo maalumu kikamilifu. Unaitwa mtu mwanaume au mwanamke maalumu wa Mungu’’. Biblia Takatifu inasema, ‘’Umeumbwa kwa namna ya ajabu.’’ 

ITAENDELEA---MAKALA   toka   GAZETI   LA  JAMHURI , 08/06/2016